1 hour ago
2
ARTICLE AD BOX
ସୁନ୍ଦରଗଡ଼: ଆଦିବାସୀ ଅଧ୍ୟୁଷିତ ସୁନ୍ଦରଗଡ଼ ଜିଲ୍ଲା ରାଜ୍ୟ ରାଜକୋଷକୁ ସର୍ବାଧିକ ରାଜସ୍ୱ ପ୍ରଦାନ କରୁଛି। କିନ୍ତୁ ବିକାଶ କ୍ଷେତ୍ରରେ ସୁନ୍ଦରଗଡ଼ର ଅଗ୍ରଗତି ଆଶାନୁରୂପ ହେଉନି। ଜିଲ୍ଲାରେ ଶିକ୍ଷା, ସ୍ୱାସ୍ଥ୍ୟ, ଗମନାଗମନ, ବିସ୍ଥାପନ ସମସ୍ୟା, ଭିତ୍ତିଭୂମି ବିକାଶ ଆଦି ପ୍ରସଙ୍ଗରେ ପ୍ରଶାସନ ଓ ସରକାରଙ୍କ ନିକଟରେ ଦୃଢ଼ ଦାବି ଉପସ୍ଥାପନ କରିବାର ସମୟ ଆସିଛି। ନିଜ ଅଧିକାର ପାଇଁ ଜାଗ୍ରତ ହୁଅନ୍ତୁ। ଯେପର୍ଯ୍ୟନ୍ତ ଜିଲ୍ଲାବାସୀ ନିଜ ହକ୍ ପାଇଁ ଲଢ଼େଇ କରିବେନି, ସେ ଯାଏଁ କୌଣସି ପରିବର୍ତ୍ତନ ଆସିବ ନାହିଁ। ‘ସମ୍ବାଦ-କନକ ନ୍ୟୁଜ୍’ ପକ୍ଷରୁ ସୁନ୍ଦରଗଡ଼ ମାଦ୍ରି କାଲୋ ଭବନରେ ଆୟୋଜିତ ‘ସୁନ୍ଦରଗଡ଼ ସାଇନିଂ ୨.୦’ରେ ଅତିଥିମାନେ ଏଭଳି ମତବ୍ୟକ୍ତ ରଖିଛନ୍ତି।
କାର୍ଯ୍ୟକ୍ରମର ମୁଖ୍ୟଅତିଥି ବିଧାନସଭା ଉପବାଚସ୍ପତି ଭବାନୀ ଶଙ୍କର ଭୋଇ କହିଲେ, ଜିଲ୍ଲାର ବିକାଶ ପାଇଁ ଏକତ୍ରିତ ହୋଇ ଲଢୁଛୁ। ଓଡ଼ିଶା ଆଦର୍ଶ ବିଦ୍ୟାଳୟ, ଏକଲବ୍ୟ ମଡେଲ ଆବାସିକ ବିଦ୍ୟାଳୟ ମାଧ୍ୟମରେ ଆଦିବାସୀ ଛାତ୍ରଛାତ୍ରୀଙ୍କୁ ଶିକ୍ଷାଦାନ କରାଯିବା ସହ ସ୍ବାସ୍ଥ୍ୟ, ଗମନାଗମନ ଆଦିର ବିକାଶ କରାଯାଉଛି। ଏସବୁ କ୍ଷେତ୍ରରେ ବହୁତ ଉନ୍ନତି ଘଟିଛି। ତେବେ ଏ ଦିଗରେ ଆମକୁ ଆହୁରି ବହୁତ କିଛି କରିବାକୁ ହେବ। ଆଗାମୀ ଦିନରେ ବିକାଶ ଶିଖର ଛୁଇଁବ। ଆଦିବାସୀଙ୍କ ସବୁ ସ୍ବପ୍ନ ପୂରଣ ହେବ। ‘ସମ୍ବାଦ ଓ କନକ ନ୍ୟୁଜ୍’ର ଏଭଳି କାର୍ଯ୍ୟକ୍ରମ ସୁନ୍ଦରଗଡ଼ର ବିକାଶରେ ସହାୟକ ହେବ ବୋଲି ଶ୍ରୀ ଭୋଇ କହିଥିଲେ। ସମ୍ମାନିତ ଅତିଥି ସୁନ୍ଦରଗଡ଼ ସ୍ବତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷ ସନ୍ତୋଷ ଅମାତ କହିଲେ, ପ୍ରକୃତରେ ସାମାଜିକ ନେତୃତ୍ବର ଆବଶ୍ୟକତା ରହିଛି। ଜନସାଧାରଣ ନିଜର ଦାବି ଉପସ୍ଥାପନ କରିପାରୁନାହାନ୍ତି। ଆମକୁ ଛୋଟଛୋଟ ଆକାଂକ୍ଷା ପରିବର୍ତ୍ତେ ବଡ଼ବଡ଼ ଆବଶ୍ୟକତା ପାଇଁ ସ୍ବର ଉତ୍ତୋଳନ କରିବାକୁ ପଡ଼ିବ। ଆମେ କେଉଁ ବିକାଶ ଚାହୁଁଛୁ, ମାନସିକ ନା ଭିତ୍ତିଭୂମି? ଏବେ ବି ବହୁ ସମସ୍ୟାର ସମାଧାନ ହୋଇପାରୁନି। ବିକାଶକୁ ତ୍ବରିତ କରିବାକୁ ହେଲେ ଅମଲାତନ୍ତ୍ରକୁ ଉତ୍ତରଦାୟୀ ହେବାକୁ ପଡ଼ିବ।
ଆଦିବାସୀଙ୍କ ସବୁ ସ୍ବପ୍ନ ପୂରଣ ହେବ: ଉପବାଚସ୍ପତି
ବିକାଶ ପାଇଁ ଅମଲାତନ୍ତ୍ରକୁ ଉତ୍ତରଦାୟୀ ହେବାକୁ ପଡ଼ିବ: ସନ୍ତୋଷ ଅମାତ
ଅଧ୍ୟକ୍ଷତା ସମ୍ଭାଷଣରେ ଇଷ୍ଟର୍ଣ୍ଣ ମିଡିଆ ଲିମିଟେଡର ନିର୍ଦ୍ଦେଶିକା ମୋନିକା ନୈୟାର ପଟ୍ଟନାୟକ କହିଲେ, ଏଭଳି କାର୍ଯ୍ୟକ୍ରମ ଜରିଆରେ ଆମେ ଆପଣଙ୍କଠାରୁ ନୂତନ ଚିନ୍ତାଧାରା ଓ ମୂଲ୍ୟବାନ ପରାମର୍ଶ ଲାଭ କରୁଛୁ। ଆପଣମାନଙ୍କ ପାଇଁ ସର୍ବଦା ‘ସମ୍ବାଦ’, ‘କନକ ନ୍ୟୁଜ୍’, ‘ରେଡିଓ ଚକୋଲେଟ୍’ କାର୍ଯ୍ୟରତ। ‘ପୁନଶ୍ଚ ପୃଥିବୀ’ ମାଧ୍ୟମରେ ପରିବେଶ ସୁରକ୍ଷା ପାଇଁ ଆମେ ପ୍ରୟାସରତ। ଆପଣମାନଙ୍କ ଏଭଳି ସହଯୋଗ, ଅକୁଣ୍ଠ ସମର୍ଥନ ଆମକୁ ଆମର ଦାୟିତ୍ବ ନିର୍ବାହ କରିବାରେ ପ୍ରେରଣା ଦେବ। ‘ସମ୍ବାଦ-କନକ ନ୍ୟୁଜ୍’ର ବାର୍ତ୍ତା ସମ୍ପାଦକ ଭବାନୀ ଶଙ୍କର ତ୍ରିପାଠୀ କହିଲେ, ଧନୀ ମାଟି ସୁନ୍ଦରଗଡ଼ରେ ଅନେକ ଗରିବ ଅଛନ୍ତି, ସେମାନଙ୍କୁ ବି ବିକାଶର ମୁଖ୍ୟସ୍ରୋତରେ ସାମିଲ କରିବାକୁ ହେବ। ଦ୍ବିତୀୟ ଜାଲିଆନାୱାଗ ଭାବେ ବିବେଚିତ ଆମ୍କୋ-ସିମ୍କୋରେ ପ୍ରାଣବଳୀ ଦେଇଥିବା ବୀରମାନଙ୍କୁ ସହିଦ ଘୋଷଣା କରିବାକୁ ଆଉ କେତେ ଦିନ ଅପେକ୍ଷା କରିବାକୁ ପଡ଼ିବ? ବିକାଶ ନାଁରେ ବିସ୍ଥାପନ କରାଯାଉଛି। ତେବେ ବିସ୍ଥାପନ ଯନ୍ତ୍ରଣାସିକ୍ତ ନ ହୋଇ ଯନ୍ତ୍ରଣାମୁକ୍ତ ହେଉ। ବାସ୍ତବରେ ପରିପୂର୍ଣ୍ଣ ବିକାଶ ପାଇଁ ଯୋଜନାବଦ୍ଧ କାର୍ଯ୍ୟଶୈଳୀ ଦରକାର।
Rajasthan: ମରୁଡ଼ି ପ୍ରଭାବିତ ଅଞ୍ଚଳ ପାଇଁ ଭଜନଲାଲଙ୍କ ୯୩୨୧ କୋଟିର ପ୍ୟାକେଜ୍ ଘୋଷଣା
‘ସମ୍ବାଦ’ ରାଉରକେଲା ସଂସ୍କରଣ ମୁଖ୍ୟ ଲକ୍ଷ୍ମୀନାରାୟଣ ହୋତା ସ୍ବାଗତ ଭାଷଣ ଦେଇଥିଲେ। ଏହି ଅବସରରେ ସକାଳେ ଏକ ବିଶାଳ ଶୋଭାଯାତ୍ରା ସ୍ଥାନୀୟ ସମଲେଶ୍ବରୀ ମନ୍ଦିରରୁ ବାହାରି ସହର ପରିକ୍ରମା ପରେ ମାଦ୍ରି କାଲୋ ଭବନରେ ପହଞ୍ଚିଥିଲା। ଏଥିରେ ଜିଲ୍ଲାର ବିଭିନ୍ନ ପ୍ରାନ୍ତରୁ ଆସିଥିବା ଆଦିବାସୀ ସାଂସ୍କୃତିକ ଦଳ ନିଜର ପାରମ୍ପରିକ ପୋଷାକ, ଅସ୍ତ୍ରଶସ୍ତ୍ର ଧରି ଶୋଭାଯାତ୍ରାରେ ସାମିଲ ହୋଇଥିଲେ। ସେଣ୍ଟ ଟେରେସା ଇଂରାଜୀ ମାଧ୍ୟମ ବିଦ୍ୟାଳୟର ଛାତ୍ରଛାତ୍ରୀ ସ୍ବାଗତ ସଙ୍ଗୀତ ପରିବେଷଣ କରିଥିଲେ। ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ସୁଦର୍ଶନ ତାଜନ (ସଂସ୍କୃତି), ପ୍ରଭାତ ଭୋଳ (କ୍ରୀଡ଼ା), ଡ. ଦିବ୍ୟଲୋଚନ ନାଏକ (ସେବା), ଆନ୍ନା କୁଜୁର (ପରିବେଶ), ସଞ୍ଜୟ ନନ୍ଦ (ସମାଜସେବା), ଡ. ସୁପ୍ରିୟା ପାଲ (ସାହିତ୍ୟ) ପ୍ରମୁଖଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏତଦ୍ବ୍ୟତୀତ ଆଦିବାସୀ ପରିଧାନକୁ ନେଇ ଅନୁଷ୍ଠିତ ଫ୍ୟାସନ୍ ସୋ’ର କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ପରେ ଦୁଇଟି ପୃଥକ୍ ଅଧିବେଶନରେ ‘ମାଟି ତଳେ ପ୍ରାଚୁର୍ଯ୍ୟ, ଉପରେ ଭୋକ’, ‘ସମ୍ଭାବନା ଓ ପ୍ରତିଶ୍ରୁତିର ସୁନ୍ଦରଗଡ଼’ ଉପରେ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଏଥିରେ ବଣାଇଁ ବିଧାୟକ ଲକ୍ଷ୍ମଣ ମୁଣ୍ଡା, ବରିଷ୍ଠ ଆଇନଜୀବୀ ନିମାଇଁ ନାଏକ, ଆଦିବାସୀ ନେତା ରାଜେନ୍ଦ୍ର ନାଏକ, ଅବସରପ୍ରାପ୍ତ ଜିଲ୍ଲାପାଳ ବିମଳେନ୍ଦୁ ରାଏ, ସୁନ୍ଦରଗଡ଼ ବିଧାୟକ ଯୋଗେଶ ସିଂହ, ପୂର୍ବତନ ବିଧାୟିକା କୁସୁମ ଟେଟେ, ବରିଷ୍ଠ ଆଇନଜୀବୀ ଅଶୋକ ଦାଶ ପ୍ରମୁଖ ଯୋଗ ଦେଇଥିଲେ। ‘କନକ ନ୍ୟୁଜ୍’ର ଆସୋସିଏଟ୍ ନ୍ୟୁଜ୍ ପ୍ରଡ୍ୟୁସର ସ୍ବସ୍ତିକା ପଣ୍ଡା ଓ ବ୍ୟୁରୋ ଚିଫ୍ ଦେବାଶିଷ କବି କାର୍ଯ୍ୟକ୍ରମ ପରିଚାଳନା କରିଥିଲେ। ଡିଜିଏମ୍ ମାର୍କେଟିଂ ସୁଶାନ୍ତ କୁମାର ମହାପାତ୍ରଙ୍କ ସମେତ ‘ସମ୍ବାଦ-କନକ ନ୍ୟୁଜ୍’ ରାଉରକେଲା ସଂସ୍କରଣର ସମସ୍ତ କର୍ମଚାରୀ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ‘ସମ୍ବାଦ’ ଜିଲ୍ଲା ପ୍ରତିନିଧି ଡମ୍ବରୁଧର ନାୟକ ଧନ୍ୟବାଦ ଦେଇଥିଲେ।
