1 hour ago
1
ARTICLE AD BOX
ନାଗୋୟା: ଚଳିତ ଏସୀୟ କ୍ରୀଡ଼ାରେ ଭାରତୀୟ ମହିଳା ସ୍କ୍ବାସ୍ ଦଳ କାଂସ୍ୟରେ ସନ୍ତୁଷ୍ଟ ରହିଛି। ଗୁରୁବାର ସେମିଫାଇନାଲ୍ରେ ଅନାହାତ ସିଂହ, ତନ୍ବୀ ଖାନା ଓ ଭେଟେରାନ୍ ଜ୍ୟୋତ୍ସ୍ନା ଚିନାପ୍ପାଙ୍କୁ ନେଇ ଗଠିତ ଭାରତୀୟ ଦଳ ୧-୨ରେ ହଂକଂଠୁ ପରାସ୍ତ ହୋଇଛି। ପ୍ରଥମ ମ୍ୟାଚ୍ରେ ୧୮ ବର୍ଷୀୟା ଅନାହାତ ୧୧-୯, ୧୧-୧୮, ୬-୧୧, ୧୧-୧୩, ୧୦-୧୨ରେ ସିନ୍ ୟୁକ୍ ଚାନ୍ଙ୍କଠୁ ହାରିଯିବାରୁ ଭାରତ ୦-୧ରେ ପଛରେ ରହିଥିଲା। ହେଲେ ତନ୍ବୀ ୪-୧୧, ୧୩-୧୧, ୧୧-୯, ୧୩-୧୧ରେ କା ୟି ଲିଙ୍କୁ ହରାଇ ପ୍ରତ୍ୟାବର୍ତ୍ତନ ସୁଯୋଗ ଦେଇଥିଲେ।
ଜ୍ୟୋତ୍ସ୍ନା ମୋଟ ୭ ପଦକ ଜିତିଛନ୍ତି
ଶେଷ ମ୍ୟାଚ୍ରେ ଜ୍ୟୋତ୍ସ୍ନା ୪-୧୧, ୭-୧୧, ୯-୧୧ରେ ହୋ ତିଜି ଲୋକ୍ଙ୍କଠୁ ହାରିଯିବାରୁ ଭାରତ ଫାଇନାଲ୍ରେ ପହଞ୍ଚିବାରେ ବିଫଳ ହୋଇଥିଲା। ଏହି କାଂସ୍ୟ ସହ ୪୦ ବର୍ଷୀୟା ଜ୍ୟୋତ୍ସ୍ନା ଲଗାତାର ୭ ଏସୀୟ କ୍ରୀଡ଼ାରେ ପଦକ ଜିତିବାର ଗୌରବ ପାଇଛନ୍ତି। ୨୦୦୨ରେ ଏସୀୟ କ୍ରୀଡ଼ାରେ ପଦାର୍ପଣ କରିଥିବା ଜ୍ୟୋତ୍ସ୍ନା ମୋଟ ୭ (୨ ରୌପ୍ୟ, ୫ କାଂସ୍ୟ) ପଦକ ଜିତିଛନ୍ତି। ସେ ମଧ୍ୟ ପ୍ରଥମ ଭାରତୀୟ ଭାବେ ସର୍ବାଧିକ ଏସୀୟ କ୍ରୀଡ଼ା ଖେଳିବା ଗୌରବ ପାଇଛନ୍ତି।
