2 hours ago
1
ARTICLE AD BOX
ନୂଆଦିଲ୍ଲୀ: ଆଗାମୀ ମାସଗୁଡ଼ିକରେ ପ୍ରଶାନ୍ତ ମହାସାଗରୀୟ ଅଞ୍ଚଳରେ ‘ଏଲ୍ ନିନୋ’ ପ୍ରକ୍ରିୟା ଅତି ଦ୍ରୁତ ଗତିରେ ସକ୍ରିୟ ହେବାକୁ ଯାଉଛି। ଏହାର ପ୍ରଭାବରେ ସାରା ବିଶ୍ୱରେ ମାରାତ୍ମକ ଗ୍ରୀଷ୍ମ ପ୍ରବାହ, ମରୁଡ଼ି ଏବଂ ଅତ୍ୟଧିକ ବୃଷ୍ଟିପାତ ଭଳି ଚରମ ପାଣିପାଗ ବିପର୍ଯ୍ୟୟ ସୃଷ୍ଟି ହେବା ଆଶଙ୍କା ରହିଛି ବୋଲି ବିଶ୍ୱ ପାଣିପାଗ ସଂଗଠନ (ଡବ୍ଲ୍ୟୁଏମ୍ଓ) ପକ୍ଷରୁ ଶୁକ୍ରବାର ଚେତାବନୀ ଦିଆଯାଇଛି। ବିଶେଷ କରି ଭାରତରେ ଏହାର ନକାରାତ୍ମକ ପ୍ରଭାବ ଯୋଗୁଁ ଚଳିତ ବର୍ଷ ମୌସୁମୀ ଋତୁ ଗମ୍ଭୀର ଭାବେ ପ୍ରଭାବିତ ହେବା ସହ ବିଭିନ୍ନ ପ୍ରାକୃତିକ ବିପର୍ଯ୍ୟୟ ଦେଖାଦେଇପାରେ।
ଡବ୍ଲ୍ୟୁଏମ୍ଓର ମାସିକ ଋତୁକାଳୀନ ଜଳବାୟୁ ସୂଚନା ଅନୁଯାୟୀ, ଜୁଲାଇରୁ ସେପ୍ଟେମ୍ବର ମଧ୍ୟରେ ଏଲ୍ ନିନୋ ଏକ ଶକ୍ତିଶାଳୀ ରୂପ ଧାରଣ କରିବାର ସ୍ପଷ୍ଟ ସଂକେତ ମିଳିଛି। ବିଶ୍ୱର ପ୍ରମୁଖ ପାଣିପାଗ କେନ୍ଦ୍ରଗୁଡ଼ିକର ଆକଳନ ଅନୁସାରେ, କେନ୍ଦ୍ରୀୟ ଏବଂ ପୂର୍ବ ପ୍ରଶାନ୍ତ ମହାସାଗରର ତାପମାତ୍ରା ସ୍ୱାଭାବିକ ଅପେକ୍ଷା ୨ ଡିଗ୍ରି ସେଲସିୟସରୁ ଅଧିକ ବୃଦ୍ଧି ପାଇବ। ଏହି ପୂର୍ବାନୁମାନକୁ ନେଇ ପାଣିପାଗ ବିଜ୍ଞାନୀମାନେ ସମ୍ପୂର୍ଣ୍ଣ ନିଶ୍ଚିତ ଅଛନ୍ତି। ଏଲ୍ ନିନୋ ହେଉଛି ଏକ ପ୍ରାକୃତିକ ଜଳବାୟୁ ପ୍ରକ୍ରିୟା, ଯାହା ପ୍ରଶାନ୍ତ ମହାସାଗରର ପୃଷ୍ଠଭାଗ ତାପମାତ୍ରା ଅତ୍ୟଧିକ ବୃଦ୍ଧି ପାଇବା ଯୋଗୁଁ ସୃଷ୍ଟି ହୋଇଥାଏ।
ଡବ୍ଲ୍ୟୁଏମ୍ଓ ମହାନିର୍ଦ୍ଦେଶକ ସେଲେଷ୍ଟେ ସାଉଲୋ କହିଛନ୍ତି ଯେ, ଏଲ୍ ନିନୋ ସ୍ଥିତି ଆରମ୍ଭ ହୋଇସାରିଛି ଏବଂ ଏହା ଆଗକୁ ଦ୍ରୁତ ଗତିରେ ଅଧିକ ସକ୍ରିୟ ହେବ। ଏହା ଦ୍ୱାରା ବିଶ୍ୱର ବିଭିନ୍ନ ଅଞ୍ଚଳରେ ମରୁଡ଼ି, ପ୍ରବଳ ବର୍ଷା ଏବଂ ସାମୁଦ୍ରିକ ଉଷ୍ମତା ବୃଦ୍ଧି ପାଇବା ଆଶଙ୍କା ରହିଛି। ଜନଜୀବନ ଏବଂ ଅର୍ଥନୀତି ଉପରେ ପଡ଼ିବାକୁ ଥିବା ପ୍ରଭାବକୁ ହ୍ରାସ କରିବା ପାଇଁ ଜାତିସଂଘ ଏବଂ ଆଞ୍ଚଳିକ ସ୍ତରରେ ବ୍ୟାପକ ପ୍ରସ୍ତୁତି ଆରମ୍ଭ ହୋଇଛି। କୃଷି, ସ୍ୱାସ୍ଥ୍ୟ ଏବଂ ମାନବୀୟ ସହାୟତା ପ୍ରଦାନ କରୁଥିବା ସଂସ୍ଥାଗୁଡ଼ିକୁ ପୂର୍ବ ପ୍ରସ୍ତୁତି ନିମନ୍ତେ ପାଣିପାଗ ସୂଚନା ଯୋଗାଇ ଦିଆଯାଉଛି।
ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପକ୍ଷରୁ ମଧ୍ୟ ପ୍ରଶାନ୍ତ ମହାସାଗରରେ ଏଲ୍ ନିନୋ ସକ୍ରିୟ ହେବା ନେଇ ସ୍ପଷ୍ଟ କରାଯାଇଛି। ଚଳିତ ବର୍ଷ ଭାରତୀୟ ମହାସାଗରୀୟ ଦ୍ୱିମେରୁ ବ୍ୟବସ୍ଥା (ଆଇଓଡି) ନିରପେକ୍ଷ ରହିଥିବାରୁ, ଏହା ଏଲ୍ ନିନୋର ପ୍ରଭାବକୁ ହ୍ରାସ କରିବାରେ ସଫଳ ହେବନାହିଁ। ଭାରତରେ ଜୁନ୍ ମାସରେ ମୌସୁମୀ ବୃଷ୍ଟିପାତରେ ପ୍ରାୟ ୪୦ ପ୍ରତିଶତ ହ୍ରାସ ଘଟିଛି, ଯାହା ୧୯୦୧ ମସିହା ପରଠାରୁ ପଞ୍ଚମ ସବୁଠାରୁ ଶୁଖିଲା ଜୁନ୍ ମାସ ଭାବେ ରେକର୍ଡ କରାଯାଇଛି। ଆଇଏମ୍ଡିର ଆକଳନ ଅନୁଯାୟୀ, ଜୁଲାଇ ମାସରେ ମଧ୍ୟ ସ୍ୱାଭାବିକ ସୀମା ଠାରୁ କମ୍ ବୃଷ୍ଟିପାତ ହେବ, ଯାହା ଦୀର୍ଘ ଅବଧିର ହାରାହାରି (ଏଲ୍ପିଏ) ୨୮୦.୪ ମିମି ତୁଳନାରେ ୯୪ ପ୍ରତିଶତ କମ୍ ରହିବ। ସେହିପରି ସାମଗ୍ରିକ ଭାବେ ଚଳିତ ବର୍ଷ ମୌସୁମୀ ବୃଷ୍ଟିପାତ ଏଲ୍ପିଏର ମାତ୍ର ୯୦ ପ୍ରତିଶତ ରହିବ ବୋଲି ଆଶଙ୍କା କରାଯାଉଛି, ଯାହା ଦେଶର କୃଷି କ୍ଷେତ୍ର ପାଇଁ ଚିନ୍ତାଜନକ ପରିସ୍ଥିତି ସୃଷ୍ଟି କରିପାରେ।
