57 minutes ago
2
ARTICLE AD BOX
ତେହେରାନ: ଆମେରିକା ଓ ଇରାନ ମଧ୍ୟରେ ପୁଣି ଥରେ ଭୀଷଣ ଯୁଦ୍ଧ ହେବାର ଆଶଙ୍କା ମଧ୍ୟରେ ଶତ୍ରୁର ଯେକୌଣସି ବିପଦର ତ୍ବରିତ, ତୀବ୍ର ଓ କୌଣସି ଭୌଗୋଳିକ ସୀମାବଦ୍ଧତା ବିନା ଜବାବ ଦେବାକୁ ଇରାନର ସର୍ବୋଚ୍ଚ ନେତା ମୋଜତବା ଖେମିନି ଶନିବାର ସଶସ୍ତ୍ର ବାହିନୀକୁ କଡ଼ା ନିର୍ଦ୍ଦେଶ ଦେଇଛନ୍ତି।
ମୋଜତବା ତାଙ୍କ ସରକାରୀ ଟେଲିଗ୍ରାମ ଆକାଉଣ୍ଟରେ ପ୍ରକାଶିତ ଏକ ବିବୃତିରେ, ସେ ସମସ୍ତ ଆମେରିକୀୟ ଓ ଇସ୍ରାଏଲୀ ସମ୍ପତ୍ତିକୁ ଆକ୍ରମଣ ପରିସର ମଧ୍ୟରେ ଆଣିବା ପାଇଁ ଏହାର ଟାର୍ଗେଟ ତାଲିକାକୁ ଅପଡେଟ୍ କରିବାକୁ ଇରାନ ସେନାକୁ ନିର୍ଦ୍ଦେଶ ଦେଇଛନ୍ତି। ଖେମିନି ଆହୁରି କହିଛନ୍ତି, ଯଦି ଶତ୍ରୁ ପୁଣି ଥରେ ସୈନ୍ୟ କିମ୍ବା ଆତଙ୍କବାଦୀ ଆକ୍ରମଣ ଆରମ୍ଭ କରେ, ତାହାହେଲେ ଯୁଦ୍ଧ କେବେ ଓ କେଉଁ ସର୍ତ୍ତରେ ଶେଷ କରାଯିବ, ତାହା ଇସଲାମିକ୍ ଗଣତନ୍ତ୍ରର ସେନା ଓ ଇରାନର ଜନସାଧାରଣ ନିଷ୍ପତ୍ତି ନେବେ।
ବୃଦ୍ଧି ପାଇପାରେ ଉତ୍ତେଜନା
ଖେମିନି ସଶସ୍ତ୍ର ବାହିନୀକୁ ଗୋଳାବାରୁଦ ଓ ଅସ୍ତ୍ରଶସ୍ତ୍ର ଉତ୍ପାଦନ ବୃଦ୍ଧି କରିବା, ସାମରିକ ଗୁପ୍ତଚରକୁ ସୁଦୃଢ଼ ​​କରିବା ଓ ସ୍ୱଦେଶୀ ପ୍ରତିରକ୍ଷା କ୍ଷମତା ବିକାଶ କରିବାକୁ ନିର୍ଦ୍ଦେଶ ଦେଇଛନ୍ତି। ମୋଜତାବା ଖେମିନିଙ୍କ ଏହି ବିବୃତିକୁ ଆମେରିକା ଓ ଇସ୍ରାଏଲ ପାଇଁ ଏକ ସିଧାସଳଖ ଚେତାବନୀ ଭାବରେ ଦେଖାଯାଉଛି, ଯାହା ଫଳରେ ମଧ୍ୟପ୍ରାଚ୍ୟ ଅଞ୍ଚଳରେ ଭୂରାଜନୈତିକ ଅସ୍ଥିରତା ଓ ଉତ୍ତେଜନା ଆହୁରି ବୃଦ୍ଧି ପାଇବାର ଆଶଙ୍କା ସୃଷ୍ଟି ହୋଇଛି।
ରାମଲୀଳା ମୈଦାନ ରାଲିକୁ ମିଳିଲା ଅନୁମତି
ଅନ୍ୟପକ୍ଷରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଇରାନ ସହିତ ଚାଲିଥିବା ଯୁଦ୍ଧ ସମାପ୍ତ କରିବାକୁ ଆମେରିକା ତରବରିଆ ହେଉନାହିଁ। ସେ ବର୍ତ୍ତମାନର ସଂଘର୍ଷକୁ ଏକ ସାଧାରଣ ଯୁଦ୍ଧଠାରୁ ଭିନ୍ନ ବୋଲି ବର୍ଣ୍ଣନା କରିଛନ୍ତି। ଟ୍ରମ୍ପଙ୍କ ଅନୁଯାୟୀ, ମାସ ମାସ ଧରି ଲଢ଼େଇ ଓ କୂଟନୈତିକ ପ୍ରୟାସ ସତ୍ତ୍ୱେ, କୌଣସି ସ୍ଥାୟୀ ଚୁକ୍ତି ହୋଇପାରି ନାହିଁ, କିନ୍ତୁ ସମୟ ଆମେରିକାର ସପକ୍ଷରେ ଅଛି। ଓଭାଲ ଅଫିସରେ ସାମ୍ବାଦିକମାନଙ୍କ ସହ କଥାବାର୍ତ୍ତା ସମୟରେ ଟ୍ରମ୍ପ ଏହା ମଧ୍ୟ ସ୍ବୀକାର କରିଛନ୍ତି ଯେ ଦୁଇ ପକ୍ଷ ମଧ୍ୟରେ କଥାବାର୍ତ୍ତା ପାଇଁ ପ୍ରୟାସ ଜାରି ରହିଛି।
