1 hour ago
2
ARTICLE AD BOX
ଅନୁଗୋଳ: ଅଛୁଆଁ ବିରୋଧୀ ପଦଯାତ୍ରା ସମୟରେ ମହାତ୍ମା ଗାନ୍ଧୀ ଅନୁଗୋଳ ଆସିଥିଲେ। ଏହି ସମୟରେ ଅନେକ ସ୍ମୃତି ଏଠାରେ ଛାଡ଼ି ଯାଇଛନ୍ତି ବାପୁଜୀ। ଏହାକୁ ପର ପିଢ଼ି ପାଖରେ ପହଞ୍ଚାଇବା ପାଇଁ ଅନୁଗୋଳରେ ଏକ ଗାନ୍ଧୀ ଭବନ ସ୍ଥାପନ ପାଇଁ ଉଦ୍ୟମ ଆରମ୍ଭ ହୋଇଥିଲା। ଜାଗା ବି ଚିହ୍ନଟ ହୋଇଥିଲା। ହେଲେ ନା’ ଭବନ ନିର୍ମାଣ ହେଲା ନା ସାଇତା ହେଲା ଗାନ୍ଧୀଙ୍କ ସ୍ମୃତି।
Independence Day Live: ପଲ୍ଲୀରୁ ଦିଲ୍ଲୀ ଯାଏଁ... ଏଠାରେ ପଢ଼ନ୍ତୁ ସ୍ୱାଧୀନତା ଦିବସର ପ୍ରତିଟି ଅପ୍ଡେଟ୍
ମହାତ୍ମା ଗାନ୍ଧୀ ୧୯୩୪ ମେ’ ୬ ତାରିଖରେ ଅନୁଗୋଳ ସହର ଉପକଣ୍ଠ ରାଣୀଗୋଡ଼ାରେ ଆୟୋଜିତ ଏକ ସାଧାରଣ ସଭାରେ ଉଦ୍ବୋଧନ ଦେଇଥିଲେ। ତାଙ୍କୁ ଶୁଣିବା ପାଇଁ ଓ ପାଖରୁ ଟିକେ ଦେଖିବା ପାଇଁ ସେତେବେଳେ ହଜାର ହଜାର ଲୋକ ଏକାଠି ହୋଇଥିଲେ। ଗାନ୍ଧୀ ସେତେବେଳେ ରେଢ଼ାଖୋଲରୁ ଆସି ବାମୁର ଡାକବଙ୍ଗଳାରେ ରହିଥିଲେ। ସେଠାରେ ଗୋଟିଏ ରାତି କାଟିବା ପରେ ଅନୁଗୋଳ ସହରରେ ପହଞ୍ଚିଥିଲେ। ହୁଲୁରିସିଂହା ଛକରୁ ଆସି ସେ ସିଧା ରାଣୀଗୋଡ଼ା ଯାଇଥିଲେ। ଏଥିପାଇଁ ଏହି ରାସ୍ତାକୁ ଗାନ୍ଧୀ ମାର୍ଗ ଭାବେ ନାମିତ କରାଯାଇଛି। ଗାନ୍ଧୀଙ୍କ ସ୍ମୃତିରେ ଏକ ଗାନ୍ଧୀ ଭବନ ନିର୍ମାଣ ପାଇଁ ଯୋଜନା ହୋଇ ଅମଲାପଡ଼ାରେ ଏକ ଜାଗା ଚିହ୍ନଟ ହୋଇଥିଲା। ପୌରପାଳିକା ପକ୍ଷରୁ ଏହି ଜାଗାକୁ ସଂରକ୍ଷିତ କରି ରଖାଯିବା ସହ ଏଠାରେ ବାପୁଜୀଙ୍କ ସ୍ମାରକୀ ନିର୍ମାଣ ପାଇଁ ପ୍ରସ୍ତାବ ଦିଆଯାଇଥିଲା। ଏଠାରେ ଗାନ୍ଧୀଙ୍କ ସ୍ମୃତିରକ୍ଷା ପାଇଁ ସଂଗ୍ରହାଳୟ ସହ ଏକ ପାଠାଗାର କରିବାକୁ ଯୋଜନା କରାଯାଇଥିଲା। କିନ୍ତୁ ୨୦୧୪ ମସିହାରୁ ଜାଗା ଚିହ୍ନଟ ହୋଇଥିଲେ ସୁଦ୍ଧା ଆଜି ପର୍ଯ୍ୟନ୍ତ ଗାନ୍ଧୀଭବନ ନିର୍ମାଣ ହୋଇପାରିଲାନି। ଉଦ୍ବେଗର ବିଷୟ, ଯେଉଁ ଜାଗା ଚିହ୍ନଟ ହୋଇଥିଲା ସେଠାରେ ଏକ ଅଙ୍ଗନବାଡ଼ି କେନ୍ଦ୍ର ନିର୍ମାଣ ସରିଲାଣି।
BMC: ବିଏମ୍ସି କର୍ପୋରେସନ ବୈଠକ: ଦୋକାନ ପାଇଁ ହଙ୍ଗାମା, କର୍ପୋରେଟର ମୁହାଁମୁହିଁ
ଗାନ୍ଧୀଭବନ ପାଇଁ ରହିଥିବା ଜାଗାରେ ଅଙ୍ଗନବାଡ଼ି କେନ୍ଦ୍ର ନିର୍ମାଣକୁ ଗାନ୍ଧୀପ୍ରେମୀମାନେ ଜୋର୍ଦାର ବିରୋଧ କରିବା ସହ ୨୦୨୧ରେ ରାସ୍ତାକୁ ଓହ୍ଲାଇଥିଲେ। ସେତେବେଳେ ପ୍ରଶାସନ ପକ୍ଷରୁ କୁହାଯାଇଥିଲା, ଗାନ୍ଧୀଭବନ ପାଇଁ ଅନ୍ୟ ଏକ ଜାଗା ଦିଆଯିବ। ହେଲେ, ୫ ବର୍ଷ ପରେ ମଧ୍ୟ ଜାଗା ଚିହ୍ନଟ ହୋଇ ପାରିଲାନି। ନିକଟରେ ସର୍ବୋଦୟ ନେତ୍ରୀ କୃଷ୍ଣା ମହାନ୍ତି ଜିଲ୍ଲାପାଳଙ୍କୁ ଭେଟି ଏ ସଂପର୍କରେ ଆଲୋଚନା କରିବା ସହ ଗାନ୍ଧୀମାର୍ଗରେ ଏକ ଉପଯୁକ୍ତ ଜାଗା ଦେବା ପାଇଁ ଅନୁରୋଧ କରିଛନ୍ତି। ହେମସୁରପଡ଼ା ଅଞ୍ଚଳରେ ଏକ ସରକାରୀ ଜାଗା ଥିବାରୁ ଆପାତତଃ ଏଠାରେ ଗାନ୍ଧୀଭବନ ନିର୍ମାଣ ପାଇଁ ପ୍ରସ୍ତାବ ଦିଆଯିବ ବୋଲି ଜଣାପଡ଼ିଛି। ଅନ୍ୟପଟେ ବାମୁର ଡାକବଙ୍ଗଳାକୁ ଗାନ୍ଧୀ ସଂଗ୍ରହାଳୟରେ ପରିଣତ କରିବାକୁ ଦାବି ହେଉଥିଲେ ମଧ୍ୟ ସରକାରୀ ଉଦାସୀନତା ପାଇଁ ଏହା ଅଟକି ଯାଇଛି। ଏ ନେଇ କୃଷ୍ଣା ମହାନ୍ତି କହିଛନ୍ତି, ଅନୁଗୋଳରେ ଗାନ୍ଧୀଙ୍କ ପାଦ ପଡ଼ିବା ଏ ମାଟି ପାଇଁ ଏକ ସୌଭାଗ୍ୟର ବିଷୟ। ତାଙ୍କ ସ୍ମୃତିରକ୍ଷା ପାଇଁ ଯେମିତି ଉଦ୍ୟମ ହେବା କଥା ତାହା ହୋଇନାହିଁ। ଗାନ୍ଧୀମାର୍ଗରେ ଗାନ୍ଧୀଭବନ ନିର୍ମାଣ କରି ତାଙ୍କ ସନ୍ତକ ସାଇତି ରଖିବାକୁ ସେ ପ୍ରଶାସନକୁ ପୁଣି ଅନୁରୋଧ କରିଛନ୍ତି ବୋଲି କହିଛନ୍ତି।
