4 hours ago
2
ARTICLE AD BOX
ନୂଆଦିଲ୍ଲୀ: ହଟ୍ଟଗୋଳ, ନାରାବାଜି ଓ ସରକାର-ବିରୋଧୀ ଟଣାଓଟରା ମଧ୍ୟରେ ଗୁରୁବାର ସଂସଦର ମୌସୁମୀ ଅଧିବେଶନ ଶେଷ ହୋଇଛି। ଲୋକସଭା ଓ ରାଜ୍ୟସଭାକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ କରାଯାଇଛି। ଜୁଲାଇ ୨୦ରୁ ଆରମ୍ଭ ହୋଇଥିବା ଏହି ଅଧିବେଶନରେ ବିରୋଧୀ ଦଳର ଲଗାତାର ପ୍ରତିବାଦ ଯୋଗୁଁ ଅଧିକାଂଶ ସମୟ ଗୃହକାର୍ଯ୍ୟ ବାଧାପ୍ରାପ୍ତ ହୋଇଥିଲା।
ଗୁରୁବାର ସକାଳେ ଲୋକସଭା ବସିବା ପରେ କେନ୍ଦ୍ରମନ୍ତ୍ରୀ ଅମିତ ଶାହ ଗୃହକୁ ଆସିବା ମାତ୍ରେ ବିରୋଧୀ ସାଂସଦମାନେ ନାରାବାଜି ଆରମ୍ଭ କରିଥିଲେ। ଛାତ୍ରଙ୍କ ବିରୋଧରେ ଦିଲ୍ଲୀରେ ହୋଇଥିବା ପୁଲିସ କାର୍ଯ୍ୟାନୁଷ୍ଠାନ ନେଇ ସେମାନେ ଅମିତ ଶାହଙ୍କ ବିବୃତି ଓ ତାଙ୍କ ଇସ୍ତଫା ଦାବି କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୃହରେ ପହଞ୍ଚିବା ପରେ ଜାତୀୟ ସଙ୍ଗୀତ ‘ବନ୍ଦେ ମାତରମ୍’ର ଗାନ କରାଯାଇଥିଲା। ଏହା ପରେ ବାଚସ୍ପତି ଓମ୍ ବିର୍ଲା ଲୋକସଭାକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ କରିଥିଲେ।
ଏଥର ଲୋକସଭାରେ ୧୧ଟି ବିଲ୍ ପାରିତ ହୋଇଥିଲା। କିନ୍ତୁ ପେପର ଲିକ୍ ରୋକିବା ସମ୍ପର୍କିତ ବିଲ୍କୁ ଛାଡ଼ିଦେଲେ ଅନ୍ୟ ବିଲ୍ଗୁଡ଼ିକ ହଟ୍ଟଗୋଳ ମଧ୍ୟରେ ଆଲୋଚନା ବିନା ପାରିତ ହୋଇଥିଲା। ପେପର ଲିକ୍ ଉପରେ ଲୋକସଭାରେ ପ୍ରାୟ ୧୧ ଘଣ୍ଟା ଆଲୋଚନା ହୋଇଥିଲା। ଅନ୍ୟପକ୍ଷରେ ଜାତୀୟ ସମ୍ମାନର ଅପମାନ ରୋକିବା ସଂଶୋଧନ ବିଲ୍ ୧୪ ମିନିଟ୍, ଜନ୍ମ-ମୃତ୍ୟୁ ପଞ୍ଜୀକରଣ ସଂଶୋଧନ ବିଲ୍ ୪ ମିନିଟ୍, ସୁପ୍ରିମ୍କୋର୍ଟ ବିଚାରପତିଙ୍କ ସଂଖ୍ୟା ସଂଶୋଧନ ବିଲ୍ ୪ ମିନିଟ୍ ଏବଂ ଏମ୍ଏସ୍ଏମ୍ଇ ସଂଶୋଧନ ବିଲ୍ ମାତ୍ର ୩ ମିନିଟ୍ରେ ପାରିତ ହୋଇଥିଲା।
MonsoonSession: ମୌସୁମୀ ଅଧିବେଶନରେ ନିଟ୍ ବିବାଦ ଓ ଦରବୃଦ୍ଧି ପ୍ରସଙ୍ଗରେ ସରକାରଙ୍କୁ ଘେରିବେ ବିରୋଧୀ
ଏହି ଅଧିବେଶନରେ ନିଟ୍ ପ୍ରଶ୍ନପତ୍ର ଲିକ୍ ଓ ଅଯୋଧ୍ୟା ରାମମନ୍ଦିର ଦାନ ଅର୍ଥ ଚୋରି ଅଭିଯୋଗ ବିରୋଧୀଙ୍କ ପ୍ରମୁଖ ପ୍ରସଙ୍ଗ ହୋଇଥିଲା। ଛାତ୍ରଙ୍କ ବିରୋଧରେ ଦିଲ୍ଲୀରେ ହୋଇଥିବା ପୁଲିସ କାର୍ଯ୍ୟାନୁଷ୍ଠାନକୁ ନେଇ ବିରୋଧୀ ଦଳ ସରକାରଙ୍କୁ ଘେରିଥିଲେ। ଅମିତ ଶାହ ବୁଧବାର ଏହି ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ ଥିବା ଏବଂ ବିରୋଧୀଙ୍କ ପ୍ରତ୍ୟେକ ପ୍ରଶ୍ନର ଉତ୍ତର ଦେବେ ବୋଲି କହିଥିଲେ। କିନ୍ତୁ ବିରୋଧୀ ଏହି ପ୍ରସ୍ତାବକୁ ଗ୍ରହଣ ନ କରି ତାଙ୍କ ଇସ୍ତଫା ଦାବି କରିଥିଲେ। ରାହୁଲ ଗାନ୍ଧୀ ପୁଲିସ କାର୍ଯ୍ୟାନୁଷ୍ଠାନ ପାଇଁ କିଏ ନିର୍ଦ୍ଦେଶ ଦେଇଥିଲା ବୋଲି ପ୍ରଶ୍ନ କରିଥିଲେ। ଏହାକୁ ନେଇ ସରକାର ଓ ବିରୋଧୀଙ୍କ ମଧ୍ୟରେ ଅଧିବେଶନର ଶେଷ ଦିନ ପର୍ଯ୍ୟନ୍ତ ବିବାଦ ଜାରି ରହିଥିଲା। ଲୋକସଭା ମୁଲତବୀ ପରେ ଇଣ୍ଡିମେଣ୍ଟର ନେତାମାନେ ବାଚସ୍ପତି ଓମ୍ ବିର୍ଲାଙ୍କ ପାରମ୍ପରିକ ଚା’ ବୈଠକକୁ ମଧ୍ୟ ବର୍ଜନ କରିଥିଲେ।
ଅନ୍ୟପକ୍ଷରେ, ବୁଧବାର ଏଫ୍ସିଆର୍ଏ ସଂଶୋଧନ ବିଲ୍କୁ ଯୁଗ୍ମ ସଂସଦୀୟ କମିଟି (ଜେପିସି)କୁ ପଠାଇବା ପ୍ରସ୍ତାବ ସରକାର ଗ୍ରହଣ କରିଥିଲା। କଂଗ୍ରେସ ଓ ସମାଜବାଦୀ ପାର୍ଟି ଏହାକୁ ଅଳ୍ପସଂଖ୍ୟକ ଓ ଏନ୍ଜିଓ ବିରୋଧୀ ବୋଲି କହି ବିଲ୍ ପ୍ରତ୍ୟାହାର ଦାବି କରିଥିଲେ। ତେବେ ସରକାର ଏହି ଅଭିଯୋଗକୁ ଖଣ୍ଡନ କରି ବିଲ୍କୁ ଜେପିସିକୁ ପଠାଇଥିଲେ। ମୌସୁମୀ ଅଧିବେଶନରେ ଲୋକସଭାର ଉତ୍ପାଦକତା ୧୯ ପ୍ରତିଶତ ଓ ରାଜ୍ୟସଭାର ୩୯ ପ୍ରତିଶତ ରହିଥିବା ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି। ଏହାକୁ ନେଇ ସେ ଅସନ୍ତୋଷ ପ୍ରକାଶ କରିବା ସହ ଗୃହକାର୍ଯ୍ୟରେ ବାରମ୍ବାର ବାଧା ପାଇଁ କଂଗ୍ରେସକୁ ଦାୟୀ କରିଛନ୍ତି।
