1 hour ago
2
ARTICLE AD BOX
କେନ୍ଦ୍ରାପଡ଼ା/କଟକ: ସରକାରୀ ଅର୍ଥ ହଡ଼ପ ମାମଲାରେ ଓଡ଼ିଶା ଭିଜିଲାନ୍ସକୁ ଏକ ବଡ଼ ସଫଳତା ମିଳିଛି। ଏଚଆରଏମଏସ୍ (HRMS) ପୋର୍ଟାଲରେ ଜାଲ୍ ବିଲ୍ ପ୍ରସ୍ତୁତ କରି ୩ କୋଟି ୩ ଲକ୍ଷ ୬୫ ହଜାର ୮୪୩ ଟଙ୍କା ସରକାରୀ ଅର୍ଥ ଆତ୍ମସାତ୍ ଅଭିଯୋଗରେ ଡେରାବିଶ ବ୍ଲକ୍ର ବରିଷ୍ଠ ରାଜସ୍ୱ ସହାୟକ (ଏସ୍ଆର୍ଏ) ଶଶିକାନ୍ତ ରଣାଙ୍କୁ ଭିଜିଲାନ୍ସ ଗିରଫ କରିଛି। ଡିଜିଟାଲ୍ ଟ୍ରାକିଂ ମାଧ୍ୟମରେ ଅନୁଗୋଳରୁ ତାଙ୍କୁ ଗିରଫ କରାଯାଇଛି। ଦୀର୍ଘଦିନ ଧରି ସେ ଫେରାର ଥିଲେ।
ସରକାରୀ ଅର୍ଥରୁ ୩.୦୩ କୋଟିରୁ ଊର୍ଦ୍ଧ୍ୱ ଟଙ୍କା ହଡ଼ପ ହୋଇଥିବା ଅଭିଯୋଗ ପରେ ଓଡ଼ିଶା ଭିଜିଲାନ୍ସ ପକ୍ଷରୁ ଏହାର ଯାଞ୍ଚ କରାଯାଇଥିଲା। ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତ ରଣା ଦୁଇଟି ବ୍ଲକ୍ରେ କାର୍ଯ୍ୟ କରିବା ସମୟରେ ପ୍ରତିଷ୍ଠାନ ବିଭାଗର ଦାୟିତ୍ୱରେ ଥାଇ ଯୋଜନାବଦ୍ଧ ଭାବେ ସରକାରୀ ଅର୍ଥ ଆତ୍ମସାତ୍ କରିଥିଲେ। ଏହି ବିଭାଗ ଅଧୀନରେ କର୍ମଚାରୀଙ୍କ ଦରମା, ବକେୟା ଦରମା ଓ ପେନ୍ସନ୍ ସମ୍ପର୍କିତ କାର୍ଯ୍ୟ ପରିଚାଳିତ ହୋଇଥାଏ।
ଭିଜିଲାନ୍ସର ତଦନ୍ତ ଅନୁଯାୟୀ, ରଣା ରାଜକନିକା ବ୍ଲକ୍ରେ ୨୦୨୩ ଅଗଷ୍ଟ ୩୦ରୁ ୨୦୨୪ ସେପ୍ଟେମ୍ବର ୪ ତାରିଖ ପର୍ଯ୍ୟନ୍ତ କାର୍ଯ୍ୟ କରିବା ସମୟରେ ୧ କୋଟି ୪୬ ଲକ୍ଷ ୬୮ ହଜାର ୧୧୮ ଟଙ୍କା ହଡ଼ପ କରିଥିବା ଅଭିଯୋଗ ହୋଇଛି। ସେହିପରି ଡେରାବିଶ ବ୍ଲକ୍ରେ ୨୦୨୫ ଜାନୁଆରି ୭ରୁ ଅକ୍ଟୋବର ୧୩ ତାରିଖ ମଧ୍ୟରେ ୧ କୋଟି ୫୬ ଲକ୍ଷ ୯୭ ହଜାର ୭୨୫ ଟଙ୍କା ଆତ୍ମସାତ୍ କରିଥିବା ତଦନ୍ତରୁ ଜଣାପଡ଼ିଛି। ଉଭୟ ଘଟଣାରେ ମୋଟ୍ ୩ କୋଟି ୩ ଲକ୍ଷ ୬୫ ହଜାର ୮୪୩ ଟଙ୍କା ହଡ଼ପ ହୋଇଥିବା ଭିଜିଲାନ୍ସ ଦର୍ଶାଇଛି।
ଆହୁରି ପଢନ୍ତୁ: Cricket: ଶୁକ୍ରବାର ଚତୁର୍ଥ ଦିନିକିଆ: ଶୃଙ୍ଖଳା ବିଜୟ ଲକ୍ଷ୍ୟରେ ଭାରତ
ଅଭିଯୋଗ ଅନୁଯାୟୀ, ଅବସରପ୍ରାପ୍ତ ଓ ମୃତ କର୍ମଚାରୀଙ୍କ ନାମରେ ଦରମା, ବକେୟା ଦରମା, ଗ୍ରାଚ୍ୟୁଇଟି, ଅବ୍ୟବହୃତ ଛୁଟି ବାବଦ ଅର୍ଥ ଓ ପେନ୍ସନ୍ ପାଇଁ ଏଚଆରଏମଏସ୍ ପୋର୍ଟାଲରେ ଜାଲ୍ ଦାବି ଓ ବିଲ୍ ପ୍ରସ୍ତୁତ କରାଯାଉଥିଲା। ପ୍ରକୃତ ହିତାଧିକାରୀଙ୍କ ବ୍ୟାଙ୍କ ଖାତାକୁ ଅର୍ଥ ପଠାଇବା ପରିବର୍ତ୍ତେ ଅଭିଯୁକ୍ତ ନିଜେ ଓ ତାଙ୍କ ପରିବାର ସଦସ୍ୟଙ୍କ ସମେତ ଜଣେ ସମ୍ପର୍କୀୟଙ୍କ ନାମରେ ଥିବା ବ୍ୟକ୍ତିଗତ ବ୍ୟାଙ୍କ ଖାତାକୁ ଅର୍ଥ ସ୍ଥାନାନ୍ତର କରୁଥିଲେ। ଏଥିପାଇଁ କେନ୍ଦ୍ରାପଡ଼ାର ଏସ୍ବିଆଇ, ବ୍ୟାଙ୍କ ଅଫ୍ ଇଣ୍ଡିଆ ଓ ଇଣ୍ଡିଆନ୍ ବ୍ୟାଙ୍କର ଖାତା ବ୍ୟବହାର କରାଯାଇଥିବା ତଦନ୍ତରୁ ଜଣାପଡ଼ିଛି। ଏହି ଅର୍ଥ ଏନ୍ଇଏଫ୍ଟି ମାଧ୍ୟମରେ ସ୍ଥାନାନ୍ତର ହେଉଥିଲା।
ଏହି ଘଟଣାରେ କଟକ ଭିଜିଲାନ୍ସ ଥାନାରେ କେସ୍ ନଂ ୪୨ ଓ ୪୩/୨୦୨୬ରେ ଶଶିକାନ୍ତ ରଣାଙ୍କ ବିରୋଧରେ ଦୁର୍ନୀତି ନିବାରଣ ଆଇନ, ୨୦୧୮ର ଧାରା ୧୩(୨) ସହ ୧୩(୧)(କ) ଏବଂ ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ବିଭିନ୍ନ ଧାରାରେ ମାମଲା ରୁଜୁ ହୋଇଛି।
ଆହୁରି ପଢନ୍ତୁ: Sonia Gandhi: "ସଞ୍ଜୟ ନୁହେଁ, ରାଜୀବ ହେବେ ପ୍ରଧାନମନ୍ତ୍ରୀ" ସୋନିଆ ଗାନ୍ଧୀଙ୍କ ଆତ୍ମଜୀବନୀରେ ଆଶ୍ଚର୍ଯ୍ୟଜନକ ଖୁଲାସା
ଗିରଫ ଅଭିଯୁକ୍ତଙ୍କୁ ଆଜି କଟକସ୍ଥିତ ସ୍ୱତନ୍ତ୍ର ଭିଜିଲାନ୍ସ ଅଦାଲତରେ ହାଜର କରାଯାଇ ରିମାଣ୍ଡ୍/ନ୍ୟାୟିକ ପ୍ରକ୍ରିୟା ପାଇଁ ପଠାଯାଉଛି। ଏହି ଘଟଣାର ଅଧିକ ତଦନ୍ତ ଜାରି ରହିଛି।
