1 hour ago
2
ARTICLE AD BOX
ନୂଆଦିଲ୍ଲୀ: ଭାରତ ବିଶ୍ବର ଷଷ୍ଠ ବୃହତ୍ ଅର୍ଥନୀତି। ଭାରତର ନାମମାତ୍ର ଜିଡିପି (ମୋଟ ଘରୋଇ ଉତ୍ପାଦ) ୨୦୨୫-୨୬ ଆର୍ଥିକବର୍ଷରେ ୩.୯୨ ଟ୍ରିଲିଅନ ଡଲାରରେ ରହିଥିଲା। ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍) ଦ୍ବାରା ୨୦୨୬ ଏପ୍ରିଲରେ ପ୍ରକାଶିତ ବିଶ୍ବ ଅର୍ଥନୈତିକ ସମ୍ଭାବନା ରିପୋର୍ଟରେ ଏହା ଦର୍ଶାଇଛି ବୋଲି ସରକାର ଆଜି ସଂସଦକୁ ଅବଗତ କରିଛନ୍ତି। ଆମେରିକା ଡଲାରର ବିନିମୟ ମୂଲ୍ୟ ହିସାବରେ ଦେଶଗୁଡ଼ିକର ନାମମାତ୍ର ଜିଡିପିକୁ ହିସାବ କରାଯାଇ ଉକ୍ତ ରୢାଙ୍କ ପ୍ରସ୍ତୁତ ହୋଇଛି। ଦେଶର ଅର୍ଥନୈତିକ ଅଭିବୃଦ୍ଧି, ମୁଦ୍ରାର ବିନିମୟ ମୂଲ୍ୟ, ଦରଦାମ, ନ୍ୟାସନାଲ ଆକାଉଣ୍ଟ୍ରେ ସଂଶୋଧନ ସହିତ ଅନ୍ୟ ପ୍ରମୁଖ ଅର୍ଥନୀତିଗୁଡ଼ିକର ଅଭିବୃଦ୍ଧି ଓ ଆକାରରେ ହେଉଥିବା ପରିବର୍ତ୍ତନ ପାଇଁ ରୢାଙ୍କିଂ ବଦଳିଥାଏ ବୋଲି ରାଜ୍ୟସଭାରେ ଏକ ଲିଖିତ ଉତ୍ତରରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ମଙ୍ଗଳବାର କହିଛନ୍ତି।
ଭାରତୀୟ ଅର୍ଥନୀତିର ଅଭିବୃଦ୍ଧି ସାମର୍ଥ୍ୟକୁ ବଢ଼ାଇବା ପାଇଁ ସରକାର ନୂଆ ରଣନୀତି ଗ୍ରହଣ କରିଛନ୍ତି। ସେଥିରେ କୃଷି ଉତ୍ପାଦକତା ବୃଦ୍ଧି, ଉତ୍ପାଦନ ସଂଯୋଜିତ ପ୍ରୋତ୍ସାହନ ଯୋଜନା କରିଆରେ କଳ କାରଖାନାର ଉତ୍ପାଦନ ବଢ଼ାଇବା, ଗୁଣବତ୍ତା ନିୟନ୍ତ୍ରଣ ଆଦେଶକୁ କୋହଳ କରିବା, ଏମ୍ଏସ୍ଏମ୍ଇକୁ ମଜଭୁତ କରିବା, ଅନ୍ତର୍ଜାତୀୟମାନର ଭିତ୍ତିଭୂମିକୁ ସଂପ୍ରସାରଣ କରିବା, ପିଏମ୍ ଗତିଶକ୍ତି ଓ ଜାତୀୟ ଲଜିଷ୍ଟିକ୍ସ ନୀତି ଜରିଆରେ ଲଜିଷ୍ଟିକ୍ସ ବ୍ୟବସ୍ଥାରେ ଉନ୍ନତି ଆଣିବା ସହ ନବସୃଜନ ଏବଂ ଗବେଷଣା ଆଦି ରହିଛି। ଏଥିସହିତ ସରକାର ମଧ୍ୟ ନିରନ୍ତର ଭାବେ ପୁଞ୍ଜି ବ୍ୟୟ ବଢ଼ାଇ, ଉଦାର ଏଫ୍ଡିଆଇ ନୀତି ଗ୍ରହଣ କରି, ପ୍ରତ୍ୟକ୍ଷ ଓ ପରୋକ୍ଷ ଟିକସ ବ୍ୟବସ୍ଥାରେ ସଂସ୍କାର ଆଣି ଏବଂ ବ୍ୟବସାୟ ବାତାବରଣରେ ଉନ୍ନତି ଆଣି ନିବେଶକୁ ପ୍ରୋତ୍ସାହନ ହେଉଛନ୍ତି ବୋଲି ମନ୍ତ୍ରୀ ଶ୍ରୀ ଚୌଧୁରୀ କହିଛନ୍ତି।
ଆଇଏମ୍ଏଫ୍ ତଥ୍ୟ ଉପରେ ନଜର ପକାଇଲେ ଜଣାଯାଏ ଯେ ଯୁକ୍ତରାଷ୍ଟ୍ର ଆମେରିକା ଶୀର୍ଷରେ ରହିଛି। ଏହି ଅର୍ଥନୀତିର ଆକାର ୩୦.୭୬ ଟ୍ରିଲିଅନ ଡଲାର। ଏହା ପଛକୁ ଚୀନ ଦ୍ବିତୀୟ (୧୯.୬୨ ଟ୍ରିଲିଅନ ଡଲାର), ଜର୍ମାନୀ ତୃତୀୟ (୫.୦୪ ଟ୍ରିଲିଅନ ଡଲାର), ଜାପାନ ଚତୁର୍ଥ (୪.୪୩ ଟ୍ରିଲିଅନ ଡଲାର) ଏବଂ ବ୍ରିଟେନ ପଞ୍ଚମ (୪.୦୦ ଟ୍ରିଲିଅନ ଡଲାର)। ପୂର୍ବରୁ ଭାରତ ବିଶ୍ବର ଚତୁର୍ଥ ବୃହତ୍ ଅର୍ଥନୀତିରେ ପରିଣତ ହୋଇଥିଲା। ସରକାର ଭାରତକୁ ତୃତୀୟ ବୃହତ୍ ଅର୍ଥନୀତିରେ ପରିଣତ କରିବା ଆଶା ରଖିଥିଲେ।
GDP Growth: ୨୦୨୫-୨୬ର ଜିଡିପି ଅଭିବୃଦ୍ଧି ୭.୭%
ଅନ୍ୟ ଏକ ପ୍ରଶ୍ନର ଉତ୍ତରରେ ଅର୍ଥ ରାଷ୍ଟ୍ରମନ୍ତ୍ରୀ ଶ୍ରୀ ଚୌଧୁରୀ କହିଛନ୍ତି, ଦେଶରେ ସରକାରୀ ବ୍ୟାଙ୍କଗୁଡ଼ିକର ମୋଟ ଏନ୍ପିଏ ହ୍ରାସ ପାଉଛି। ୨୦୨୬ ମାର୍ଚ୍ଚ ୩୧ ସୁଦ୍ଧା ଏହା ୨,୪୫,୬୩୪ କୋଟି ଟଙ୍କାରେ ରହିଛି। ୨୦୨୪ ମାର୍ଚ୍ଚ ୩୧ରେ ମୋଟ ଏନ୍ପିଏ ରାଶି ୩,୩୯,୫୪୧ କୋଟି ଟଙ୍କା ସ୍ତରରେ ରହିଥିଲା। ୨୦୨୪ ମାର୍ଚ୍ଚ ୩୧ରେ ସରକାରୀ ବ୍ୟାଙ୍କଗୁଡ଼ିକର ମୋଟ ଏନ୍ପିଏ ଅନୁପାତ ୩.୪୭ ପ୍ରତିଶତ ଥିବାବେଳେ ୨୦୨୬ ମାର୍ଚ୍ଚ ୩୧ରେ ଏହା ୧.୯୩ ପ୍ରତିଶତକୁ କମିଯାଇଛି। ଏଥିସହିତ ଦେଶରେ ସରକାରୀ ବ୍ୟାଙ୍କଗୁଡ଼ିକରେ ଠକେଇ ମାମଲା ସଂଖ୍ୟା ୫୪,୮୫୦ ରହିଥିବାବେଳେ ୨୦୨୫-୨୬ରେ ଏହା ୫୭୮୬କୁ ହ୍ରାସ ପାଇଛି ବୋଲି ମନ୍ତ୍ରୀ କହିଛନ୍ତି।
ରିଜର୍ଭ ବ୍ୟାଙ୍କର ଜମାକାରୀ ଶିକ୍ଷା ଓ ସଚେତନତା (ଡିଇଏ) ପାଣ୍ଠିରେ ୨୦୨୬ ଜୁନ ୩୦ ସୁଦ୍ଧା ୮୬,୯୧୭.୦୮ କୋଟି ଟଙ୍କାର ଦାବିହୀନ ଜମାରାଶି ରହିଛି। ଡିଇଏ ପାଣ୍ଠିରୁ ବ୍ୟାଙ୍କଗୁଡ଼ିକୁ ୨୦୨୬ ଜୁନ ୩୦ ସୁଦ୍ଧା ୧୭,୪୧୪.୬୮ କୋଟି ଟଙ୍କା ପ୍ରଦାନ କରାଯାଇଛି ବୋଲି ରିଜର୍ଭ ବ୍ୟାଙ୍କର ସୂଚନାକୁ ଆଧାର କରି ମନ୍ତ୍ରୀ କହିଛନ୍ତି। ତେବେ ନିଷ୍କ୍ରିୟ ବ୍ୟାଙ୍କ ଆକାଉଣ୍ଟଗୁଡ଼ିକରେ କେତେ ଟଙ୍କା ପଡ଼ି ରହିଛି ସେ ସଂପର୍କିତ ସୂଚନା ରିଜର୍ଭ ବ୍ୟାଙ୍କ ରଖି ନଥାଏ ବୋଲି ମନ୍ତ୍ରୀ କହିଛନ୍ତି।
