4 hours ago
3
ARTICLE AD BOX
ବୈଶିଙ୍ଗା (ଦୀପକ କୁମାର ସିଂହ):ମୟୂରଭଞ୍ଜଜିଲ୍ଲା ବେତନଟୀ ବ୍ଲକର ବୈଶିଙ୍ଗାଠାରେ ଶନିବାର ବ୍ଲକସ୍ତରୀୟ ମତ୍ସ୍ୟ ଓ ପ୍ରାଣୀସମ୍ପଦ ମେଳା ଅନୁଷ୍ଠିତ ହୋଇଯାଇଛି। ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀ ଜ୍ୟୋତିରଞ୍ଜନ ମହାନ୍ତିଙ୍କ ସଂଯୋଜନାରେ ଆୟୋଜିତ ଏହି ମେଳାରେ ଚାଷୀଙ୍କୁ ମତ୍ସ୍ୟଚାଷ ଓ ପଶୁପାଳନ ମାଧ୍ୟମରେ ଆତ୍ମନିର୍ଭରଶୀଳ ହେବା ସହ ସରକାରୀ ଯୋଜନାର ସୁଯୋଗ ନେବାକୁ ଆହ୍ୱାନ ଦିଆଯାଇଥିଲା।
କାର୍ଯ୍ୟକ୍ରମରେ ସ୍ଥାନୀୟ ବିଧାୟକ ସନାତନ ବିଜୁଳି ମୁଖ୍ୟ ଅତିଥି ଭାବେ ଯୋଗଦେଇ ବେତନଟୀକୁ ମତ୍ସ୍ୟଚାଷ ଓ ପଶୁପାଳନ କ୍ଷେତ୍ରରେ ଏକ ଆଦର୍ଶ ବ୍ଲକ ଭାବେ ଗଢ଼ିତୋଳିବା ଆମର ଲକ୍ଷ୍ୟ ବୋଲି କହିଥିଲେ। ଚାଷୀଙ୍କ ଉନ୍ନତି ହିଁ ପ୍ରାଥମିକତା ଏବଂ ଚାଷୀଙ୍କ ସମୃଦ୍ଧି ହିଁ ସଂକଳ୍ପ। ପାରମ୍ପରିକ ଚାଷ ସହିତ ମତ୍ସ୍ୟଚାଷ ଓ ପଶୁପାଳନକୁ ଆପଣାଇଲେ ଚାଷୀଙ୍କ ଆୟ ବୃଦ୍ଧିର ନୂତନ ସୁଯୋଗ ସୃଷ୍ଟି ହୋଇପାରିବ ବୋଲି ସେ ମତବ୍ୟକ୍ତ କରିଥିଲେ।
ମୁଖ୍ୟବକ୍ତା ଭାବେ ବୈଜ୍ଞାନିକ ଡା. ସୁଶାନ୍ତ କୁମାର ଦାଶ ଯୋଗଦେଇ ଚାଷୀଙ୍କୁ ଆଧୁନିକ ଜ୍ଞାନକୌଶଳ ସହ ଯୋଡ଼ିବା, ସରକାରୀ ଯୋଜନାର ସୁଫଳ ସେମାନଙ୍କ ନିକଟରେ ପହଞ୍ଚାଇବା ଏବଂ କୃଷି ସହ ମତ୍ସ୍ୟଚାଷ ଓ ପଶୁପାଳନକୁ ଆୟର ଅତିରିକ୍ତ ମାଧ୍ୟମ ଭାବେ ଗଢ଼ିତୋଳିବା ଉପରେ ଗୁରୁତ୍ୱାରୋପ କରିଥିଲେ।
ସମ୍ମାନିତ ଅତିଥି ଭାବେ ପଞ୍ଚାୟତ ସମିତି ଅଧ୍ୟକ୍ଷା କୌଶଲ୍ୟା ମାଝୀ, ଉପଖଣ୍ଡ ପ୍ରାଣୀ ଚିକିତ୍ସା ଅଧିକାରୀ ଦୀପକ ରଞ୍ଜନ ପରିଡ଼ା, OUATର ସହକାରୀ ପ୍ରଧ୍ୟାପକ କାମଦେବ ସେଠୀ, ସମିତି ସଭ୍ୟ ଶ୍ରୀଧର ପଣ୍ଡିତ, ଜିଲ୍ଲା ପରିଷଦ ସଦସ୍ୟା ସବିତା ଦାସ ଓ ସହକାରୀ ମତ୍ସ୍ୟ ଅଧିକାରୀ ବିରେନ ନାୟକ ପ୍ରମୁଖ ଯୋଗଦେଇଥିଲେ। ସେମାନେ ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ଚାଷୀଙ୍କୁ ଅବଗତ କରାଇବା ସହ ଏହାର ସୁଯୋଗ ନେଇ ଆର୍ଥିକ ସ୍ୱାବଲମ୍ବୀ ହେବାକୁ ପରାମର୍ଶ ଦେଇଥିଲେ।
SDRF missing: ମତ୍ସ୍ୟଜୀବୀଙ୍କୁ ଉଦ୍ଧାର ବେଳେ ଓଲଟିଲା ୨ଏସ୍ଡିଆରଏଫ୍ ଡଙ୍ଗା
ଗ୍ରାମାଞ୍ଚଳର ଗରିବ ଚାଷୀଙ୍କ ଆର୍ଥିକ ସ୍ଥିତିରେ ସୁଧାର ଆଣିବା ପାଇଁ ମତ୍ସ୍ୟଚାଷ, ଗୋପାଳନ, ଛେଳି, ମଇଁଷି ଓ ଘୁଷୁରି ପାଳନ ଭଳି ବିକଳ୍ପ ଜୀବିକାକୁ ସରକାର ପ୍ରୋତ୍ସାହନ ଦେଉଥିବା ନେଇ ମେଳାରେ ଆଲୋଚନା ହୋଇଥିଲା। ମୁଖ୍ୟମନ୍ତ୍ରୀ ମତ୍ସ୍ୟ କଲ୍ୟାଣ ଯୋଜନା ଅନ୍ତର୍ଗତ ମହିଳା ସ୍ୱୟଂ ସହାୟକ ଗୋଷ୍ଠୀ (ଏସଏଚଜି) ସରକାରୀ ପୋଖରୀ ନିଲାମ ନେଇ ମତ୍ସ୍ୟଚାଷ କଲେ ଆର୍ଥିକ ପ୍ରୋତ୍ସାହନ ସହ ମାଛ ଯାଆଁଳ ଓ ଦାନା ଯୋଗାଇ ଦିଆଯାଉଥିବା ସୂଚନା ଦିଆଯାଇଥିଲା। ସେହିପରି ବ୍ୟକ୍ତିଗତ ପୋଖରୀ ଖନନ ପାଇଁ ମଧ୍ୟ ବିଜି ରାମଜୀ ମାଧ୍ୟମରେ ସରକାରୀ ସହାୟତା ମିଳୁଥିବା କୁହାଯାଇଥିଲା। ଅନ୍ୟପକ୍ଷରେ ଗୋପାଳନକୁ ପ୍ରୋତ୍ସାହିତ କରିବା ପାଇଁ ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ଆର୍ଥିକ ସହାୟତା ବ୍ୟବସ୍ଥା ରହିଥିବା ନେଇ ବିଭାଗୀୟ ଅଧିକାରୀମାନେ ଚାଷୀଙ୍କୁ ବୁଝାଇଥିଲେ।
ମେଳା ପରିସରରେ ମିଶନ ଶକ୍ତି, କୃଷି, ଉଦ୍ୟାନ କୃଷି, ମତ୍ସ୍ୟ ଓ ପ୍ରାଣୀସମ୍ପଦ ବିଭାଗ ସମେତ ବିଭିନ୍ନ ବିଭାଗ ପକ୍ଷରୁ ଷ୍ଟଲ୍ ଖୋଲାଯାଇଥିଲା। ଏହି ଷ୍ଟଲ୍ଗୁଡ଼ିକ ମାଧ୍ୟମରେ ଚାଷୀଙ୍କୁ ଆଧୁନିକ ଜ୍ଞାନକୌଶଳରେ ମତ୍ସ୍ୟଚାଷ, ପଶୁପାଳନ, ଧାନଚାଷ ଓ ପନିପରିବା ଚାଷ ସମ୍ପର୍କରେ ପରାମର୍ଶ ଓ ତାଲିମଭିତ୍ତିକ ସୂଚନା ପ୍ରଦାନ କରାଯାଇଥିଲା। ଏଥିସହ ସରକାରଙ୍କ ବିଭିନ୍ନ କୃଷିଭିତ୍ତିକ ଯୋଜନା, ସବସିଡି ଓ ଆର୍ଥିକ ସହାୟତା ବିଷୟରେ ଚାଷୀମାନେ ଜାଣିବାର ସୁଯୋଗ ପାଇଥିଲେ।
ଏହି ମେଳାରେ ୧୦୦ରୁ ଊର୍ଦ୍ଧ୍ୱ ଚାଷୀ ଯୋଗଦେଇଥିଲେ। ବିଭିନ୍ନ ସରକାରୀ ଯୋଜନାରେ ସାମିଲ ହୋଇ ସଫଳତା ହାସଲ କରିଥିବା ଚାଷୀଙ୍କୁ ଏହି ଅବସରରେ ପୁରସ୍କୃତ ଓ ସମ୍ବର୍ଦ୍ଧିତ କରାଯାଇଥିଲା। ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ସଫଳତା ପାଇଁ ତପନ କୁମାର ରଥ, ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ବୃନ୍ଦାବତୀ ପଣ୍ଡିତ ଏବଂ ପଞ୍ଚାୟତ ମତ୍ସ୍ୟ ପୋଖରୀ ଯୋଜନାରେ ସିନ୍ଦୁରଗୌରା ଏସଏଚଜି ଗ୍ରୁପର ମହିଳାମାନଙ୍କୁ ସମ୍ମାନିତ କରାଯାଇଥିଲା।
ଶେଷରେ ସହକାରୀ ମତ୍ସ୍ୟ ଅଧିକାରିଣୀ ଶୁଭଶ୍ରୀ ପାତ୍ର ଧନ୍ୟବାଦ ଅର୍ପଣ କରିଥିଲେ। ଚାଷୀଙ୍କୁ ଆଧୁନିକ ଜ୍ଞାନକୌଶଳ, ସରକାରୀ ପ୍ରୋତ୍ସାହନ ଓ ବିକଳ୍ପ ଜୀବିକା ସହ ଯୋଡ଼ି ଆର୍ଥିକ ସ୍ୱାବଲମ୍ବୀ କରିବାର ଆହ୍ୱାନ ସହ ମେଳାର ପରିସମାପ୍ତି ଘଟିଥିଲା।
