1 hour ago
1
ARTICLE AD BOX
ଭୁବନେଶ୍ବର: ଛାତ୍ର ସଂସଦ ନିର୍ବାଚନକୁ ନେଇ ଆଜି ରାଜଧାନୀ ଉଠୁଛି ପଡ଼ୁଛି। ବିଶେଷକରି ରାଜ୍ୟର ଦୁଇ ପ୍ରମୁଖ ଶିକ୍ଷାନୁଷ୍ଠାନ ଯଥା ରମାଦେବୀ ମହିଳା ବିଶ୍ବବିଦ୍ୟାଳୟ ଓ ଉତ୍କଳ ବିଶ୍ବବିଦ୍ୟାଳୟରେ ଛାତ୍ର ସଙ୍ଗଠନଗୁଡ଼ିକ ମଧ୍ୟରେ ଗଣ୍ଡଗୋଳ ଶୀର୍ଷରେ ପହଞ୍ଚିଥିବାରୁ ଭୟଙ୍କର ପରିସ୍ଥିତି ଉପୁଜିଛି। କେଉଁଠି ଭୋଟ ଗଣତି ଅଧାରୁ ବନ୍ଦ ହୋଇଛି ତ ଆଉ କେଉଁଠି ଜାତୀୟ ରାଜପଥ ରୋକ। ଏପରିକି ବିଶ୍ବବିଦ୍ୟାଳୟ ଛାତ୍ରୀ ତଥା ବିସିଜେଡି ସଭାପତି ଇସ୍ପିତା ସାହୁଙ୍କୁ କ୍ୟାମ୍ପସରୁ ପୁଲିସ ଉଠାଇନେବା ଏବଂ ବିଜେଡିର ଏକ ପ୍ରତିନିଧି ଦଳ ପୁଲିସ କମିସନରଙ୍କୁ ଭେଟିବା ଚର୍ଚ୍ଚାର ବିଷୟ ପାଲଟିଛି। ସନ୍ଧ୍ୟା ସୁଦ୍ଧା ଇସ୍ପିତାଙ୍କୁ ପୁଲିସ ଛାଡ଼ିଥିଲେ ମଧ୍ୟ ବିଶ୍ବବିଦ୍ୟାଳୟ କ୍ୟାମ୍ପସରେ ଉତ୍ତେଜନା ଲାଗିରହିବା ପୁଲିସ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। କେବଳ ସେତିକି ନୁହେଁ, ଉତ୍କଳ ବିଶ୍ବବିଦ୍ୟାଳୟରେ ଭୋଟ ଗଣତିରେ ବିଳମ୍ବକୁ ନେଇ ରାତିରେ ଛାତ୍ର କଂଗ୍ରେସର ସଦସ୍ୟମାନେ ଜାତୀୟ ରାଜପଥ ଅବରୋଧ କରିବା ରାଜ୍ୟ ରାଜନୀତିକୁ ଉଷ୍ମ କରିଛି।
ରମାଦେବୀ ମହିଳା ବିଶ୍ବବିଦ୍ୟାଳୟରେ ସକାଳ ୭ଟାଠାରୁ ହିଁ ଉତ୍ତେଜନା ଲାଗିରହିଥିଲା। ଏବିଭିପି ସମର୍ଥିତ କେତେଜଣ ଛାତ୍ରୀ ହଷ୍ଟେଲ ପ୍ରବେଶ କରି ଛାତ୍ରୀଙ୍କୁ ଭୋଟ ଦେବାକୁ ପ୍ରବର୍ତ୍ତାଉ ଥିବାରୁ ବିସିଜେଡି ସଭାପତି ତଥା ଛାତ୍ରୀ ଇସ୍ପିତା ସାହୁ ଏହାର ପ୍ରତିବାଦ କରିଥିଲେ। ହଷ୍ଟେଲରେ ପ୍ରବେଶ କରିଥିବା ଛାତ୍ରୀମାନଙ୍କୁ ପଦାକୁ ବାହାର କରିବା ପରେ ଉତ୍ତେଜନା ପରିସ୍ଥିତି ଉପୁଜିଥିଲା। ଏହାର କିଛି ସମୟ ପରେ କ୍ୟାମ୍ପସ ସମ୍ମୁଖରେ ବିସିଜେଡି ଛାତ୍ରୀମାନେ ଗୋଲପ ଫୁଲ ଓ ଶ୍ରୀମନ୍ଦିର ଖଜା ବଣ୍ଟନ କରୁଥିବାରୁ ତାହାକୁ ନେଇ ଉଭୟ ଗୋଷ୍ଠୀ ମୁହାଁମୁହିଁ ହୋଇଥିଲେ। ଘଟଣା ସ୍ଥଳରେ ପୁଲିସ ପହଞ୍ଚି ଉଭୟଙ୍କୁ ଫାଟକ ସମ୍ମୁଖରୁ ଘଉଡ଼ାଇଥିଲା। ତା’ପରେ ବି ଉତ୍ତେଜନା ଥମି ନ ଥିଲା। କ୍ୟାମ୍ପସ ଭିତରେ ଛାତ୍ରୀ ଭୋଟ ଦେଉଥିବା ବେଳେ ବାହାରେ ଉଭୟ ସଙ୍ଗଠନର ଛାତ୍ରୀମାନେ କଥା କଟାକଟି ହୋଇଥିଲେ।
ରମାଦେବୀରେ ଏବିଭିପି-ବିସିଜେଡି ହାତାହାତି, ଭଙ୍ଗାରୁଜା
ବିସିଜେଡି ରାଜ୍ୟ ସଭାପତିଙ୍କୁ ଉଠାଇନେଲା ପୁଲିସ
ସିପିଙ୍କୁ ଭେଟିଲା ବିଜେଡି, ୪ ଘଣ୍ଟା ପରେ ଛାଡ଼ିଲା
ଉତ୍କଳ ବିଶ୍ବବିଦ୍ୟାଳୟରେ ଛାତ୍ର କଂଗ୍ରେସର ରାସ୍ତାରୋକ
ଅପରାହ୍ଣ ପ୍ରାୟ ୧ଟା ବେଳକୁ କମିସନରେଟ୍ ପୁଲିସର ଅଧିକାରୀମାନେ ପହଞ୍ଚି ବିସିଜେଡି ସଭାପତି ଶ୍ରୀମତୀ ସାହୁଙ୍କୁ ଉଠାଇ ନେଇଥିଲେ। କ’ଣ ପାଇଁ ଉଠାଇ ନେଲା ସେନେଇ କେହି ଉତ୍ତର ଦେଇ ନ ଦେବାରୁ ଏହାକୁ ନେଇ ଛାତ୍ରୀଙ୍କ ମଧ୍ୟରେ ଅସନ୍ତୋଷ ବଢ଼ିଥିଲା। ସେମାନେ ରାସ୍ତାକୁ ଆସି ହୋହାଲ୍ଲା କରିଥିଲେ। ଏହାର କିଛି ସମୟରେ ଭୁବନେଶ୍ବର ଜିଲ୍ଲା ବିଜେଡି ସଭାପତି ତଥା ପୂର୍ବତନ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡାଙ୍କ ନେତୃତ୍ବରେ ବିଧାୟକ ସୁଶାନ୍ତ କୁମାର ରାଉତ, ଭୁବନେଶ୍ବର ମେୟର ସୁଲୋଚନା ଦାସ ପ୍ରମୁଖ ପୁଲିସ କମିସନରଙ୍କୁ ସାକ୍ଷାତ କରି ଇସ୍ପିତାଙ୍କୁ ତୁରନ୍ତ ଛାଡ଼ିବାକୁ ଦାବି କରିଥିଲେ। ଅପରାହ୍ଣ ୫ଟାରେ ଇସ୍ପିତାକୁ ପୁଲିସ ଛାଡ଼ିଥିଲେ ମଧ୍ୟ କ୍ୟାମ୍ପସ ନିକଟକୁ ଆସିବାକୁ ବାରଣ କରିଥିଲା। ତେବେ ଭୋଟ ଗଣତିରେ ବିଳମ୍ବ ହେଉଥିବାରୁ ସନ୍ଧ୍ୟାଠାରୁ କ୍ୟାମ୍ପସରେ ଉତ୍ତେଜନା ମୂଳକ ପରିସ୍ଥିତି ଲାଗିରହିଛି। ବିସିଜେଡି ଓ ଏବିଭିପି ଛାତ୍ରୀ କ୍ୟାମ୍ପସ ସମ୍ମୁଖରେ ହାତାହାତି ହୋଇଛନ୍ତି। ଏବିଭିପି ସମର୍ଥକମାନେ ଗାଡ଼ି ଭଙ୍ଗାରୁଜା କରିଥିବା ନଜରକୁ ଆସିଛି।
Rajasthan: ମରୁଡ଼ି ପ୍ରଭାବିତ ଅଞ୍ଚଳ ପାଇଁ ଭଜନଲାଲଙ୍କ ୯୩୨୧ କୋଟିର ପ୍ୟାକେଜ୍ ଘୋଷଣା
ଅନୁରୂପ ଭାବେ ଦିନତମାମ ଶାନ୍ତିଶୃଙ୍ଖଳାର ସହ ଉତ୍କଳ ବିଶ୍ବବିଦ୍ୟାଳୟରେ ରେକର୍ଡ ସଂଖ୍ୟକ ମତଦାନ ହୋଇଥିଲେ ମଧ୍ୟ ଭୋଟ ଗଣତିକୁ ନେଇ ସମସ୍ୟା ଉପୁଜିଥିଲା। ୨୬୦୯ଜଣ ଛାତ୍ରଛାତ୍ରୀ ମତାଧିକାର ସାବ୍ୟସ୍ତ କରିଥିଲେ ମଧ୍ୟ ଗଣନାରେ ବହୁତ ବିଳମ୍ବ ହୋଇଥିଲା। ରାତି ପ୍ରାୟ ୧୦ଟା ପର୍ଯ୍ୟନ୍ତ ଗଣତି ସରି ନ ଥିବାରୁ ଛାତ୍ର କଂଗ୍ରେସ ଓ ଏଆଇଏସ୍ଏଫ୍ ସମର୍ଥକମାନେ ରାସ୍ତାକୁ ଓହ୍ଲାଇଥିଲେ। କ୍ୟାମ୍ପସ ସମ୍ମୁଖ ଜାତୀୟ ରାଜପଥ ଅବରୋଧ କରିବା ସହ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କ ବିରୋଧରେ ନାରାବାଜି ଦେଇଥିଲେ। ଗଣତିର ସ୍ବଚ୍ଛତାକୁ ନେଇ ପ୍ରଶ୍ନ ଉଠାଇବା ପରେ ପୁଲିସ ପହଞ୍ଚି ବୁଝାସୁଝା କରିବା ପରେ ସେମାନେ ରାସ୍ତାରୁ ହଟିଛନ୍ତି। ତେବେ ରିପୋର୍ଟ ଲେଖାଯିବା ବେଳକୁ ଛାତ୍ର କଂଗ୍ରେସ ଓ ଏଆଇଏସ୍ଏଫ୍ର ସଦସ୍ୟମାନେ ମତଦାନ କେନ୍ଦ୍ର ନିକଟରେ ରହିଥିବା ଜଣାପଡ଼ିଛି।
