2 hours ago
1
ARTICLE AD BOX
ନୂଆଦିଲ୍ଲୀ: ଯନ୍ତର ମନ୍ତରକୁ ବିକ୍ଷୋଭ ସ୍ଥଳ ମାନ୍ୟତାରୁ ହଟାଯିବା ଏବଂ ବେଆଇନ ଭାବେ ପ୍ରବେଶ କରିଥିବା ଅଭିଯୋଗରେ କୋକ୍ରୋଚ୍ ଜନତା ପାର୍ଟି (ସିଜେପି)ର ସହ-ସଂଯୋଜକ ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ୫ ଦିନିଆ ବିଚାରବିଭାଗୀୟ ହାଜତକୁ ପଠାଯିବା ପରେ ସେମାନଙ୍କ ସମର୍ଥନରେ ବାହାରିଛନ୍ତି ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ।
ପ୍ରଥମ ଥର ପାଇଁ ସିଜେପିକୁ ସମର୍ଥନ ଜଣାଇ କଂଗ୍ରେସ ସାଂସଦ ରାହୁଲ ଗାନ୍ଧୀ ସୋସିଆଲ ମିଡିଆ ''ଏକ୍ସ''ରେ ଲେଖିଛନ୍ତି ଯେ, ଶାନ୍ତିପୂର୍ଣ୍ଣ ପ୍ରତିବାଦ ବେଳେ ଯନ୍ତର ମନ୍ତରରେ ତ୍ରିରଙ୍ଗା ଉଡ଼ାଇବା କୌଣସି ଅପରାଧ ନୁହେଁ। ଏଥିପାଇଁ ଯୁବକମାନଙ୍କୁ ଜେଲ୍ ପଠାଇବା କାପୁରୁଷତାର ପରିଚୟ। ରାହୁଲ ଆହୁରି ମଧ୍ୟ କହିଛନ୍ତି ଯେ ଦେଶବ୍ୟାପୀ ଚାଲିଥିବା ସମସ୍ତ ପ୍ରତିବାଦ ଏକ ନିର୍ଦ୍ଦିଷ୍ଟ କାରଣ ପାଇଁ ଏକତ୍ରିତ ହୋଇଛନ୍ତି।
ସମର୍ଥନରେ ରାହୁଲ ଗାନ୍ଧୀ
ଛାତ୍ର, ଯୁବକ, ସମ୍ବାଦିକ ଏବଂ ''ଇଣ୍ଡିଆ'' ମେଣ୍ଟ, ସମସ୍ତଙ୍କ ପତାକା ଅଲଗା ହୋଇପାରେ, କିନ୍ତୁ ଲକ୍ଷ୍ୟ ଏକ। ନାଗରିକମାନେ ସେମାନଙ୍କ ସାମ୍ବିଧାନିକ ଅଧିକାର ଦାବି କରୁଛନ୍ତି। ଯନ୍ତର ମନ୍ତର ଭାରତର ଜନସାଧାରଣଙ୍କର ଏବଂ ଆମେ ଏହାକୁ ପୁଣି ଥରେ ହାସଲ କରିବୁ ବୋଲି ସେ କହିଛନ୍ତି। ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ବିରୋଧରେ ପ୍ରତିବାଦ ଜଣାଇ ମଙ୍ଗଳବାର ସକାଳେ ସିଜେପି ନେତା
ସୌରଭ ଦାସ, ଆଶୁତୋଷ ରାଙ୍କା ଏବଂ ଅନ୍ୟ ୧୨ ଜଣ କାର୍ଯ୍ୟକର୍ତ୍ତା ଯନ୍ତର ମନ୍ତର ସୁରକ୍ଷା ବଳୟ ଭାଙ୍ଗି ତ୍ରିରଙ୍ଗା ଉଡ଼ାଇଥିଲେ, ଯାହା ପରେ ପୁଲିସ ସେମାନଙ୍କୁ ଅଟକ ରଖିଥିଲା। ଦିଲ୍ଲୀ ପୁଲିସ ପକ୍ଷରୁ ଯନ୍ତର ମନ୍ତରକୁ ବିକ୍ଷୋଭ ସ୍ଥଳ ମାନ୍ୟତାରୁ ହଟାଯିବା ନେଇ ବିଜ୍ଞପ୍ତି ଜାରି ହେବାର ଗୋଟିଏ ଦିନ ପରେ ଏହି ସିଜେପି ନେତାମାନେ ଏପରି କାର୍ଯ୍ୟ କରିଥିଲେ।
ସାମ୍ବିଧାନିକ ଅଧିକାର ଦାବି
ବୁଧବାର ସକାଳେ ସୌରଭ, ଆଶୁତୋଷ ଏବଂ ଦଳର ଜାତୀୟ ସଂଗଠନ ପ୍ରଭାରୀ ଅଜିଙ୍କ୍ୟ ଶିନ୍ଦେଙ୍କୁ ମନ୍ଦିର ମାର୍ଗ ପୁଲିସ ଷ୍ଟେସନସ୍ଥିତ ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟଙ୍କ ସମ୍ମୁଖରେ ହାଜର କରାଯାଇଥିଲା, ଯେଉଁଠାରେ ସୌରଭ ଓ ଆଶୁତୋଷଙ୍କୁ ୫ ଦିନିଆ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି ଏବଂ ଶିନ୍ଦେଙ୍କୁ ବ୍ୟକ୍ତିଗତ ମୁଚାଲିକା ବଳରେ ଛାଡ଼ି ଦିଆଯାଇଛି।
ଏହି ଗିରଫଦାରୀ ପରେ ସିଜେପିର ଆଇନଗତ ମୁଖିଆ ରତ୍ନା ସିଂହ ଅଭିଯୋଗ କରିଛନ୍ତି ଯେ, ସେମାନଙ୍କ ମୋବାଇଲ୍ ଫୋନ୍ ଛଡ଼ାଇ ନିଆଯାଇଛି ଏବଂ ସେମାନଙ୍କୁ ନିଜ ଓକିଲଙ୍କ ସହ ପରାମର୍ଶ କରିବାକୁ ସୁଯୋଗ ଦିଆଯାଇ ନାହିଁ। ସେ ''ଏକ୍ସ''ରେ ଲେଖିଛନ୍ତି ଯେ ଡେରି ରାତି ପର୍ଯ୍ୟନ୍ତ ସେମାନଙ୍କୁ ଓକିଲଙ୍କୁ ଭେଟିବାକୁ ଦିଆଯାଇ ନଥିଲା ଏବଂ ରାତି ୩ଟାରେ ଏକ ବେସରକାରୀ ଗାଡ଼ିରେ ସେମାନଙ୍କୁ ପାର୍ଲାମେଣ୍ଟ ଷ୍ଟ୍ରିଟ୍ ପୁଲିସ ଷ୍ଟେସନକୁ ନିଆଯାଇଥିଲା।
