1 hour ago
1
ARTICLE AD BOX
ନୂଆଦିଲ୍ଲୀ: ଦେଶର ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ଓ ଆତଙ୍କବାଦୀ ନେଟୱର୍କକୁ ସମ୍ପୂର୍ଣ୍ଣ ଭାବେ ଧ୍ୱଂସ କରିବା ପାଇଁ କେନ୍ଦ୍ର ଗୃହ ମନ୍ତ୍ରଣାଳୟ ଶନିବାର ଏକ ବଡ଼ ପଦକ୍ଷେପ ଗ୍ରହଣ କରିଛି। ବେଆଇନ କାର୍ଯ୍ୟକଳାପ ନିରୋଧୀ ଆଇନ ବା ୟୁଏପିଏ ଅଧୀନରେ ପାକିସ୍ତାନରୁ ଭାରତ ବିରୋଧୀ କାର୍ଯ୍ୟକଳାପ ଚଳାଉଥିବା ୨୩ ଜଣ ଆତଙ୍କବାଦୀଙ୍କୁ ବ୍ୟକ୍ତିଗତ ଭାବେ 'ଆତଙ୍କବାଦୀ' ଘୋଷଣା କରାଯାଇଛି, ଯେଉଁଥିରେ ଆତଙ୍କବାଦୀ ସଂଗଠନ ଲସ୍କର-ଇ-ତୋଇବା (ଏଲଇଟି) ର ପ୍ରତିଷ୍ଠାତା ହାଫିଜ୍ ମହମ୍ମଦ ସୟିଦର ନିକଟତମ ସହଯୋଗୀ ଏବଂ ଜୈଶ-ଇ-ମହମ୍ମଦ (ଜେଇଏମ୍) ର ସଦସ୍ୟମାନେ ସାମିଲ ଅଛନ୍ତି।
ଏହି ନୂତନ ତାଲିକା ପ୍ରକାଶ ପାଇବା ପରେ ୟୁଏପିଏ ଆଇନର ଚତୁର୍ଥ ଅନୁସୂଚୀ ଅନୁଯାୟୀ ଭାରତ ଦ୍ୱାରା ଚିହ୍ନଟ ହୋଇଥିବା ମୋଟ ଆତଙ୍କବାଦୀଙ୍କ ସଂଖ୍ୟା ୮୦ରେ ପହଞ୍ଚିଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆତଙ୍କବାଦ ବିରୋଧୀ ''ଜିରୋ ଟଲରାନ୍ସ'' (ଶୂନ୍ୟ ସହନଶୀଳତା) ର ଦୂରଦୃଷ୍ଟିକୁ ଆଧାର କରି ଗୃହ ମନ୍ତ୍ରଣାଳୟ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଚିହ୍ନଟ ହୋଇଥିବା ୨୩ ଜଣଙ୍କ ମଧ୍ୟରୁ ୧୭ ଜଣ ପାକିସ୍ତାନୀ ନାଗରିକ ହୋଇଥିବା ବେଳେ ୬ ଜଣ ଭାରତୀୟ ନାଗରିକ ଅଛନ୍ତି, ଯେଉଁମାନେ ବର୍ତ୍ତମାନ ପାକିସ୍ତାନ ଏବଂ ପାକିସ୍ତାନ ଅଧିକୃତ ଜାମ୍ମୁ-କାଶ୍ମୀର (ପିଓକେ) ରେ ରହି ଭାରତ ବିରୋଧରେ ଷଡ଼ଯନ୍ତ୍ର କରୁଛନ୍ତି।
ଗୃହ ମନ୍ତ୍ରଣାଳୟର ସୂଚନା ଅନୁଯାୟୀ, ଏହି ସମସ୍ତ ବ୍ୟକ୍ତି ଜାମ୍ମୁ-କାଶ୍ମୀରରେ ସୁରକ୍ଷା ବାହିନୀ ଉପରେ ଆକ୍ରମଣ, ସୀମାପାର ଅନୁପ୍ରବେଶ, ଡ୍ରୋନ୍ ଜରିଆରେ ଅସ୍ତ୍ରଶସ୍ତ୍ର ଓ ଗୋଳାବାରୁଦ ଚୋରା ଚାଲାଣ, ଆତଙ୍କବାଦୀ ପାଣ୍ଠି ସଂଗ୍ରହ ଏବଂ ସୋସିଆଲ ମିଡିଆ ମାଧ୍ୟମରେ ଯୁବକମାନଙ୍କୁ ଆତଙ୍କବାଦ ଦିଗରେ ଆକର୍ଷିତ ତଥା ନିଯୁକ୍ତି କରିବା ଭଳି ସଂଘୀନ ଅପରାଧରେ ସାମିଲ ଅଛନ୍ତି। ସେମାନଙ୍କୁ ଆତଙ୍କବାଦୀ ଘୋଷଣା କରାଯିବା ଫଳରେ ସୁରକ୍ଷା ଏଜେନ୍ସି ଗୁଡ଼ିକ ଏବେ ଆନ୍ତର୍ଜାତୀୟ ସ୍ତରରେ ସେମାନଙ୍କର ସମ୍ପତ୍ତି ଜବତ କରିବା, ଆର୍ଥିକ କାରବାର ବନ୍ଦ କରିବା ଏବଂ ସେମାନଙ୍କର ସମସ୍ତ ଆଇନଗତ ଗତିବିଧିକୁ ରୋକିବାରେ ସଫଳ ହେବେ।
ହାଫିଜ୍ ସୟିଦର ସହଯୋଗୀ ଅବଦୁଲ ରଉଫ୍, ରାଣା ଇଫ୍ତିଖାର, ହାଫିଜ୍ ଖାଲିଦ୍ ୱାଲିଦ୍, ମୌଲାନା ସୈଫୁଲ୍ଲା ଖାଲିଦ୍ ଓ ଜମାତ-ଉଦ-ଦାୱା ସହ ଜଡ଼ିତ ମୌଲାନା ୟୁସୁଫ୍ ତୈବୀଙ୍କ ନାମ ଏହି ତାଲିକାରେ ରହିଛି। ସେହିପରି ଜୈଶ-ଇ-ମହମ୍ମଦର ମୁଫ୍ତି ମହମ୍ମଦ ଅସଘର ଖାନ, ଯିଏକି ୨୦୧୬ ନାଗ୍ରୋଟା ସେନା କ୍ୟାମ୍ପ ଆକ୍ରମଣର ମୁଖ୍ୟ ସୂତ୍ରଧର ଥିଲା, ତାହା ସହ ହାଫିଜ୍ ଅବଦୁଲ ଶକୁର ଓ ଅବଦୁଲ୍ଲା ଜେହାଦୀକୁ ମଧ୍ୟ ଏଥିରେ ଅନ୍ତର୍ଭୁକ୍ତ କରାଯାଇଛି।
‘Terrorists’ : ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କଲା ଭାରତ: ଲସ୍କର ଏବଂ ଜୈସର ୨୩ ସଦସ୍ୟ ଆତଙ୍କବାଦୀ ଘୋଷିତ
ମହମ୍ମଦ ମୁସାଦିକ୍ ନାମକ ଜଣେ ଆତଙ୍କବାଦୀ ଡ୍ରୋନ୍ ଯୋଗେ ଅସ୍ତ୍ରଶସ୍ତ୍ର ପଠାଇବା ସହ ଅଯୋଧ୍ୟାର ରାମ ଜନ୍ମଭୂମି କମ୍ପ୍ଲେକ୍ସ, ନାଗପୁରର ଆରଏସଏସ ମୁଖ୍ୟାଳୟ ଏବଂ ପାନିପଥର ଆଇଓସିଏଲ୍ ରିଫାଇନାରୀ ଭଳି ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକର ସୂଚନା ସଂଗ୍ରହ କରୁଥିଲା। ଏହି ତାଲିକାରେ ବେଙ୍ଗାଲୁରୁର ମହମ୍ମଦ ଶାହିଦ୍ ଫୈସଲର ନାମ ମଧ୍ୟ ଅଛି, ଯିଏ ବର୍ତ୍ତମାନ ରାୱଲପିଣ୍ଡିରେ ରହି ଅଲକାଏଦା ଏବଂ ‘ଆଇଏସଆଇଏସ୍’ ମଡ୍ୟୁଲ୍ ସହ ମିଶି ଅନଲାଇନ୍ ମାଧ୍ୟମରେ ଭାରତୀୟ ଯୁବକମାନଙ୍କୁ ବିପଥଗାମୀ କରୁଥିଲା। ୨୦୧୯ ମସିହାରେ ୟୁଏପିଏ ଆଇନରେ ହୋଇଥିବା ସଂଶୋଧନ ଯୋଗୁଁ କେନ୍ଦ୍ର ସରକାରଙ୍କୁ କେବଳ ସଂଗଠନ ନୁହେଁ, ବରଂ ଜଣେ ବ୍ୟକ୍ତିବିଶେଷଙ୍କୁ ମଧ୍ୟ ଆତଙ୍କବାଦୀ ଘୋଷଣା କରିବାର ଅଧିକାର ମିଳିଛି।
