14 hours ago
2
ARTICLE AD BOX
ୱାସିଂଟନ: ନ୍ୟୁୟର୍କ ପୋଷ୍ଟ ରିପୋର୍ଟ କରିଛି ଯେ, ଇରାନର ସର୍ବୋଚ୍ଚ ନେତା ମୋଜତାବା ଖେମିନିଙ୍କୁ ତେହେରାନର ଏକ ଭଙ୍ଗା ହସ୍ପିଟାଲର ଅଳିଆ ଗଦା ତଳୁ ଟାଣି ବାହାର କରାଯାଇଥିଲା। ପୂର୍ବରୁ ହୋଇଥିବା ଆକ୍ରମଣ ପରେ ତାଙ୍କୁ ଚିକିତ୍ସା ପାଇଁ ହସ୍ପିଟାଲକୁ ନିଆଯାଇଥିବା ସମୟରେ ସେ ପୁଣିଥରେ ଆମେରିକା ଏବଂ ଇସ୍ରାଏଲୀ ଆକ୍ରମଣର ଶିକାର ହୋଇଥିଲେ। ରିପୋର୍ଟ ଅନୁସାରେ, ଇରାନର ବିଶେଷଜ୍ଞ ପରିଷଦର ସଦସ୍ୟ ମୋହସେନ ହେଦାରି କତର ଟେଲିଭିଜନ ନେଟୱାର୍କ ଅଲ ଆରବି ସହିତ ଏକ ସାକ୍ଷାତକାରରେ ଏସମ୍ପର୍କରେ ପ୍ରକାଶ କରିଛନ୍ତି।
ନ୍ୟୁୟର୍କ ପୋଷ୍ଟ ଅନୁଯାୟୀ, ହେଦାରି କହିଛନ୍ତି, ତାଙ୍କୁ ଆହତ ଅବସ୍ଥାରେ ହସ୍ପିଟାଲକୁ ନିଆଯାଇଥିବା ପରେ ମଧ୍ୟ, ତେହେରାନର ତିନୋଟି ହସ୍ପିଟାଲରେ ବୋମା ମାଡ଼ କରାଯାଇଥିଲା। ମୋଜତାବା ତୃତୀୟ ହସ୍ପିଟାଲରେ ଥିଲେ ଏବଂ ତାଙ୍କୁ ଭଗ୍ନାବଶେଷଗଦା ତଳୁ ବାହାର କରାଯାଇଥିଲା। ନ୍ୟୁୟର୍କ ପୋଷ୍ଟ ରିପୋର୍ଟ କରିଛି ଯେ, ୫୬ ବର୍ଷୀୟ ମୋଜତାବା ଏହାପରେ ଏକ ଅଜ୍ଞାତ ସ୍ଥାନକୁ ଚାଲିଯାଇଥିଲେ ଏବଂ ସେବେଠାରୁ ତାଙ୍କୁ ସାଧାରଣରେ ଦେଖାଯାଇ ନାହିଁ କି ତାଙ୍କର କିଛି ଖବର ମିଳିନାହିଁ।
ଚିକିତ୍ସା ସମୟରେ ୩ ହସ୍ପିଟାଲ ଉପରେ ହୋଇଥିଲା ବୋମାମାଡ଼
ଖବର ରିପୋର୍ଟ ଅନୁଯାୟୀ, ହେଦାରି ମାର୍ଚ୍ଚ ୮ ତାରିଖରେ ମୋଜତାବାଙ୍କୁ ଇରାନର ନୂତନ ସର୍ବୋଚ୍ଚ ନେତା ଭାବରେ ନିର୍ବାଚିତ କରାଯିବା ପ୍ରକ୍ରିୟା ବିଷୟରେ ମଧ୍ୟ ଆଲୋଚନା କରିଥିଲେ। ସେ କହିଛନ୍ତି ଯେ, ଇରାନର ସରକାରୀ ଟେଲିଭିଜନରେ ଘୋଷଣା ନହେବା ପର୍ଯ୍ୟନ୍ତ ମୋଜତାବା ଜାଣି ନଥିଲେ ସେ ନିର୍ବାଚିତ ହୋଇଛନ୍ତି। ଇରାନର ସର୍ବୋଚ୍ଚ ନେତାଙ୍କୁ ଚୟନ କରିଥିବା ବିଶେଷଜ୍ଞ ପରିଷଦକୁ ମଧ୍ୟ ଆକ୍ରମଣରେ ଟାର୍ଗେଟ କରାଯାଇଥିଲା।
ନ୍ୟୁୟର୍କ ପୋଷ୍ଟ ଅନୁଯାୟୀ, କ୍ୱାମ୍ରେ ଏହାର ସଚିବାଳୟ ଉପରେ ବୋମା ମାଡ଼ ହୋଇଥିଲା, ଯେଉଁଥିରେ ଆଠ ଜଣ ଲୋକ ପ୍ରାଣ ହରାଇଥିଲେ ଏବଂ ନୂତନ ସର୍ବୋଚ୍ଚ ନେତାଙ୍କ ଚୟନ ସହିତ ଜଡିତ ରିପୋର୍ଟ ଏବଂ ସୁପାରିଶଗୁଡ଼ିକୁ ନଷ୍ଟ କରିଦିଆଯାଇଥିଲା। ହେଦାରି କହିଛନ୍ତି, ସଦସ୍ୟମାନଙ୍କୁ ଚୟନ ପ୍ରକ୍ରିୟା ପାଇଁ ଏକ ଗୁପ୍ତ କୋଠରୀକୁ ଡକାଯିବା ପୂର୍ବରୁ କାଗଜରେ ସେମାନଙ୍କର ଭୋଟ୍ ଲେଖିଥିଲେ। ମୋଜତାବାଙ୍କ ନାମ ସୁପାରିଶ କରିଥିବା ସେ ପ୍ରଥମ ସଦସ୍ୟ ଥିବା କହିଥିଲେ।
ଶତ୍ରୁର ସ୍ଥିତିକୁ ଦୃଷ୍ଟିରେ ରଖି, ଆମେ ଇସଲାମିକ୍ ଗଣରାଜ୍ୟର ନେତା ଏବଂ ସର୍ବୋଚ୍ଚ ମାର୍ଗଦର୍ଶକ ଭାବରେ ଆୟାତୋଲ୍ଲା ମୋଜତାବା ଖେମିନିଙ୍କ ବ୍ୟତୀତ ଅନ୍ୟ କାହାକୁ ବାଛିବୁ ନାହିଁ ବୋଲି ଚିନ୍ତା କରିଥିଲୁ। ଆମେ ସୂଚନା ପାଇଥିଲୁ ମୋଜତାବା ସୁସ୍ଥ ଏବଂ ନେତୃତ୍ୱ ନେବା ପାଇଁ ସକ୍ଷମ। ସେ ଦେଶର ଦାୟିତ୍ୱ ନେବା ପାଇଁ ଧାର୍ମିକ ଯୋଗ୍ୟତା, ନ୍ୟାୟ ଏବଂ ଦକ୍ଷତାର ଆବଶ୍ୟକତା ପୂରଣ କରୁଥିଲେ ତେଣୁ ତାଙ୍କୁ ଚୟନ କରାଯାଇଥିଲା।
ଆକ୍ରମଣରେ ଗୁରୁତର ଆହତ ହୋଇଥିଲେ ମୋଜତାବା
ନ୍ୟୁୟର୍କ ପୋଷ୍ଟ ଅନୁଯାୟୀ, ବୈଠକ ସମୟରେ ମୋଜତାବାଙ୍କ ସପକ୍ଷରେ ୫୯ ଭୋଟ୍ରୁ ୫୦ ଭୋଟ୍ ମିଳିଥିଲା, ଯେତେବେଳେ ଆଠ ଜଣ ସଦସ୍ୟ ଆୟାତୋଲ୍ଲା ଅଲିରେଜା ଆରାଫିଙ୍କ ସପକ୍ଷରେ ଭୋଟ ଦେଇଥିଲେ ଏବଂ ଜଣେ ସଦସ୍ୟ ମତଦାନରୁ ବିରତ ରହିଥିଲେ। ସର୍ବୋଚ୍ଚ ନେତା ହେବା ପୂର୍ବରୁ ସେ ଇରାନ ସରକାରରେ କୌଣସି ରାଜନୈତିକ ପଦବୀରେ ନଥିଲେ, ଯଦିଓ ସେ ତାଙ୍କ ପିତାଙ୍କ ପରାମର୍ଶଦାତା ଭାବରେ କାର୍ଯ୍ୟ କରୁଥିଲେ ବୋଲି ଜଣାପଡ଼ିଛି।
ନ୍ୟୁୟର୍କ ପୋଷ୍ଟ ମଧ୍ୟ ରିପୋର୍ଟ କରିଛି ଯେ, ପୂର୍ବ ଆକ୍ରମଣ ପରେ ମୋଜତାବାଙ୍କ ଅବସ୍ଥା ବିଷୟରେ ଅନୁମାନ କରାଯାଉଥିଲା। ଆମେରିକାର ଗୁଇନ୍ଦା ରିପୋର୍ଟରେ କୁହାଯାଇଛି ଯେ ସେ ଆକ୍ରମଣରେ ଗୁରୁତର ଆହତ ହୋଇଥିଲେ। ଗତ ମାସରେ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଥିଲେ ଯେ, ସେ ନିଶ୍ଚିତ ଇରାନର ସର୍ବୋଚ୍ଚ ନେତା ମୋଜତାବା ଏବେ ବି ଜୀବିତ ଅଛନ୍ତି, ଯଦିଓ ସେ ଚାଲିଥିବା ସାମରିକ ଅଭିଯାନ ସମୟରେ ଗୁରୁତର ଆହତ ହୋଇଥିଲେ। ତେବେ ଇରାନୀ ନେତାଙ୍କୁ ସାଧାରଣରେ ଦେଖା ନଯିବା ନେଇ ରହସ୍ୟ ଜାରି ରହିଛି।
