ARTICLE AD BOX
ନୂଆଦିଲ୍ଲୀ: ବ୍ରିଟେନ୍ର ରାଜକୁମାର ୱିଲିୟମ୍ ଓ ତାଙ୍କ ପତ୍ନୀ ରାଜକୁମାରୀ କେଟ୍ ମିଡଲଟନ୍ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନୂଆଦିଲ୍ଲୀରେ ଭେଟିଛନ୍ତି। ତିନିଦିନିଆ ଭାରତ ଗସ୍ତର ଶେଷ ଦିନରେ ଏହି ସାକ୍ଷାତ୍ ହୋଇଥିଲା। ଏହା ସହିତ ରାଜଦମ୍ପତିଙ୍କ ଭାରତ ଗସ୍ତ ଶେଷ ହୋଇଛି। ଭାରତ ଓ ବ୍ରିଟେନ୍ ମଧ୍ୟରେ ବାଣିଜ୍ୟ, ପୁଞ୍ଜିନିବେଶ, ପ୍ରତିରକ୍ଷା, ସୁରକ୍ଷା, ପ୍ରଯୁକ୍ତିବିଦ୍ୟା, ଶିକ୍ଷା ଓ ସଂସ୍କୃତି ଭଳି କ୍ଷେତ୍ରରେ ସହଯୋଗ ବଢ଼ାଇବା ଏହି ସାକ୍ଷାତ୍ର ମୁଖ୍ୟ ପ୍ରସଙ୍ଗ ଥିଲା।
ୱିଲିୟମ୍ ଓ କେଟ୍ଙ୍କ ଏହି ଗସ୍ତ ଦୁଇ ଦେଶ ମଧ୍ୟରେ ଥିବା ସମ୍ପର୍କକୁ ଆହୁରି ମଜଭୁତ କରିବାର ଏକ ସୁଯୋଗ ବୋଲି କେନ୍ସିଂଟନ୍ ପ୍ୟାଲେସ୍ର ମୁଖପାତ୍ର କହିଥିଲେ। ଅନ୍ତର୍ଜାତୀୟ ସ୍ତରରେ ୱିଲିୟମ୍ଙ୍କ ଭୂମିକା ବଢ଼ୁଥିବା ପରିପ୍ରେକ୍ଷୀରେ ଏହି ସାକ୍ଷାତ୍ ତାଙ୍କ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ବୋଲି ସେ ମତ ଦେଇଥିଲେ। ରାଜଦମ୍ପତି ନଭେମ୍ବର ୧୬ରେ ମୁମ୍ବାଇରେ ପହଞ୍ଚିଥିଲେ। ଏହା ୱିଲିୟମ୍ ଓ କେଟ୍ଙ୍କ ଚାରି ବର୍ଷ ପରେ ପ୍ରଥମ ମିଳିତ ବିଦେଶ ଗସ୍ତ ଥିଲା। ଗସ୍ତର ମୁଖ୍ୟ ଉଦ୍ଦେଶ୍ୟ ଥିଲା ୱିଲିୟମ୍ଙ୍କ ଦ୍ୱାରା ୨୦୨୦ରେ ଆରମ୍ଭ ହୋଇଥିବା ଆର୍ଥସଟ୍ ପୁରସ୍କାର କାର୍ଯ୍ୟକ୍ରମ। ପରିବେଶ ସୁରକ୍ଷା ଓ ଜଳବାୟୁ ପରିବର୍ତ୍ତନର ସମାଧାନ ପାଇଁ ନୂଆ ଉଦ୍ଭାବନ ଓ ପଦକ୍ଷେପକୁ ଏହି ପୁରସ୍କାର ମାଧ୍ୟମରେ ପ୍ରୋତ୍ସାହିତ କରାଯାଏ। ମୁମ୍ବାଇରେ ନଭେମ୍ବର ୧୭ରେ ଆୟୋଜିତ ଷଷ୍ଠ ଆର୍ଥସଟ୍ ପୁରସ୍କାର ସମାରୋହରେ ରାଜଦମ୍ପତି ଯୋଗ ଦେଇଥିଲେ। ଏଥିରେ ପାଞ୍ଚଟି ବିଜେତା ପ୍ରକଳ୍ପକୁ ପ୍ରତ୍ୟେକ ୧୦ ଲକ୍ଷ ପାଉଣ୍ଡ ପୁରସ୍କାର ଦିଆଯାଇଥିଲା।
Mann Ki Baat: ମୁଁ ମୋର ଦେଶବାସୀଙ୍କ ପ୍ରୟାସକୁ ନିକଟରୁ ବୁଝିପାରୁଛି: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
ଏହା ପୂର୍ବରୁ ମୁମ୍ବାଇରେ ୱିଲିୟମ ଓ କେଟ୍ କ୍ରିକେଟର ସଚିନ ତେନ୍ଦୁଲକରଙ୍କ ଓ ସ୍ଥାନୀୟ ପିଲାମାନଙ୍କ ସହ କ୍ରିକେଟ୍ ଖେଳିଥିଲେ। ସେମାନେ ମୁମ୍ବାଇ ମେଟ୍ରୋରେ ଯାତ୍ରା କରିବା ସହ ଏକ ହସ୍ତଶିଳ୍ପ ପ୍ରଶିକ୍ଷଣ କେନ୍ଦ୍ର ମଧ୍ୟ ପରିଦର୍ଶନ କରିଥିଲେ। ବୁଧବାର ମୁମ୍ବାଇରେ ୱିଲିୟମ୍ ଧର୍ମା ପ୍ରଡକ୍ସନ୍ସର ଷ୍ଟୁଡିଓ ବୁଲିଥିବା ବେଳେ କେଟ୍ ଏକ ପ୍ରସୂତି ଡାକ୍ତରଖାନାକୁ ଯାଇ ସ୍ୱାସ୍ଥ୍ୟକର୍ମୀଙ୍କ ସହ ଆଲୋଚନା କରିଥିଲେ। ଏହାପରେ ସେମାନେ ଦିଲ୍ଲୀ ଆସି ମୋଦୀଙ୍କୁ ଭେଟିଥିଲେ। ଏହି ଗସ୍ତ ଭାରତ ଓ ବ୍ରିଟେନ୍ ମଧ୍ୟରେ ରହିଥିବା କୂଟନୈତିକ, ଆର୍ଥିକ ଓ ସାଂସ୍କୃତିକ ସମ୍ପର୍କକୁ ଆଗକୁ ବଢ଼ାଇବା ଦିଗରେ ଗୁରୁତ୍ୱ ବହନ କରୁଛି।

2 hours ago
1


