55 minutes ago
1
ARTICLE AD BOX
ନୂଆଦିଲ୍ଲୀ: ଦିଲ୍ଲୀ-ଏନ୍ସିଆର୍ରେ ନିକଟରେ ଘଟିଥିବା ଏକାଧିକ ଦୁଷ୍କର୍ମ ଓ ଯୌନ ନିର୍ଯାତନା ଘଟଣାକୁ ନେଇ ସୁପ୍ରିମ୍କୋର୍ଟ ସୋମବାର ନିଜ ଆଡୁ ମାମଲା ଗ୍ରହଣ କରିଛନ୍ତି। ଏହି ଘଟଣାଗୁଡ଼ିକରେ ୨୦୧୨ର ନିର୍ଭୟା କାଣ୍ଡର ଯନ୍ତ୍ରଣାଦାୟକ ସାମଞ୍ଜସ୍ୟ ଥିବା ଦର୍ଶାଇ କୋର୍ଟ ଆଇନଶୃଙ୍ଖଳା ଓ ସାଧାରଣ ନିରାପତ୍ତା ବ୍ୟବସ୍ଥାକୁ ନେଇ ଗଭୀର ଉଦ୍ବେଗ ପ୍ରକାଶ କରିଛନ୍ତି।
ଜଷ୍ଟିସ୍ ଜେ.ବି. ପାର୍ଦିୱାଲା ଓ କେ. ବିନୋଦ ଚନ୍ଦ୍ରନ୍ଙ୍କ ଖଣ୍ଡପୀଠ ଦିଲ୍ଲୀ-ଏନ୍ସିଆର୍ରେ ବାରମ୍ବାର ଘଟୁଥିବା ଯୌନ ଅପରାଧ ସମ୍ପର୍କିତ ଖବର ଉପରେ ଗୁରୁତ୍ୱ ଦେଇ କହିଛନ୍ତି ଯେ ଏହି ଘଟଣାଗୁଡ଼ିକ ଆଇନ ପ୍ରବର୍ତ୍ତନ ସଂସ୍ଥା ଓ ସାଧାରଣ ପ୍ରଶାସନର ବିଫଳତାକୁ ସ୍ପଷ୍ଟ କରୁଛି। ମାମଲାରେ ଦାୟିତ୍ୱ ନିର୍ଦ୍ଧାରଣ ଉପରେ ମଧ୍ୟ ଖଣ୍ଡପୀଠ ଗୁରୁତ୍ୱ ଦେଇଛନ୍ତି।
ଦିଲ୍ଲୀ-ଏନ୍ସିଆର୍ରେ ଘଟୁଛି ନିର୍ଭୟା କାଣ୍ଡ ପରି ଘଟଣା
ସୁପ୍ରିମ୍କୋର୍ଟ ଯେଉଁ ଘଟଣାଗୁଡ଼ିକୁ ନଜରକୁ ନେଇଛନ୍ତି, ସେଥିମଧ୍ୟରେ ଦକ୍ଷିଣ-ପୂର୍ବ ଦିଲ୍ଲୀର କାଲକାଜୀ ମନ୍ଦିର ନିକଟ ଆସ୍ଥା କୁଞ୍ଜ ପାର୍କରେ ୨୧ ସେପ୍ଟେମ୍ବରରେ ଜଣେ ୧୭ ବର୍ଷୀୟା ନାବାଳିକାଙ୍କୁ ତିନିଜଣ ଯୁବକ ପୁଲିସ ପରିଚୟ ଦେଇ ଦୁଷ୍କର୍ମ କରିଥିବା ଅଭିଯୋଗ ରହିଛି। ଏହି ମାମଲାରେ ଆସିଫ୍, ହେମନ୍ତ ଓ ମୁକେଶଙ୍କୁ ଗିରଫ କରାଯାଇଛି। ଏହାବ୍ୟତୀତ ଦିଲ୍ଲୀର ସ୍ୱରୂପ ନଗରରେ ଜଣେ ୧୬ ବର୍ଷୀୟା ନାବାଳିକାଙ୍କୁ ଗଣଦୁଷ୍କର୍ମ ପରେ ହତ୍ୟା କରାଯାଇଥିଲା।
ଏହି ଘଟଣାରେ ଜଣେ ୧୯ ବର୍ଷୀୟ ଯୁବକଙ୍କ ସହ ତିନିଜଣ ନାବାଳକଙ୍କୁ ପୁଲିସ ହେପାଜତକୁ ନେଇଛି। ଅନ୍ୟ ଏକ ଘଟଣା ଅଗଷ୍ଟ ୪ର। ଉତ୍ତରପ୍ରଦେଶର ମୈନପୁରୀର ଜଣେ ଏକାଦଶ ଶ୍ରେଣୀ ଛାତ୍ରୀ ଗ୍ରେଟର ନୋଏଡାର ପରୀ ଚୌକ ନିକଟରୁ ଏକ ଖାଲି ସ୍ଲିପର୍ ବସ୍ରେ ଚଢ଼ିବା ପରେ ଚାଳକ କୁଲଦୀପ ଓ କଣ୍ଡକ୍ଟର ସନ୍ଦୀପ ତାଙ୍କୁ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା। ଉଭୟ ଅଭିଯୁକ୍ତଙ୍କୁ ପୁଲିସ ଗିରଫ କରିଛି। ବସ୍ରେ ସିସିଟିଭି ନ ଥିବା ଏବଂ ଏହା ବିରୋଧରେ ପୂର୍ବରୁ ୧୧ଟି ଟ୍ରାଫିକ୍ ଚାଲାଣ ଥିବା ମଧ୍ୟ ତଦନ୍ତରୁ ଜଣାପଡ଼ିଥିଲା।
ଏସବୁ ଘଟଣାକୁ ନେଇ ଖଣ୍ଡପୀଠ କହିଛନ୍ତି, ୨୦୧୨ର ନିର୍ଭୟା ଘଟଣା ପରେ ମଧ୍ୟ ଯଦି ଦିଲ୍ଲୀ-ଏନ୍ସିଆର୍ର ପାର୍କ, ରାସ୍ତା, ବସ୍, ମେଟ୍ରୋ ଷ୍ଟେସନ୍ ଓ ଅନ୍ୟ ସାଧାରଣ ସ୍ଥାନରେ ମହିଳା ଓ ଶିଶୁଙ୍କ ସୁରକ୍ଷା ନେଇ ଏଭଳି ଘଟଣା ଘଟୁଛି, ତେବେ ତାହା ଗୁରୁତର ପ୍ରଶ୍ନ ସୃଷ୍ଟି କରୁଛି। ଆଲୋକର ଅଭାବ, ନିରୀକ୍ଷଣର ଅଭାବ ଓ ଉପଯୁକ୍ତ ପାଟ୍ରୋଲିଂ ନ ଥିବାରୁ ସାଧାରଣ ସ୍ଥାନଗୁଡ଼ିକୁ ବିପଜ୍ଜନକ ଅଞ୍ଚଳରେ ପରିଣତ ହେବାକୁ ଦିଆଯାଇପାରିବ ନାହିଁ ବୋଲି କୋର୍ଟ କହିଛନ୍ତି। ଏଭଳି ଘଟଣା ରୋକିବାରେ ଯେଉଁଠାରେ ବିଫଳତା ରହିଛି, ସେଠାରେ ଦାୟିତ୍ୱ ନିର୍ଦ୍ଧାରଣ ହେବା ଆବଶ୍ୟକ ବୋଲି ଖଣ୍ଡପୀଠ ମତ ଦେଇଛନ୍ତି।
