52 minutes ago
1
ARTICLE AD BOX
ଚନ୍ଦ୍ରଶେଖରପୁର: ବିଟେକ୍ ପାସ୍ କରିବା ପରେ ଇନ୍ଫୋସିଟି ଅଞ୍ଚଳରେ ଥିବା ଏକ ଆଇଟି କମ୍ପାନିରେ ଇଞ୍ଜିନିୟର୍ ଭାବେ ନିଯୁକ୍ତି ପାଇଥିଲେ। କିନ୍ତୁ ଅଧିକ ଉପାର୍ଜନ କରିବାକୁ ଅନ୍ଲାଇନ୍ରେ ଜୁଆ ଖେଳିବା ଆରମ୍ଭ କରିଦେଇଥିଲେ। କିନ୍ତୁ ଅଧିକ ଉପାର୍ଜନ କରିବା ବଦଳରେ ୩୦ ଲକ୍ଷ ଟଙ୍କା ହରାଇଲେ। ଏହି କ୍ଷତି ଭରଣା କରିବା ପାଇଁ ତାଙ୍କ ମୁଣ୍ଡରେ ମନ୍ଦ ବୁଦ୍ଧି ଢୁକିଲା। ତାଙ୍କ ଭଳି ବେଟିଂରେ ଲକ୍ଷଲକ୍ଷ ଟଙ୍କା ହରାଇଥିବା କର୍ଣ୍ଣାଟକର ଦୁଇ ଯୁବକଙ୍କୁ ସାଙ୍ଗ କରି ଭୁବନେଶ୍ବରରେ ଗହଣା ଦୋକାନ ଲୁଟ୍ କରିବାକୁ ଯୋଜନା କଲେ। ମାତ୍ର ଲୁଟ୍ ଉଦ୍ୟମ ବିଫଳ ହେଲା ଏବଂ ପୁଲିସ ହାତରେ ଧରାପଡ଼ିଗଲେ। ଏମିତି ଏକ ମାମଲାରେ ଆଜି ଚନ୍ଦ୍ରଶେଖରପୁର ଥାନା ପୁଲିସ ୨ଜଣଙ୍କୁ କୋର୍ଟ ଚାଲାଣ କରିଛି। ସେମାନେ ହେଲେ ମଞ୍ଚେଶ୍ବର ମଞ୍ଚନାଥବିହାରରେ ରହୁଥିବା ପ୍ରେମାନନ୍ଦଙ୍କ ଘର କଟକ ବାଙ୍କୀ କୁସୁପାଙ୍ଗୀ ଗାଁର ଇଞ୍ଜିନିୟର୍ ପ୍ରେମାନନ୍ଦ ସାମଲ(୩୦) ଓ କର୍ଣ୍ଣାଟକର ଆସ୍ପାକ୍ ନାୟକୋଡ଼ି(୨୩)। କର୍ଣ୍ଣାଟକରୁ ଆସିଥିବା ଅନ୍ୟ ଜଣେ ଫେରାର ହୋଇଯାଇଛି। ପୁଲିସ ସେମାନଙ୍କ ନିକଟରୁ ଏକ ନକଲି ପିସ୍ତଲ ଓ ଚାପଡ଼ ଜବତ କରିଛି। ସେମାନଙ୍କୁ ରିମାଣ୍ଡରେ ଆଣିବାକୁ ପୁଲିସ କୋର୍ଟରେ ଆବେଦନ କରିଛି।
ନକଲି ବନ୍ଧୁକ, ଚାପଡ଼ ଜବତ
ବେଟିଂରେ ହରେଇଥିଲେ ୩୦ ଲକ୍ଷ
ଗତ ମାସ ୨୮ ତାରିଖର ଘଟଣା। ପୂର୍ବାହ୍ଣ ପ୍ରାୟ ସାଢ଼େ ୧୧ଟା ବେଳେ ଚନ୍ଦ୍ରଶେଖରପୁର ହାଉସିଂବୋର୍ଡ କଲୋନିରେ ଥିବା ଏକ ଗହଣା ଦୋକାନରେ ୩ଜଣ ମୁଖାପିନ୍ଧା ଦୁର୍ବୃତ୍ତ ପଶିଯାଇଥିଲେ। ସେତେବେଳେ ଗହଣା ଦୋକାନର ମାଲିକ ନଥିଲେ। କେବଳ ୨ଜଣ ମହିଳା କର୍ମଚାରୀ ଥିଲେ। ମାଲିକ ଆସିନଥିବାରୁ ଲକର୍ ଖୋଲା ହୋଇନଥିଲା। ତେଣୁ ଗହଣାତକ ଥାକକୁ ଆସିନଥିଲା। ଦୁର୍ବୃତ୍ତମାନେ ମହିଳା କର୍ମଚାରୀଙ୍କ ମୁଣ୍ଡରେ ପିସ୍ତଲ ଲଗାଇ ଲକର୍ ଚାବି ମାଗିଥିଲେ। ଚାବି ନଦେଲେ ହାଣି ଦେବ ବୋଲି ଚାପଡ଼ ଧରିଥିବା ଦୁର୍ବୃତ୍ତ ଧମକ ଦେଇଥିଲା। ମାତ୍ର ପାଖରେ ଚାବି ନଥିବାରୁ ମହିଳା କର୍ମଚାରୀଦ୍ବୟ ହାତ ଟେକିଦେଇଥିଲେ। ଏମିତିରେ ପ୍ରାୟ ୧୫/୨୦ ମିନିଟ୍ ବିତିବା ପରେ ଦୁର୍ବୃତ୍ତମାନେ ହତାଶ ହୋଇ ଫେରି ପଳାଇଥିଲେ। ଖବର ପାଇ ଦୋକାନ ମାଲିକ ଆସିଲେ ଏବଂ ତୁରନ୍ତ ଚନ୍ଦ୍ରଶେଖରପୁର ଥାନା ପୁଲିସକୁ ଜଣାଇଥିଲେ। ପୁଲିସ ଦୋକାନ ଓ ଆଖପାଖ ରାସ୍ତାରେ ଲାଗିଥିବା ସିସିଟିଭି ଯାଞ୍ଚ କରିକରି ଲୁମ୍ବିନୀବିହାରସ୍ଥିତ ହୋଟେଲ ‘ରୟାଲ୍ ଚେତନ ଇନ୍’ରେ ପହଞ୍ଚି ଯାଇଥିଲା। ସେତେବେଳକୁ ଦୁର୍ବୃତ୍ତମାନେ ହୋଟେଲ ଛାଡ଼ି ସାରିଥିଲେ ହେଁ ପୁଲିସ ହୋଟେଲ ରେକର୍ଡ ଯାଞ୍ଚ କରି ପ୍ରେମାନନ୍ଦ ଓ ଅନ୍ୟ ଦୁଇଜଣଙ୍କ ପରିଚୟ ପାଇଥିଲା। କମିସନରେଟ୍ ପୁଲିସ ପ୍ରେମାନନ୍ଦକୁ କଟକ, ଭୁବନେଶ୍ବରରେ ଖୋଜୁଥିବା ବେଳେ ଏକ ସ୍ବତନ୍ତ୍ର ଟିମ୍ ବେଙ୍ଗାଲୁରୁ ଯାଇ ଚଢ଼ଉ କରିଥିଲା। ଗତ ୧୩ ତାରିଖ ରାତିରେ ପ୍ରେମାନନ୍ଦ ଓ ଆସ୍ପାକ୍ ଭୁବନେଶ୍ବରରେ ରେଳଷ୍ଟେସନରେ ଥିବା ଖବର ପାଇ ପୁଲିସ ଚଢ଼ଉ କରି ସେମାନଙ୍କୁ କାବୁ କରିଥିଲା। ସେମାନେ ରାଜ୍ୟ ବାହାରକୁ ପଳାଇବାକୁ ଯୋଜନା କରିଥିବା ବେଳେ ପୁଲିସ ହାବୁଡ଼ରେ ପଡ଼ିଥିଲେ। ବେଟିଂରେ ୩୦ ଲକ୍ଷ ଟଙ୍କା ହରାଇଥିବାରୁ ସେହି କ୍ଷତି ଭରଣା କରିବା ଉଦ୍ଦେଶ୍ୟରେ ପ୍ରେମାନନ୍ଦ ଏଭଳି କାଣ୍ଡ କରିବାକୁ ଯୋଜନା କରିଥିଲା ବୋଲି ମାନିଯାଇଛି। କର୍ଣ୍ଣାଟକର ଆସ୍ପାକ୍ ଓ ଅନ୍ୟଜଣକ ମଧ୍ୟ ପ୍ରେମାନନ୍ଦର ବେଟିଂ ଗ୍ରୁପ୍ରେ ଥିଲେ ଏବଂ ଲକ୍ଷାଧିକ ଟଙ୍କା ହରାଇଥିଲେ।
