4 hours ago
3
ARTICLE AD BOX
ମସ୍କୋ: ୟୁକ୍ରେନର ଓଡେଶା ବନ୍ଦରରୁ ବାହାରୁଥିବା ଏକ ବାଣିଜ୍ୟିକ ମାଲବାହୀ ଜାହାଜ ଉପରେ ହୋଇଥିବା କ୍ଷେପଣାସ୍ତ୍ର ଆକ୍ରମଣରେ ୪ ଜଣ ଭାରତୀୟ ନାବିକଙ୍କ ମୃତ୍ୟୁ ପରେ ରୁଷ୍ ଭାରତ ସହ ନିୟମିତ ଯୋଗାଯୋଗରେ ରହିଥିବା କହିଛି। କ୍ରେମଲିନ୍ର ମୁଖପାତ୍ର ଦିମିତ୍ରି ପେସ୍କୋଭ ମଙ୍ଗଳବାର କହିଛନ୍ତି, ଏହି ଘଟଣାକୁ ନେଇ ମସ୍କୋ ନୂଆଦିଲ୍ଲୀ ସହ ସମ୍ପର୍କ ରକ୍ଷା କରିଛି ଏବଂ ଉଭୟ ଦେଶର ସମ୍ପୃକ୍ତ କର୍ତ୍ତୃପକ୍ଷ ପରସ୍ପର ସହ ଆଲୋଚନା କରୁଛନ୍ତି।
ଏହାପୂର୍ବରୁ ଭାରତ ସରକାର ନୂଆଦିଲ୍ଲୀସ୍ଥିତ ରୁଷ୍ର ବରିଷ୍ଠ କୂଟନୀତିଜ୍ଞଙ୍କୁ ଡକାଇ ଏହି ଘଟଣାକୁ ନେଇ କଡ଼ା ପ୍ରତିବାଦ ଜଣାଇଥିଲେ। ବିଦେଶ ମନ୍ତ୍ରଣାଳୟ କହିଥିଲା, ବାଣିଜ୍ୟିକ ଜାହାଜ ଉପରେ ଆକ୍ରମଣ ଏବଂ ସାଧାରଣ ନାଗରିକଙ୍କ ମୃତ୍ୟୁ ସଂପୂର୍ଣ୍ଣ ଅଗ୍ରହଣୀୟ। ସଂଘର୍ଷ ସମୟରେ ବାଣିଜ୍ୟିକ ଜାହାଜ ଚଳାଚଳର ସୁରକ୍ଷା ଓ ସମୁଦ୍ର ପଥରେ ଅବାଧ ନୌପରିବହନ ସୁନିଶ୍ଚିତ କରିବା ଆବଶ୍ୟକ ବୋଲି ଭାରତ ଦୋହରାଇଛି।
ଗତ ୧୯ ଜୁଲାଇରେ ଗିନି-ବିସାଉ ପତାକା ବହନ କରୁଥିବା ମାଲବାହୀ ଜାହାଜ ଏମ୍ଭି ଗୋଲ୍ଡେନ୍ ଲିଓ ୟୁକ୍ରେନର ଓଡେଶା ବନ୍ଦରରୁ ବାହାରୁଥିବା ବେଳେ ଆକ୍ରମଣର ଶିକାର ହୋଇଥିଲା। ଜାହାଜରେ ମୋଟ ୧୭ ଜଣ କର୍ମଚାରୀ ଥିବାବେଳେ ସେମାନଙ୍କ ମଧ୍ୟରୁ ୫ ଜଣ ଭାରତୀୟ ଥିଲେ। ଆକ୍ରମଣରେ ୪ ଜଣ ଭାରତୀୟଙ୍କ ମୃତ୍ୟୁ ଘଟିଥିବାବେଳେ ଅନ୍ୟ ଜଣେ ଗୁରୁତର ଆହତ ହୋଇ ଚିକିତ୍ସାଧୀନ ଅଛନ୍ତି।
ଜାହାଜର ଅନ୍ୟ କିଛି ବିଦେଶୀ କର୍ମଚାରୀଙ୍କର ମଧ୍ୟ ମୃତ୍ୟୁ ହୋଇଥିବାରୁ ମୋଟ ମୃତକଙ୍କ ସଂଖ୍ୟା ୧୦ରେ ପହଞ୍ଚିଛି। ୟୁକ୍ରେନ ଅଭିଯୋଗ କରିଛି ଯେ, ରୁଷ୍ ପକ୍ଷରୁ ନିକ୍ଷେପ କରାଯାଇଥିବା ତିନୋଟି କ୍ରୁଜ୍ କ୍ଷେପଣାସ୍ତ୍ର ଜାହାଜକୁ ଆଘାତ କରିଥିଲା। ଅନ୍ୟପକ୍ଷରେ, କ୍ରେମଲିନ୍ ଏହି ଘଟଣା ପରେ ଭାରତ ସହ ଯୋଗାଯୋଗରେ ରହିଥିବା କହିଥିଲେ ମଧ୍ୟ ଆକ୍ରମଣ ସମ୍ପର୍କରେ ବିସ୍ତୃତ ମନ୍ତବ୍ୟ ଦେଇନାହିଁ।
