2 days ago
3
ARTICLE AD BOX
ମସ୍କାଟ: ପଶ୍ଚିମ ଏସିଆରେ ସଂଘର୍ଷ ମଧ୍ୟରେ, ମଧ୍ୟପ୍ରାଚ୍ୟରୁ ଆସିଥିବା ଖବର ଆଲୋଡ଼ନ ସୃଷ୍ଟି କରିଛି। ଅନ୍ତର୍ଜାତୀୟ ଏଜେନ୍ସି, ସାଟେଲାଇଟ୍ ଚିତ୍ର ଏବଂ ପରିବେଶଗତ ଗୋଷ୍ଠୀଙ୍କ ଅନୁଯାୟୀ,ଉପସାଗରରେ ଏକ ବଡ଼ ଧରଣର ତେଲ ଲିକେଜ୍ ଘଟଣା ଘଟିଛି। ନିୟନ୍ତ୍ରଣ କରିବା ଅତ୍ୟନ୍ତ କଷ୍ଟକର ହେଉଛି। ଏହାକୁ ଦ୍ରୁତ ଗତିରେ ବ୍ୟାପୁଥିବା ବିଶ୍ୱର ସବୁଠାରୁ ବଡ଼ ଧରଣର ତେଲ ଲିକ୍ ଘଟଣା ଭାବେ ଦେଖାଯାଉଛି। ରଏଟର୍ସ ଅନୁଯାୟୀ, ଜାତିସଂଘ ଜାହାଜ ଚଳାଚଳ ସଂସ୍ଥା କହିଛି ଯେ, ଓମାନ ଉପକୂଳରେ ରୁଷୀୟ ଅଶୋଧିତ ତୈଳ ବୋଝେଇ ଟ୍ୟାଙ୍କରର ଦୁର୍ଘଟଣା ଯୋଗୁଁ ହୋଇଥିବା ତେଲ ଲିକ୍ ବୁଧବାର ଅଗଷ୍ଟ ୧୨ ସୁଦ୍ଧା କୂଳରେ ପହଞ୍ଚିଛି। ରଏଟର୍ସ ଦ୍ୱାରା ପ୍ରାପ୍ତ ସାଟେଲାଇଟ୍ ଚିତ୍ରଗୁଡ଼ିକର ସମୀକ୍ଷା କରିଥିବା ତୈଳ ଲିକ୍ ବିଶେଷଜ୍ଞ ଜନ୍ ଆମୋସ କହିଛନ୍ତି, ଲିକ୍ ହୋଇଥିବା ତେଲ ବର୍ତ୍ତମାନ ୨ ହଜାର ବର୍ଗ କିଲୋମିଟରରୁ ଅଧିକ ଅଞ୍ଚଳରେ ବ୍ୟାପିଛି।
ପ୍ରାୟ ୮ ଲକ୍ଷ ବ୍ୟାରେଲ ଅଶୋଧିତ ତୈଳ ବୋଝେଇ କରି ରୁଷର ତୈଳ ପ୍ରତିବନ୍ଧିତ ଜାହାଜ କାରୋଲିନ୍ ବେଜେଙ୍ଗି ୩୦ ଜୁନ୍ ୨୦୨୬ରେ ଓମାନର ଏକ ଦ୍ୱୀପ ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା। ଜାହାଜଟି ପୂର୍ବରୁ ୮ ଜୁନ୍ ୨୦୨୬ରେ ୟେମେନ୍ ଉପକୂଳରେ କିଛି ସମସ୍ୟା ସମ୍ପର୍କରେ ରିପୋର୍ଟ କରିଥିଲା। ସାମୁଦ୍ରିକ ସୂତ୍ର ଏହାକୁ ଜାହାଜ ଉପରେ ହୋଇଥିବା ଏକ ଆକ୍ରମଣ ବୋଲି ଦାବି କରିଥିଲା। ତେବେ ଆକ୍ରମଣ ପାଇଁ ଏପର୍ଯ୍ୟନ୍ତ କୌଣସି ପକ୍ଷ ନିଜକୁ ଦାୟୀ କରି କରିନାହାନ୍ତି।
ଜାହାଜଟି ରୁଷରୁ ଭାରତ ଯାତ୍ରା ସମୟରେ ବିଭିନ୍ନ ସମସ୍ୟାର ସମ୍ମୁଖୀନ ହୋଇଥିଲା। ଏପ୍ରିଲ ୨୦୨୬ରେ, ଜାହାଜଟି କୃଷ୍ଣସାଗର ବନ୍ଦର ନୋଭୋରୋସିସ୍କ ଛାଡ଼ିଥିଲା। ୟୁକ୍ରେନ ପକ୍ଷରୁ କାରୋଲିନ୍ ବେଜେଙ୍ଗି ସମେତ ରୁଷ ତେଲ ବହନ କରୁଥିବା ଏକ ସାଡୋ ଫ୍ଲିଟ୍ ଉପରେ ଆକ୍ରମଣ କରାଯାଇଥିବା କୁହାଯାଉଛି।
ରଏଟର୍ସ ଅନୁଯାୟୀ, ଜାହାଜ ଟ୍ରାକିଂ ତଥ୍ୟ ଦର୍ଶାଉଛି ଯେ ଜାହାଜଟି ୨୦୨୬ ମେ’ ଶେଷ ଭାଗରେ ସୁଏଜ୍ କେନାଲ ଦେଇ ଯାଇଥିଲା ଏବଂ ତା’ପରେ ୟେମେନ ଦେଇ ଯାଇଥିଲା। ସେଠାରେ ଇରାନ-ସମର୍ଥିତ ହୁତି ବିଦ୍ରୋହୀମାନେ ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷରେ ପ୍ରବେଶ କରିଛନ୍ତି। ବିଶେଷଜ୍ଞମାନଙ୍କ ଅନୁସାରେ ଜାହାଜରୁ ନିରନ୍ତର ପ୍ରବାହିତ ହେଉଥିବା ତେଲ ପ୍ରକୃତିର ଯଥେଷ୍ଟ କ୍ଷତି କରୁଛି। ଯୁଦ୍ଧ ଏବଂ ପ୍ରତିବନ୍ଧକ ନିୟମାବଳୀ ଏହି ଭୟଙ୍କର ବିପର୍ଯ୍ୟୟକୁ ରୋକିବା ପାଇଁ କରାଯାଉଥିବା ପ୍ରୟାସକୁ ବାଧା ଦେଉଛି। ଟ୍ୟାଙ୍କର ଲିକ୍ କ୍ଷତିପୂରଣ ସହ ଜଡିତ ଏକ ଏନଜିଓ ‘ଆଇପିସି ଫଣ୍ଡସ୍’ ଏହି ସମସ୍ୟାର ସମାଧାନ ପାଇଁ ଆଗେଇ ଆସିଛି। ସଂଗଠନ ସ୍ପଷ୍ଟ କରିଛି ଯେ, ଆମେ ଏହାକୁ ଏକ ସାଧାରଣ ଦୁର୍ଘଟଣା ନୁହେଁ, ଯୁଦ୍ଧର ଏକ କାର୍ଯ୍ୟ ଭାବରେ ବିଚାର କରୁଛୁ।
୨୫ ବର୍ଷ ପୁରୁଣା ଜାହାଜ
୨୫ ବର୍ଷ ପୁରୁଣା ରୁଷିଆନ ଜାହାଜଟି କୌଣସି ପାଶ୍ଚାତ୍ୟ ବୀମା ପ୍ରଦାନକାରୀଙ୍କ ଦ୍ୱାରା ବୀମାକୃତ ନୁହେଁ। ଫଳରେ ଏହି ବିପର୍ଯ୍ୟୟକୁ ରୋକିବା ପାଇଁ ପର୍ଯ୍ୟାପ୍ତ ପଦକ୍ଷେପ ଗ୍ରହଣ କରାଯାଇ ପାରୁ ନାହିଁ। ଜାହାଜଟି ପ୍ରବଳ ପବନ ଏବଂ ଜୁଆରର ପ୍ରଭାବରେ ଭାଙ୍ଗିବାକୁ ଲାଗିବ ଏବଂ ଏଥିରେ ଥିବା ସମ୍ପୂର୍ଣ୍ଣ ମାଲ ନଷ୍ଟ ହେବ। ଏଥିରୁ ୪୦-୫୦ ନିୟୁତ ଗ୍ୟାଲନ ପର୍ଯ୍ୟନ୍ତ ତୈଳ ଲିକ୍ ହୋଇପାରେ ବୋଲି ଆଶଙ୍କା ପ୍ରକାଶ ପାଇଛି। ଜାତିସଂଘ ଆନ୍ତର୍ଜାତୀୟ ସାମୁଦ୍ରିକ ସଂଗଠନ (ଆଇଏମଓ)ର ଜଣେ ମୁଖପାତ୍ର କହିଛନ୍ତି ଯେ ଓମାନର ଅଲ୍-କିବଲିୟା ଦ୍ୱୀପର ଉତ୍ତର-ପୂର୍ବରେ ଉପକୂଳରେ ତେଲ ପ୍ରବାହିତ ହେଉଛି, ଯାହାର କିଛି ପରିମାଣ କୂଳରେ ପହଞ୍ଚିଛି। ତେଲ ଲିକ୍ ସମସ୍ୟାର ସମାଧାନ ପାଇଁ ଏକ ଯୋଜନା ବିକଶିତ ହୋଇଛି। ସାଟେଲାଇଟ୍ ଚିତ୍ରଗୁଡ଼ିକ ଦର୍ଶାଉଛି ଯେ ଜାହାଜଟି ଅଲ-କିବଲିୟା ଦ୍ୱୀପରେ ଫସି ରହିଛି। ଫଳରେ ସେଠାରେ ବସବାସ କରୁଥିବା ବିରଳ କଇଁଛ ପ୍ରଜାତି, ହମ୍ପବ୍ୟାକ୍ ତିମି ଏବଂ ପ୍ରବାଳ ପ୍ରାଚୀର ସମେତ ଅନ୍ୟ ପ୍ରାଣୀଙ୍କ ପ୍ରତି ବିପଦ ସୃଷ୍ଟି କରୁଛି।
ସୋମବାର ୧୦ ଅଗଷ୍ଟରେ ଓମାନ ରିପୋର୍ଟ କରିଥିଲା ​​ଯେ ତେଲ ଲିକ୍ ପ୍ରାୟ ୪୦୦ ବର୍ଗ କିଲୋମିଟର ଅଞ୍ଚଳରେ ବ୍ୟାପିଛି। ପରିବେଶଗତ ଏଜେନ୍ସି ଏବଂ ବିଶେଷଜ୍ଞମାନେ ଆକଳନ କରିଛନ୍ତି ଯେ ଲିକ୍ ହୋଇଥିବା ତେଲ ଦ୍ରୁତ ଗତିରେ ବ୍ୟାପିବାରେ ଲାଗିଛି।
