Rape and blackmail: ମହିଳାଙ୍କୁ ଦୁଷ୍କର୍ମ ଓ ବ୍ଲାକ୍‌ମେଲ: ବନ୍ଧାହେଲା ଠିକାସଂସ୍ଥାର ସୁପରଭାଇଜର୍‌

ଭୁବନେଶ୍ୱର: ଠିକାସଂସ୍ଥାରେ ଚାକିରି କରାଇଦେବାର ଲୋଭ ଦେଖାଇ ଜଣେ ବିବାହିତ ମହିଳାଙ୍କୁ ଦୁଷ୍କର୍ମ କଲା। କେବଳ ସେତିକିରେ ଅଟକିଲା ନାହିଁ ଧୂର୍ତ୍ତ। ଦୁଷ୍କର୍ମ ସମୟର ଭିଡିଓ ଓ ନଗ୍ନ ଫଟୋ ଦେଖାଇ ବ୍ଲାକ୍‌ମେଲ୍‌ କଲା ଏବଂ ଏକ ଲକ୍ଷ ଟଙ୍କା ଦାବି କଲା। ଏଭଳି ଏକ ଅଭିଯୋଗରେ ଆଜି ମହିଳା ଥାନା ପୁଲିସ ଅଭିଯୁକ୍ତ ଦିନେଶ ସେଠୀ(୨୬)କୁ ଗିରଫ କରିଛି। ତା’ ନିକଟରୁ ନଗ୍ନ ଭିଡିଓ ଥିବା ମୋବାଇଲ୍‌ ଫୋନ୍‌ ଜବତ କରାଯାଇଛି। ଗତ ୬ ତାରିଖ ଦିନ ସ୍ନାପ୍‌ଚାଟ୍‌ ମାଧ୍ୟମରେ ପୀଡ଼ିତା ଓ ଅଭିଯୁକ୍ତ ଦିନେଶ ମଧ୍ୟରେ ପରିଚୟ ଗଢ଼ି ଉଠିଥିଲା। ପୀଡ଼ିତା ଏକ ଚାକିରି ଖୋଜୁଛନ୍ତି ବୋଲି କହିଥିଲେ। ଦିନେଶ ନିଜକୁ ଏକ ନାମୀ ନିର୍ମାଣ ସଂସ୍ଥାର ସୁପରଭାଇଜର୍‌ ବୋଲି କହି ତାଙ୍କୁ ସେହି ସଂସ୍ଥାରେ ଚାକିରି କରାଇଦେବ ବୋଲି ପ୍ରତିଶ୍ରୁତି ଦେଇଥିଲା। ଦିନେଶ କଥାରେ ଭରସା କରି ୭ ତାରିଖ ସନ୍ଧ୍ୟାରେ ପୀଡ଼ିତା ଗୌତମନଗରରେ ପହଞ୍ଚିଥିଲେ। 

ଦିନେଶ ତାଙ୍କୁ ନିଜ ରୁମ୍‌କୁ ନେଇଥିଲା ଏବଂ ଚାକିରି ପାଇଁ ତାଙ୍କୁ ଶାରୀରିକ ସମ୍ପର୍କ ରଖିବାକୁ ହେବ ବୋଲି କହିଥିଲା। କିନ୍ତୁ ପୀଡ଼ିତା ରୋକ୍‌ଠୋକ ମନାକଲେ। ମାତ୍ର ଦିନେଶ ଜାଲରୁ ଖସିପାରି ନଥିଲେ। ଦିନେଶ ତାଙ୍କୁ ଜୋର୍‌ ଜବରଦସ୍ତ ଦୁଷ୍କର୍ମ କଲା ଏବଂ ପୂର୍ବରୁ ପ୍ରସ୍ତୁତ କରି ରଖିଥିବା ମୋବାଇଲ୍‌ରେ ଭିଡିଓ ସୁଟ୍‌ କରିଥିଲା। ଘଟଣା ସମ୍ପର୍କରେ ପ୍ରଘଟ କଲେ, ସେ ଭିଡିଓ ଭାଇରାଲ କରିଦେବ ବୋଲି ପୀଡ଼ିତାଙ୍କୁ ଧମକ ଦେଇଥିଲା। ତେଣୁ ପୀଡ଼ିତା ଲୋକଲଜ୍ଜାରେ ନିରବ ରହିବାକୁ ବାଧ୍ୟ ‌ହୋଇଥିଲେ। ମାତ୍ର ୧୦ ତାରିଖ ଦିନ ସେ ପୀଡ଼ିତାଙ୍କ ମୋବାଇଲକୁ ନଗ୍ନ ଭିଡିଓ ପଠାଇଲା ଏବଂ ଲକ୍ଷେ ଟଙ୍କା ଦାବିକରି ବ୍ଲାକ୍‌ମେଲ୍‌ କଲା। ଏଥର ପୀଡ଼ିତା ନିରବ ନ ରହି ସ୍ବାମୀଙ୍କୁ ଜଣାଇଥିଲେ ଏବଂ ସେମାନେ ମହିଳା ଥାନାର ଦ୍ବାରସ୍ଥ ହୋଇଥିଲେ।