56 minutes ago
2
ARTICLE AD BOX
ମୁମ୍ବାଇ: ମୁଖ୍ୟ ନିର୍ବାଚନ ଆୟୁକ୍ତ (ସିଇସି) ଜ୍ଞାନେଶ କୁମାରଙ୍କ ଇସ୍ତଫା ଦାବିରେ କକ୍ରୋଚ ଜନତା ପାର୍ଟି (ସିଜେପି) ପକ୍ଷରୁ ପ୍ରତିବାଦ ଡାକରା ଦିଆଯାଇଛି। ପ୍ରତିବାଦ ଶୁକ୍ରବାର ଅପରାହ୍ଣ ୪ଟା ଆରମ୍ଭ ହେବାକୁ ଥିବାବେଳେ ମୁମ୍ବାଇର ଶିବାଜୀ ପାର୍କ ଓ ଦାଦର ରେଳ ଷ୍ଟେସନରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ପ୍ରତିବାଦକୁ ପୁଲିସ ପକ୍ଷରୁ ଅନୁମତି ଦିଆଯାଇନାହିଁ।
ଜଣେ ଅଧିକାରୀ କହିଛନ୍ତି ଯେ, ପୁଲିସ ଓ ରେଳ କର୍ତ୍ତୃପକ୍ଷ ଶିବାଜୀ ପାର୍କ ଓ ଦାଦର ଷ୍ଟେସନ ଚାରିପାଖରେ ଗୁରୁତ୍ବପୂର୍ଣ୍ଣ ସ୍ଥାନରେ କର୍ମଚାରୀମାନଙ୍କୁ ନିୟୋଜିତ କରିଛନ୍ତି। ଶିବାଜୀ ପାର୍କର ପ୍ରମୁଖ ପ୍ରବେଶ ସ୍ଥାନରେ ବ୍ୟାପକ ବ୍ୟାରିକେଡିଂ କରାଯାଇଛି। ମହିଳା ପୁଲିସ ଓ ଅନ୍ୟ ଏଜେନ୍ସିର ସୁରକ୍ଷାକର୍ମୀଙ୍କୁ ମଧ୍ୟ ଦାଦର ଅଞ୍ଚଳରେ କୌଣସି ଅପ୍ରୀତିକର ଘଟଣା ରୋକିବା ଓ ଟ୍ରାଫିକ୍ ନିୟନ୍ତ୍ରଣ କରିବା ପାଇଁ ନିୟୋଜିତ କରାଯାଇଛି। ତେବେ ଆନ୍ଦୋଳନ ଯୋଗୁ ସେମାନଙ୍କୁ ଅସୁବିଧା ହେବ ବୋଲି ଅଭିଯୋଗ କରି କିଛି ସ୍ଥାନୀୟ ଲୋକ ପ୍ରତିବାଦକୁ ବିରୋଧ କରୁଛନ୍ତି।
ଆନ୍ଦୋଳନ ଯୋଗୁ ଅସୁବିଧା ନେଇ ଅଭିଯୋଗ
ଅନ୍ୟପକ୍ଷରେ ଗାନ୍ଧୀ ଜୟନ୍ତୀ ଅବସରରେ ସିଜେପି ଆବାହକ ଅଭିଜିତ ଦୀପକେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାସୁମନ ଅର୍ପଣ କରିଛନ୍ତି। ସିଜେପି ମୁଖ୍ୟ ନିର୍ବାଚନ ଆୟୁକ୍ତ ନିଯୁକ୍ତିରେ ସ୍ବଚ୍ଛତା ଓ ୨୦୨୫ ଭୋଟର ତାଲିକାରେ ହେର୍ଫେର୍ ନକରିବାକୁ କହିଛନ୍ତି। ନିର୍ବାଚନ କମିଶନର ସୁଖବୀର ସିଂହ ସାନ୍ଧୁ ଓ ବିବେକ ଜୋଶୀ ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର୍) ସମ୍ପର୍କିତ ନିଷ୍ପତ୍ତି ଓ ଆଦେଶ ଉପରେ ୧୦ ମାସ ମଧ୍ୟରେ ଅତି କମ୍ରେ ୧୪ ଥର ଆପତ୍ତି ଉଠାଇଛନ୍ତି ବୋଲି ଗଣମାଧ୍ୟମରେ ରିପୋର୍ଟ ପ୍ରକାଶ ପାଇବା ପରେ ସିଜେପି ଜ୍ଞାନେଶ କୁମାରଙ୍କ ଇସ୍ତଫା ଦାବି କରି ପ୍ରତିବାଦ ଘୋଷଣା କରିଛି। ଦୁଇ ନିର୍ବାଚନ ଆୟୋଗ ଆହୁରି ଅଭିଯୋଗ କରିଛନ୍ତି ଯେ, କେତେକ ନିର୍ଦ୍ଦେଶଗୁଡ଼ିକ ସେମାନଙ୍କ ଅଜାଣତରେ ଜାରି କରାଯାଇଛି। ତେବେ ନିର୍ବାଚନ କମିସନ ସ୍ପଷ୍ଟୀକରଣ ରଖିଥିଲେ ଯେ, ତିନିଜଣିଆ ନିର୍ବାଚନୀ ପାନେଲ ସମସ୍ତ ନିଷ୍ପତ୍ତି ମିଳିତ ଭାବେ ନେଇଛନ୍ତି।
