15 hours ago
1
ARTICLE AD BOX
ଅଯୋଧ୍ୟା: ଅଯୋଧ୍ୟା ରାମମନ୍ଦିରରେ ଭକ୍ତମାନଙ୍କ ଦାନ ଅର୍ଥରେ କଥିତ ହେରଫେର ଅଭିଯୋଗ ଏବେ ବ୍ୟକ୍ତିଗତ ଦୁର୍ନୀତିର ସୀମା ଟପି ସମଗ୍ର ଦାନ ପରିଚାଳନା ବ୍ୟବସ୍ଥାକୁ ପ୍ରଶ୍ନ ଘେରକୁ ଆଣିଛି। ଉତ୍ତର ପ୍ରଦେଶ ସରକାର ଗଠନ କରିଥିବା ସ୍ୱତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ବର୍ତ୍ତମାନ ମନ୍ଦିରର ଦାନ ସଂଗ୍ରହ, ଗଣତି ଓ ବ୍ୟାଙ୍କରେ ଜମା ପ୍ରକ୍ରିୟାରେ ହୋଇଥିବା ବିଭିନ୍ନ ତ୍ରୁଟିର ଯାଞ୍ଚ କରୁଛି। ଏପ୍ରିଲ୍ ୨୦୨୫ରୁ ଫେବ୍ରୁଆରି ୨୦୨୬ ମଧ୍ୟରେ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ପାଖକୁ ୮୨.୭୮ କୋଟି ଟଙ୍କାର ଦାନ ଆସିଥିବାବେଳେ ଟ୍ରଷ୍ଟ ପ୍ରାୟ ୨,୧୦୦ କୋଟି ଟଙ୍କାର ସମ୍ପତ୍ତି ପରିଚାଳନା କରୁଛି।
ତଦନ୍ତରେ ପ୍ରଥମ ପ୍ରଶ୍ନ ଉଠିଛି, ଦାନବାକ୍ସରୁ ଟଙ୍କା ବାହାର କରିବା, ପରିବହନ, ବଛାବଛି, ଗଣତି, ବଣ୍ଡଲ କରିବା ଓ ବ୍ୟାଙ୍କରେ ଜମା କରିବା ପ୍ରକ୍ରିୟାରେ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ଥିଲା କି ନାହିଁ। ପ୍ରାୟ ୪୦ଟି ଦାନବାକ୍ସରୁ ଆସୁଥିବା ନଗଦ ଅର୍ଥ ବିଭିନ୍ନ ପର୍ଯ୍ୟାୟ ଦେଇ ଯାଉଥିବାରୁ ପ୍ରତ୍ୟେକ ସ୍ତରରେ ନିରୀକ୍ଷଣ ବ୍ୟବସ୍ଥା ପର୍ଯ୍ୟାପ୍ତ ଥିଲା କି ନାହିଁ, ତାହା ଯାଞ୍ଚ କରାଯାଉଛି।
ଦ୍ୱିତୀୟ ପ୍ରଶ୍ନ ହେଉଛି, ନିର୍ଦ୍ଧାରିତ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜର (ଏସ୍ଓପି) କାହିଁକି ପାଳନ କରାଯାଇ ନ ଥିଲା। ଏସ୍ଆଇଟିର ପ୍ରାରମ୍ଭିକ ତଦନ୍ତରେ ଜଣାପଡ଼ିଛି ଯେ, ଟଙ୍କା ଗଣତି କରୁଥିବା କର୍ମଚାରୀଙ୍କ ପାଇଁ ପକେଟ୍ବିହୀନ ପୋଷାକ ବାଧ୍ୟତାମୂଳକ କରାଯାଇ ନ ଥିଲା। ସେହିପରି ତଲାସି କାର୍ଯ୍ୟ ପୁଲିସ କିମ୍ବା ସରକାରୀ ସୁରକ୍ଷା ବାହିନୀ ବଦଳରେ ଘରୋଇ ସୁରକ୍ଷା ସଂସ୍ଥାକୁ ଦିଆଯାଇଥିଲା।
Ayodhya Ram Mandir: ରାମମନ୍ଦିର ହୁଣ୍ଡିରୁ ଚୋରି ଅଭିଯୋଗ
ତୃତୀୟ ପ୍ରଶ୍ନ ହେଉଛି, ନିରୀକ୍ଷଣ ଓ ଅଡିଟ୍ ବ୍ୟବସ୍ଥା କାହିଁକି ବିଫଳ ହେଲା। ଦାନ ଗଣତି କକ୍ଷରେ ସିସିଟିଭି କ୍ୟାମେରା ଲାଗିଥିଲେ ମଧ୍ୟ ସେଗୁଡ଼ିକର ନିରନ୍ତର ନଜରଦାରି ପ୍ରଭାବୀ ଥିଲା କି ନାହିଁ, ତାହା ଯାଞ୍ଚ କରାଯାଉଛି। ଏହାଛଡ଼ା ସିସିଟିଭି ଫୁଟେଜ୍ ୪୫ ଦିନ ପରେ ସ୍ୱୟଂଚାଳିତ ଭାବେ ଡିଲିଟ୍ ହୋଇଯିବା, ଦସ୍ତାବିଜ ସଂରକ୍ଷଣ ଓ ବ୍ୟାଙ୍କରେ ଜମା ହୋଇଥିବା ଅର୍ଥର ମେଳକରଣ ପ୍ରକ୍ରିୟାରେ ମଧ୍ୟ ତ୍ରୁଟି ଥିବା ସନ୍ଦେହ କରାଯାଉଛି।
ଚତୁର୍ଥ ପ୍ରଶ୍ନ ହେଉଛି, ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (ଏସ୍ବିଆଇ) ପକ୍ଷରୁ ଦିଆଯାଇଥିବା ପୂର୍ବ ସତର୍କବାଣୀକୁ ଅଣଦେଖା କରାଯାଇଥିଲା କି? ବ୍ୟାଙ୍କ ସୂତ୍ର ଅନୁସାରେ, ଘଟଣା ସାମ୍ନାକୁ ଆସିବାର ପ୍ରାୟ ତିନି ମାସ ପୂର୍ବରୁ ନଗଦ ଗଣତି ପ୍ରକ୍ରିୟାରେ ଅନିୟମିତତା ସନ୍ଦେହକୁ ନେଇ ସତର୍କ କରାଯାଇଥିଲା ଏବଂ କର୍ମଚାରୀ ପରିବର୍ତ୍ତନ ପାଇଁ ପରାମର୍ଶ ଦିଆଯାଇଥିଲା। ସେହି ପରାମର୍ଶ ଉପରେ କାର୍ଯ୍ୟାନୁଷ୍ଠାନ କାହିଁକି ନିଆଯାଇ ନ ଥିଲା, ତାହାର ମଧ୍ୟ ଯାଞ୍ଚ ଚାଲିଛି।
ପଞ୍ଚମ ପ୍ରଶ୍ନ ହେଉଛି, ଅନ୍ୟ ପ୍ରମୁଖ ମନ୍ଦିରଗୁଡ଼ିକର ଦାନ ପରିଚାଳନା ବ୍ୟବସ୍ଥା ତୁଳନାରେ ଅଯୋଧ୍ୟାର ବ୍ୟବସ୍ଥା କେତେ ସୁରକ୍ଷିତ ଥିଲା। ବାରାଣସୀର କାଶୀ ବିଶ୍ୱନାଥ ମନ୍ଦିରରେ ମାଜିଷ୍ଟ୍ରେଟ୍, ବ୍ୟାଙ୍କ ଅଧିକାରୀ ଓ ସ୍ୱାଧୀନ ପର୍ଯ୍ୟବେକ୍ଷକଙ୍କ ଉପସ୍ଥିତିରେ ସିସିଟିଭି ନଜରଦାରିରେ ଦାନ ଗଣତି କରାଯାଉଛି। ମଥୁରାର କୃଷ୍ଣ ଜନ୍ମଭୂମି ଓ ବୃନ୍ଦାବନର ବାଙ୍କେ ବିହାରୀ ମନ୍ଦିରରେ ମଧ୍ୟ ବହୁସ୍ତରୀୟ ସୁରକ୍ଷା ବ୍ୟବସ୍ଥା ରହିଛି। ବିଶେଷଜ୍ଞମାନଙ୍କ ମତରେ, ବଡ଼ ଧାର୍ମିକ ଅନୁଷ୍ଠାନରେ ଦାନ ପରିଚାଳନା ପାଇଁ ସ୍ୱାଧୀନ ଯାଞ୍ଚ, ସ୍ପଷ୍ଟ ଅଡିଟ୍ ବ୍ୟବସ୍ଥା, ନିରନ୍ତର ନଜରଦାରି ଓ ଉତ୍ତରଦାୟିତ୍ବ ନିଶ୍ଚିତ କରିବା ଅତ୍ୟନ୍ତ ଜରୁରୀ।
