1 week ago
5
ARTICLE AD BOX
ଭୁବନେଶ୍ବର: ରେଳବାଇରେ ଚାକିରି କରାଇବାକୁ କହି ୨୦ରୁ ଊର୍ଦ୍ଧ୍ବ ଆଶାୟୀଙ୍କଠାରୁ ପ୍ରାୟ ୨କୋଟି ଟଙ୍କା ଠକିନେଇଥିବା ଅଭିଯୋଗରେ ମଞ୍ଚେଶ୍ବର ଥାନା ପୁଲିସ ନୀଳାଦ୍ରିବିହାରରେ ରହୁଥିବା ବଲାଙ୍ଗୀର ଟିକରପଡ଼ାର ଜିତେନ୍ଦ୍ର କୁମାର ବଗର୍ତ୍ତି(୫୦)କୁ ଗିରଫ କରିଛି। ତା’ ନିକଟରୁ ନକଲି ନିଯୁକ୍ତିପତ୍ର, ରେଳବାଇ ପରିଚୟପତ୍ର ଓ ଠକେଇ ସମ୍ବନ୍ଧୀୟ ଗୁରୁତ୍ବପୂର୍ଣ୍ଣ ଦସ୍ତାବିଜ୍ ଜବତ କରିଛି। ମଞ୍ଚେଶ୍ବର ଥାନା ଅଞ୍ଚଳରେ ରହୁଥିବା ସଦାଶିବ ମଙ୍ଗରାଜଙ୍କଠାରୁ ପ୍ରାୟ ୪୫ଲକ୍ଷ ଟଙ୍କା ଠକେଇ ମାମଲାରେ ତାକୁ ଗିରଫ କରାଯାଇଛି। ସେହିଭଳି ତା’ ବିରୋଧରେ ଏକାଧିକ ଠକେଇ ମାମଲା ରୁଜୁ ହୋଇଥିବାରୁ ପୁଲିସ ତା’କୁ ରିମାଣ୍ଡ ଆଣି ପଚରାଉଚରା କରିବ ବୋଲି ଜଣାପଡ଼ିଛି।
ପ୍ରାଥମିକ ତଦନ୍ତ କରି ପୁଲିସ ସୂଚନା ଦେଇଛି, ଅଭିଯୋଗକାରୀ ସଦାଶିବଙ୍କର ଏକ ପାନ ମସଲା କମ୍ପାନି ଅଛି। ତାଙ୍କ ଭଉଣୀଙ୍କର ମଞ୍ଚେଶ୍ବର ଶିଳ୍ପାଞ୍ଚଳରେ ଏକ ଦୋକାନ ଅଛି। ଠକ ଜିତେନ୍ଦ୍ର ନିଜକୁ ପୂର୍ବତଟ ରେଳବାଇର ଡିଭିଜିନାଲ୍ ରେଲୱେ ମ୍ୟାନେଜର୍ ବୋଲି ପରିଚୟ ଦେଇ ତାଙ୍କ ଭଉଣୀଙ୍କ ଦୋକାନକୁ ଆସେ। କଥାବାର୍ତ୍ତାରୁ ଜିତେନ୍ଦ୍ର ଠଉରାଇ ନେଲା ଯେ ସଦାଶିବଙ୍କ ପୁଅ, ଭଣଜା, ଭାଣିଜୀଙ୍କ ସମେତ ପ୍ରାୟ ୫ଜଣ ପିଲା ପ୍ରତିଦ୍ବନ୍ଦ୍ବିତାମୂଳକ ପରୀକ୍ଷା ପାଇଁ ପ୍ରସ୍ତୁତି ଚଳାଇଛନ୍ତି। ତେଣୁ ସେମାନଙ୍କୁ ରେଳବାଇ ବିଭାଗରେ ଟ୍ରାକ୍ମ୍ୟାନ୍ ପଦବିରେ ଚାକିରି କରାଇଦେବ ବୋଲି କହିଥିଲା। ପ୍ରତି ପିଲାଙ୍କ ପିଛା ପ୍ରାୟ ୧୫ରୁ ୨୦ଲକ୍ଷ ଟଙ୍କା ନେବ ବୋଲି ଧୂର୍ତ୍ତ ଜିତେନ୍ଦ୍ର କହିଥିଲା। ପରେ କଥାବାର୍ତ୍ତା ଅନୁସାରେ, ସଦାଶିବ ତାଙ୍କ ୫ ପିଲାଙ୍କ ପାଇଁ ୨୦୨୩ ମସିହାରେ ୪୫ଲକ୍ଷ ଟଙ୍କା ଅଗ୍ରିମ ଦେଇଥିଲେ। ପରେ ରେଳବାଇରେ ପୋଷ୍ଟ୍ ବାହାରିବା ପରେ ଆଶାୟୀଙ୍କ ଫର୍ମ ପକାଇବାକୁ କହିଥିଲା। ପରୀକ୍ଷା ପରେ ଯେତେବେଳେ ଫଳ ପ୍ରକାଶ ପାଇଲା, ସେଥିରେ କାହାରି ନାଁ ନଥିବା ଦେଖି ଠକ ଜିତେନ୍ଦ୍ରଙ୍କୁ ସଦାଶିବ ଏନେଇ ପଚାରିଥିଲେ। ୨ଟି ସିବିଟି ଓ ଗୋଟିଏ ଫିଜିକାଲ୍ ଟେଷ୍ଟ୍ ଶେଷ ହେବା ପରେ ସିଧାସଳଖ ସେମାନଙ୍କ ନାଁ ତାଲିକାରେ ଚଢ଼ାଇଦେବ ବୋଲି କହି ଜିତେନ୍ଦ୍ର ଭୂଆଁ ବୁଲାଇଥିଲା।
ସଦାଶିବ ତଞ୍ଚକତା ବୁଝି ନପାରି ଚାକିରି ହୋଇଯିବ ଭାବି ନିରବ ରହିଥିଲେ। ପରେ ନିର୍ଦ୍ଦାରିତ ସମୟରେ ପରୀକ୍ଷା ଫଳ ବାହାରିବା ପରେ ସେଥିରେ ମଧ୍ୟ କାହାରି ନାଁ ନଥିଲା। ମାତ୍ର ଧୂର୍ତ୍ତ ଜିତେନ୍ଦ୍ର ପୂର୍ବରୁ ତିଆରି କରି ରଖିଥିବା ୫ଟି ଜାଲ୍ ନିଯୁକ୍ତିପତ୍ର ଦେଇଥିଲା। ପରେ ଆଶାୟୀମାନେ ନିଯୁକ୍ତିପତ୍ର ନେଇ ପୂର୍ବତଟ ରେଳପଥର କାର୍ଯ୍ୟାଳୟକୁ ଯିବାରୁ ଠକେଇର ଶିକାର ହୋଇଥିବା ଜାଣିଥିଲେ। ସେତେବେଳକୁ ଜିତେନ୍ଦ୍ର ନୀଳାଦ୍ରିବିହାର ଛାଡ଼ି ବଲାଙ୍ଗୀର ଚମ୍ପଟ୍ ମାରିଥିଲା। ଏନେଇ ମଞ୍ଚେଶ୍ବର ଥାନାରେ ଅଭିଯୋଗ କରିବା ପରେ ଗତକାଲି ବିଳମ୍ବିତ ରାତିରେ ପୁଲିସ ତାକୁ ବଲାଙ୍ଗୀରସ୍ଥିତ ଟିକରପଡ଼ା ପୁରୁଣା ମନ୍ଦିର ଗାଁ’ରୁ ଗିରଫ କରିଛି। ଗୁରୁତ୍ବପୂର୍ଣ୍ଣ କଥା ହେଉଛି, ଧୂର୍ତ୍ତ ଜିତେନ୍ଦ୍ର କେବଳ ସଦାଶିବ ନୁହେଁ ବରଂ ମଞ୍ଚେଶ୍ବରର ଆଉ ଜଣେ ମହିଳାଙ୍କୁ ୪୭ଲକ୍ଷ, ଚନ୍ଦ୍ରଶେଖରପୁରରେ ୧୨ଲକ୍ଷ, ଝାରସୁଗୁଡ଼ାରେ ୩୦ଲକ୍ଷ ଏହିଭଳି ପ୍ରାୟ ୨କୋଟି ଟଙ୍କା ଠକେଇ କରିଥିବା ନେଇ ବିଭିନ୍ନ ଥାନାରେ ମାମଲା ରୁଜୁ ହୋଇଛି।
୧.୧୩ କୋଟି ଚଳୁକରି ରାୟଗଡ଼ାରୁ ବନ୍ଧାହେଲା ଠକ ଟିଟୁ
ଖଣ୍ଡଗିରି: ରେଳ ବିଭାଗରେ ଚାକିରି କରାଇଦେବାକୁ ପ୍ରଲୋଭନ ଦେଖାଇ ୧.୧୩ କୋଟି ଟଙ୍କା ଠକେଇ କରି ଫେରାର ଥିବା ମୁଖ୍ୟ ଅଭିଯୁକ୍ତ ରୋହିତ କୁମାର ପଣ୍ଡା (୫୩) ଓରଫ ଟିଟୁକୁ ଭରତପୁର ଥାନା ପୁଲିସ କାବୁ କରିଛି। ଟିଟୁର ଘର ରାୟଗଡ଼ା ଜିଲ୍ଲା ଗୁଣୁପର ଥାନା ଅନ୍ତର୍ଗତ ବିକ୍ରମପୁର ଛକ ଅଞ୍ଚଳରେ। ନିଜକୁ ମନ୍ତ୍ରୀ ଓ ବଡ଼ବଡ଼ ସରକାରୀ ଅଧିକାରୀଙ୍କ ସହିତ ତା’ର ସମ୍ପର୍କ ଥିବା କହି ସେ ଲୋକଙ୍କୁ ଠକୁଥିଲା। ଅଭିଯୋଗ ମୁତାବକ ସୁବାସିନୀ ଲେଙ୍କା ନିଜ ପରିବାର ସହିତ କୋଳଥିଆ ଅଞ୍ଚଳରେ ରୁହନ୍ତି। ତାଙ୍କ ସ୍ବାମୀ ଜଣେ ଅବସରପ୍ରାପ୍ତ ଶିକ୍ଷକ। ତାଙ୍କର ଦୁଇପୁଅଙ୍କ ଚାକିରି ପାଇଁ ସେ ସବୁବେଳେ ଚିନ୍ତିତ ରହୁଥିଲେ। ଏହାର ଫାଇଦା ଉଠାଇ ଗତ ଜୁନ୍ ୨୦ ତାରିଖ ଦିନ ଟିଟୁ ଓ ତା’ର ସହଯୋଗୀମାନେ ସୁବାସିନୀଙ୍କ ସହିତ ଯୋଗାଯୋଗ କରିଥିଲେ। ଦୁଇପୁଅଙ୍କର ରେଳବିଭାଗରେ ଚାକିରି କରାଇଦେବାକୁ ସେମାନେ ଜଣକା ପିଛା ୬୦ଲକ୍ଷ ଟଙ୍କା ଲେଖାଏଁ ଦାବି କରିଥିଲେ।
ଅଭିଯୋଗକାରିଣୀ ଓ ତାଙ୍କ ସ୍ବାମୀ ନିଜ ସମ୍ପର୍କୀୟଙ୍କ ପାଖରୁ ଧାରଉଧାର କରି ୧.୧୩ କୋଟି ଟଙ୍କା ଟିଟୁକୁ ନଗଦ ଆକାରରେ ଦେଇଥିଲେ। ଅବଶିଷ୍ଟ ୭ଲକ୍ଷ ଟଙ୍କା ପରବର୍ତ୍ତୀ ସମୟରେ ଦେବାକୁ ସ୍ଥିର ହୋଇଥିଲା। ଟଙ୍କା ନେବା ସତ୍ତ୍ବେ ଚାକିରି କରାଇ ନଦେବାରୁ ଟିଟୁ ଉପରେ ସୁବାସିନୀଙ୍କର ସନ୍ଦେହ ହୋଇଥିଲା। ମାତ୍ର ସମ୍ପୂର୍ଣ୍ଣ ଟଙ୍କା ଫେରସ୍ତ କରିବା ବଦଳରେ ରାୟଗଡ଼ା ଜିଲ୍ଲା ପଦ୍ମପୁର ଅଞ୍ଚଳରେ ୫୫ଲକ୍ଷ ଟଙ୍କାର ଏକ ଜମି ରେଜେଷ୍ଟ୍ରି କରାଇଦେବା ଏବଂ ଅବଶିଷ୍ଟ ୫୯ ଲକ୍ଷ ଟଙ୍କା ୫ଟି ଚେକ୍ ଆକାରରେ ଦେବାକୁ ଉଭୟ ପକ୍ଷଙ୍କ ମଧ୍ୟରେ ସ୍ଥିର ହୋଇଥିଲା। ମାତ୍ର ପରବର୍ତ୍ତୀ ସମୟରେ ଚେକ୍ଗୁଡ଼ିକ ବାଇନ୍ସ ହୋଇଯିବା ସହିତ ଟିଟୁ ଜମି ରେଜିଷ୍ଟ୍ରି କରିବାକୁ ଆସି ନଥିଲା। ସୁବାସିନୀ ଟଙ୍କା ମାଗିବାରୁ ଟିଟୁ ତାଙ୍କୁ ଜୀବନରୁ ମାରିଦେବାକୁ ଧମକଚମକ ଦେଇଥିଲା। ଏନେଇ ଭରତପୁର ଥାନାରେ ଅଭିଯୋଗ ପରେ ପୁଲିସ ତଦନ୍ତ କରି ରାୟଗଡ଼ାର ଥେରୁବାଲି ଅଞ୍ଚଳରୁ ଟିଟୁକୁ ଠାବ କରିଥିଲା। ପୁଲିସ ଏହି ମାମଲାରେ ୫ଟି ଚେକ୍, ଚୁକ୍ତିନାମା ଜବତ କରିଛି।
