1 hour ago
1
ARTICLE AD BOX
ଢାକା: ବାଂଲାଦେଶ ରାଷ୍ଟ୍ରପତି ମହମ୍ମଦ ଶାହାବୁଦ୍ଦିନ ତାଙ୍କ କାର୍ଯ୍ୟକାଳ ଶେଷ ହେବାର ଦୁଇ ବର୍ଷ ପୂର୍ବରୁ ନିଜ ପଦବୀରୁ ଇସ୍ତଫା ଦେବାକୁ ଯାଉଛନ୍ତି। ପ୍ରଧାନମନ୍ତ୍ରୀ ତାରିକ୍ ରହମାନଙ୍କ ଶାସକ ବିଏନପି ସରକାର ତାଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ଥିବା ସୂଚନା ମିଳିଛି। ନିକଟରେ ଶାହାବୁଦ୍ଦିନ ଭାରତରେ ନିର୍ବାସିତ ଥିବା ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ସହ ପୁଣି ଥରେ ଯୋଗାଯୋଗ ସ୍ଥାପନ କରିବାକୁ ଚେଷ୍ଟା କରିଥିବା ଖବର ସାମ୍ନାକୁ ଆସିବା ପରେ ଏହି ରାଜନୈତିକ ହଇଚଇ ସୃଷ୍ଟି ହୋଇଛି। ଅଗଷ୍ଟ ୨୦୨୪ରେ ଛାତ୍ର ଆନ୍ଦୋଳନ ଯୋଗୁଁ ଶେଖ୍ ହସିନାଙ୍କ ସରକାର ଭୁଶୁଡ଼ି ପଡ଼ିବା ପରେ, ଶାହାବୁଦ୍ଦିନ ହିଁ ନିଜ ସାମ୍ବିଧାନିକ ପଦବୀରେ ବଜାୟ ଥିବା ପୂର୍ବତନ ସରକାରଙ୍କ ଏକମାତ୍ର ପ୍ରମୁଖ ଚେହେରା ଥିଲେ।
ଶେଖ୍ ହସିନା ଆସନ୍ତା ଡିସେମ୍ବର ସୁଦ୍ଧା ସ୍ୱଦେଶ ଫେରିବାକୁ ଘୋଷଣା କରିବା ପରେ ଦେଶର ପରିସ୍ଥିତି ଅତ୍ୟନ୍ତ ସଂବେଦନଶୀଳ ହୋଇପଡ଼ିଛି। ସୂଚନାଯୋଗ୍ୟ ଯେ, ନଭେମ୍ବର ୨୦୨୫ରେ ବାଂଲାଦେଶର ଆନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ୍ ଶେଖ୍ ହସିନା ଓ ତାଙ୍କ ପୂର୍ବତନ ଗୃହମନ୍ତ୍ରୀ ଅସଦୁଜ୍ଜାମାନ ଖାନଙ୍କୁ ମାନବାଧିକାର ଉଲ୍ଲଂଘନ ପାଇଁ ମୃତ୍ୟୁଦଣ୍ଡାଦେଶ ଶୁଣାଇ ସାରିଛନ୍ତି। ୧୯୭୧ ମୁକ୍ତିଯୁଦ୍ଧର ଏହି ବୀର ଯବାନ୍ ତଥା ପୂର୍ବତନ ବିଚାରପତି ଶାହାବୁଦ୍ଦିନ ଏପ୍ରିଲ ୨୦୨୩ରେ ୫ ବର୍ଷ ପାଇଁ ରାଷ୍ଟ୍ରପତି ଭାବେ ଶପଥ ନେଇଥିଲେ। ବାଂଲାଦେଶ ସମ୍ବିଧାନ ଅନୁଯାୟୀ, ଯଦି ରାଷ୍ଟ୍ରପତି ଇସ୍ତଫା ଦିଅନ୍ତି, ତେବେ ନୂତନ ରାଷ୍ଟ୍ରପତି ନିର୍ବାଚିତ ନ ହେବା ପର୍ଯ୍ୟନ୍ତ ସଂସଦର ବାଚସ୍ପତି ହାଫିଜୁଦ୍ଦିନ ଅହମ୍ମଦ କାମଚଳା ରାଷ୍ଟ୍ରପତି ଭାବେ ଦାୟିତ୍ୱ ଗ୍ରହଣ କରିବେ।
