1 month ago
10
ARTICLE AD BOX
କାଠମାଣ୍ଡୁ:ନେପାଳରେ ଆସିଥିବା ମହା ଜଳପ୍ରଳୟରେ ମୃତ୍ୟୁ ସଂଖ୍ୟା ଲଗାତାର ବୃଦ୍ଧି ପାଉଛି। ୩,୦୦୦ ରୁ ଅଧିକ ଲୋକ ଏପର୍ଯ୍ୟନ୍ତ ନିଖୋଜ ଅଛନ୍ତି। ବନ୍ୟା ସମ୍ପର୍କରେ ତଥ୍ୟ ଆଦାନପ୍ରଦାନକୁ ନେଇ ଚୀନ୍ ଏବଂ ନେପାଳ ମଧ୍ୟରେ ମତଭେଦ ରହିଛି। ମେ’ ମାସରେ, ପ୍ରାକୃତିକ ବିପର୍ଯ୍ୟୟର ବିପଦକୁ ମୁକାବିଲା କରିବା ପାଇଁ ନେପାଳୀ ଏବଂ ଚୀନ ଅଧିକାରୀଙ୍କ ମଧ୍ୟରେ ନେପାଳର ରାଜଧାନୀ କାଠମାଣ୍ଡୁରେ ଏକ ବୈଠକ ଅନୁଷ୍ଠିତ ହୋଇଥିଲା। ତିନି ମାସ ପରେ, ଅଗଷ୍ଟ ୨୬ ତାରିଖରେ, ନେପାଳ-ତିବ୍ଦତ ସୀମାରେ ଏକ ହିମବାହ ଭାଙ୍ଗିବା ଯୋଗୁଁ ଜଳପ୍ରଳୟ ସୃଷ୍ଟି ହୋଇଥିଲା।ଏହି ଦୁଃଖଦ ଘଟଣା ପରେ, ଦୁଇ ଦେଶ ମଧ୍ୟରେ ବିପର୍ଯ୍ୟୟ ସମ୍ବନ୍ଧୀୟ ସୂଚନା ଆଦାନପ୍ରଦାନ ଉପରେ ପ୍ରଶ୍ନ ଉଠାଯାଉଛି। ନେପାଳ ସମ୍ପୂର୍ଣ୍ଣ ସୂଚନା ପାଇ ନଥିବା ଅଭିଯୋଗ କରୁଥିବା ବେଳେ, ଚୀନ ସମୟ ମଧ୍ୟରେ ସବୁକିଛି ସୂଚନା ପ୍ରଦାନ କରିଥିବା ଦାବି କରୁଛି।
ଆଶା କରିଥିବା ସୂଚନା ପାଇନଥିଲୁ
ନେପାଳ କହିଛି ଯେ, ଆମେ ଚୀନଠାରୁ ହିମବାହ ଗତି, ନଦୀର ସ୍ତର ଏବଂ ପ୍ରବଳ ବର୍ଷା ସମ୍ପର୍କରେ ଗୁରୁତ୍ୱପୂର୍ଣ୍ଣ ତଥ୍ୟ ମାଗିଥିଲୁ ​​ଯାହା ଦ୍ଵାରା ଆମେ ସମୟ ମଧ୍ୟରେ ପ୍ରସ୍ତୁତି କରିପାରିବୁ। ତେବେ ଆମେ ଆଶା କରିଥିବା ସୂଚନା ପାଇନଥିଲୁ। ନେପାଳର ଜଳବିଜ୍ଞାନ ବିଭାଗ କହିଛି ଯେ, ଚୀନ କେବଳ ପ୍ରବଳ ବର୍ଷା ପାଇଁ ପୂର୍ବାନୁମାନ ପଠାଏ, ଯେତେବେଳେ ନେପାଳ ଜୀବନ ରକ୍ଷା ପାଇଁ ହିମବାହ ଭାଙ୍ଗିବା, ଭୂସ୍ଖଳନ ଏବଂ ଜଳସ୍ତର ବିଷୟରେ ପ୍ରତି ୧୦-ମିନିଟ୍ର ସଠିକ୍ ସୂଚନା ଆବଶ୍ୟକ କରୁଥିଲା। ନେପାଳ ଏବେ ଭାରତ ପରି ଚୀନ ସହିତ ସମାନ ଚୁକ୍ତି କରିବାକୁ ଚାହୁଁଛି, ଯାହା ଅନ୍ତର୍ଗତ ନଦୀ ଏବଂ ପାଣିପାଗ ସମ୍ପର୍କିତ ତଥ୍ୟ ନିରନ୍ତର ଆଦାନ ପ୍ରଦାନ କରାଯାଇଥାଏ।
ନେପାଳର ଅଭିଯୋଗକୁ ଚୀନ ଖଣ୍ଡନ କରି କହିଛି ଯେ, ଆମେ ସମୟ ମଧ୍ୟରେ ଜରୁରୀ ସୂଚନା ପ୍ରଦାନ କରିଛୁ। ଚୀନ୍ ଦୂତାବାସ ଅନୁଯାୟୀ ହିମାଳୟ ସୀମାନ୍ତ ଅଞ୍ଚଳ ଅତ୍ୟନ୍ତ ଦୁର୍ଗମ, ସେଠାରେ ନଜର ରଖିବା ଏକ ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜ ମଧ୍ୟ। ଚୀନ କହିଛି ଯେ, ଆମର ପାଣିପାଗ କେନ୍ଦ୍ର ବିପର୍ଯ୍ୟୟର ୧୨ ଦିନ ପୂର୍ବରୁ ନେପାଳକୁ ଏକ ଇମେଲ୍ ପଠାଇଥିଲା। ଯେଉଁଥିରେ ପ୍ରବଳ ବର୍ଷା ଏବଂ ଭୂସ୍ଖଳନ ଭଳି ସମ୍ଭାବ୍ୟ ବିପର୍ଯ୍ୟୟ ବିଷୟରେ ସତର୍କ କରାଯାଇଥିଲା।
