ଇଣ୍ଡିମେଣ୍ଟରେ ଯୋଗ ଦେବାବାପାଇଁ ଟିମ୍‌ ଋତବ୍ରତ ପ୍ରସ୍ତୁତ; ମମତାଙ୍କୁ ହଟାଇବାପାଇଁ ସର୍ତ୍ତ

ନୂଆଦିଲ୍ଲୀ : ଭୋଟର ତାଲିକାର ଏସ୍‌ଆଇଆର (ସ୍ବତନ୍ତ୍ର ସଘନ ସଂଶୋଧନ)କୁ ନେଇ ତୀବ୍ର ରାଜନୈତିକ ବିବାଦ ମଧ୍ୟରେ ଋତବ୍ରତ ବାନାର୍ଜୀଙ୍କ ନେତୃତ୍ବାଧୀନ ଡିଟିସି (ଡେମୋକ୍ରାଟିକ୍‌ ତୃଣମୂଳ କଂଗ୍ରେସ) ବିରୋଧୀ ଇଣ୍ଡିମେଣ୍ଟରେ ଯୋଗ ଦେବାପାଇଁ ଇଚ୍ଛା ପ୍ରକାଶ କରିଛି । କିନ୍ତୁ ଏହା ଏକ ସର୍ତ୍ତ ରଖିଛି ଏବଂ ତାହା ହେଉଛି ମମତା ବାନାର୍ଜୀ ମେଣ୍ଟରୁ ହଟି‌ବେ । ମମତାଙ୍କୁ ଇଣ୍ଡି ମେଣ୍ଟରୁ ବାହାର କରିବା ଉପରେ ବିଚାର କରିବାପାଇଁ ଡିଟିସି ଚିଫ୍‌ ହ୍ବିପ୍‌ ଏମ୍‌ଡି ଅଖରୁଜ୍ଜମାନ ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖଡ଼ଗେ ଏବଂ ସୋନିଆ ଗାନ୍ଧୀଙ୍କୁ ଅନୁରୋଧ କରିଛନ୍ତି । ମମତା ବିଜେପିକୁ ସୁହାଇବାଭଳି କାମ କରୁଛନ୍ତି ବୋଲି ଡିଟିସି ଚିଫ୍‌ ହ୍ବିପ୍‌ କହିଛନ୍ତି ।

Arrest: କୋଲକାତା ଗ‌ଞ୍ଜେଇ ଚୋରା ଚାଲାଣ! ୩ ସନ୍ଦିଗ୍ଧ ବାଲାଂଦେଶୀ ମହିଳା ସହ ୪ ଗିରଫ

ଅଖରୁଜ୍ଜମାନ ଅଭିଯୋଗ କରିଛନ୍ତି ଯେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ବିଜେପିର ବି-ଟିମ୍‌ ଭଳି କାମ କରୁଛି ଏବଂ ଦଳ ଦାବି କରିଛି ଯେ ଅନେକ କ୍ଷେତ୍ରରେ ମମତାଙ୍କ ଦଳ ସଂସଦରେ ଶାସକ ଦଳକୁ ସହଯୋଗ କରିଛି । ଗୁରୁତ୍ବପୂର୍ଣ୍ଣ ‌ଭୋଟ୍‌ ସମୟରେ ଏହା ନିରବ ରହି ହେଉ କିମ୍ବା କକ୍ଷତ୍ୟାଗ କରି ଶାସକ ଦଳକୁ ସହଯୋଗ କରିଛି । ସେ ମଧ୍ୟ ଅଭିଯୋଗ କରିଛନ୍ତି ଯେ ୨୦୨୪ ଲୋକସଭା ନିର୍ବାଚନରେ ଟିଏମ୍‌ସି ବିରୋଧୀ ମେଣ୍ଟକୁ ଦୁର୍ବଳ କରିଦେଇଛି । ଅଖରୁଜ୍ଜମାନ ଅଭିଯୋଗ କରିଛନ୍ତି ଯେ ମମତା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ପଶ୍ଚିମବଙ୍ଗରେ ପ୍ରଚାର କରାଇ ଦେଇନାହାନ୍ତି ଏବଂ ନିର୍ବାଚନ ପ୍ରଚାର ସମୟରେ ତାଙ୍କୁ କଠୋର ସମାଲୋଚନା କରିଛନ୍ତି । ଯେତେବେଳେ ବି ବିଜେପି ବିରୋଧରେ ଲଢ଼େଇ ତୀବ୍ର ହୋଇଛି ସେତେବେଳେ ସେ ମେଣ୍ଟରୁ ଦୁରେଇ ରହିଛନ୍ତି ବୋଲି ଅଖରୁଜ୍ଜମାନ ଅଭିଯୋଗ କରିଛନ୍ତି ।