1 hour ago
2
ARTICLE AD BOX
ନୂଆଦିଲ୍ଲୀ:ଦଶହରା ଉତ୍ସବ ଉପରେ ବର୍ଷାର ପ୍ରଭାବ ପଡ଼ିବା ଆଶଙ୍କା ରହିଛି। ଭାରତର କିଛି ରାଜ୍ୟ ସମତେ ମଧ୍ୟପ୍ରଦେଶରେ ପାଗରେ ହଠାତ୍ ପରିବର୍ତ୍ତନ ହୋଇଥିବାରୁ ଭାରତୀୟ ପାଣିପାଗ ବିଭାଗ (IMD) ୧୫ଟି ଜିଲ୍ଲା ପାଇଁ ବର୍ଷା ଆଲର୍ଟ ଜାରି କରିଛି। ଦଶହରା ଦିନ ମଧ୍ୟ ଝଡ଼ବର୍ଷା ହେବାର ସମ୍ଭାବନା ଥିବାରୁ ରାବଣ ଦହନ ଓ ଅନ୍ୟାନ୍ୟ ଖୋଲା ପଡ଼ିଆରେ ହେବାକୁ ଥିବା କାର୍ଯ୍ୟକ୍ରମ ଆୟୋଜନକୁ ନେଇ ଚିନ୍ତା ବଢ଼ିଛି। ଏହି ସମୟରେ ଘଣ୍ଟାପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିପାରେ।
ପାଣିପାଗ ବିଭାଗର ଆକଳନ ଅନୁସାରେ, ସୋମବାର ଭୋପାଳ, ଉଜ୍ଜୟିନୀ, ଆଗର-ମାଲୱା, ରାଜଗଡ଼, ଶାଜାପୁର, ଦେୱାସ, ସିହୋର, ବିଦିଶା, ଗୁନା, ଅଶୋକନଗର, ଶିବପୁରୀ, ଟିକମଗଡ଼, ଛତରପୁର, ସାଗର ଓ ଦମୋହ ସମେତ ୧୫ଟି ଜିଲ୍ଲାରେ ବର୍ଷା ହୋଇପାରେ। ବିଶେଷକରି ଇନ୍ଦୋର, ଉଜ୍ଜୟିନୀ, ଭୋପାଳ ଓ ନର୍ମଦାପୁରମ୍ ଅଞ୍ଚଳରେ ଝଡ଼ବର୍ଷାକୁ ନେଇ ସତର୍କତା ଜାରି ହୋଇଛି।
ଉତ୍ସବରେ ବାଧା ସୃଷ୍ଟି ଆଶଙ୍କା
ବର୍ଷା ଓ ଜୋରରେ ପବନ ବହିବା ଯୋଗୁଁ ଦଶହରା ଉତ୍ସବରେ ବାଧା ସୃଷ୍ଟି ହୋଇପାରେ। ଏଭଳି ସ୍ଥିତିରେ ଦଶହରା କାର୍ଯ୍ୟକ୍ରମ ଆୟୋଜକମାନଙ୍କ ପାଇଁ ପାଗ ଏକ ବଡ଼ ଚିନ୍ତାର କାରଣ ହୋଇଛି। ମଧ୍ୟପ୍ରଦେଶରୁ ଅକ୍ଟୋବର ୩ ତାରିଖରେ ମୌସୁମୀ ବିଦାୟ ନେଇଥିଲେ ମଧ୍ୟ ରାଜ୍ୟର କିଛି ଅଞ୍ଚଳରେ ପୁଣି ବର୍ଷା ଆରମ୍ଭ ହୋଇଛି। ପାଣିପାଗ ବିଶେଷଜ୍ଞଙ୍କ ଅନୁସାରେ, ବାୟୁମଣ୍ଡଳରେ ସୃଷ୍ଟି ହୋଇଥିବା ଏକ ଘୂର୍ଣ୍ଣିବଳୟ ଯୋଗୁଁ ଏଭଳି ପରିସ୍ଥିତି ଦେଖାଦେଇଛି। ବାୟୁମଣ୍ଡଳରେ ପବନର ଚାପ ଓ ଗତିରେ ପରିବର୍ତ୍ତନ ହେବାରୁ ମେଘ ସୃଷ୍ଟି ହୋଇ ବର୍ଷା ହେଉଛି। ଏହି ପାଣିପାଗ ପ୍ରଣାଳୀ ଯୋଗୁଁ ପଶ୍ଚିମ ମଧ୍ୟପ୍ରଦେଶରେ ଅକ୍ଟୋବର ୨୨ ତାରିଖ ପର୍ଯ୍ୟନ୍ତ ବର୍ଷା ଜାରି ରହିପାରେ। ତେବେ ପୂର୍ବ ମଧ୍ୟପ୍ରଦେଶରେ ପାଗ ତୁଳନାତ୍ମକ ଭାବେ ଶୁଖିଲା ରହିବାର ଆକଳନ କରାଯାଇଛି।
ଲୋକଙ୍କୁ ସତର୍କ ରହିବାକୁ ପରାମର୍ଶ
ଦଶହରା ଉତ୍ସବରେ ବହୁ ସଂଖ୍ୟାରେ ଲୋକ ଏକାଠି ହେଉଥିବାରୁ ଝଡ଼ପବନ ସମୟରେ ସୁରକ୍ଷାକୁ ଗୁରୁତ୍ୱ ଦେବା ଆବଶ୍ୟକ। ଟେଣ୍ଟ, ଅସ୍ଥାୟୀ ମଞ୍ଚ ଓ ବଡ଼ ପ୍ରତିମୂର୍ତ୍ତିଗୁଡ଼ିକୁ ସୁରକ୍ଷିତ ରଖିବା ସହ ପାଗର ସୂଚନା ଉପରେ ନଜର ରଖିବା ଉଚିତ। ବର୍ଷା କିମ୍ବା ଜୋର୍ରେ ପବନ ବହିବା ସମୟରେ ଖୋଲା ପଡ଼ିଆରେ ଭିଡ଼ ଜମା କରିବାରୁ ଦୂରେଇ ରହିବା ମଧ୍ୟ ଜରୁରୀ।
Ram Mandir Darshan Pass: ରାମ ମନ୍ଦିର ଦର୍ଶନ ପାଇଁ ୯୦ ଦିନ ପୂର୍ବରୁ ପାସ୍ ବୁକିଂ ସୁଯୋଗ
