44 minutes ago
1
ARTICLE AD BOX
ନୂଆଦିଲ୍ଲୀ: ଭାରତ ସମେତ ସାରା ବିଶ୍ୱରେ କୋଟି କୋଟି ଲୋକଙ୍କ ଆସ୍ଥାର କେନ୍ଦ୍ର ସନ୍ଥ ପ୍ରେମାନନ୍ଦ ମହାରାଜଙ୍କ ସୁରକ୍ଷାକୁ ନେଇ ଏକ ନୂଆ ଦାବି ଉଠିଛି। ଗତ ଦୁଇ ଦିନ ମଧ୍ୟରେ ଏନେଇ ଦୁଇଟି ଚିଠି ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିକଟକୁ ପହଞ୍ଚିଛି। ଏହି ଚିଠିଗୁଡ଼ିକରେ ପ୍ରେମାନନ୍ଦ ମହାରାଜଙ୍କୁ ଜେଡ ପ୍ଲସ ସୁରକ୍ଷା ଦେବାକୁ ଦାବି କରାଯାଇଛି।
ଗତକାଲି ଶ୍ରୀକୃଷ୍ଣ ଜନ୍ମଭୂମି ସଂଘର୍ଷ ନ୍ୟାସର ଅଧ୍ୟକ୍ଷ ଦିନେଶ ଶର୍ମା ମୁଖ୍ୟମନ୍ତ୍ରୀ ଯୋଗୀଙ୍କୁ ଚିଠି ଲେଖିଥିଲେ। ଆଜି କିଛି ସନ୍ଥ ମଧ୍ୟ ପୁଣିଥରେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ପ୍ରେମାନନ୍ଦ ମହାରାଜଙ୍କୁ ସୁରକ୍ଷା ଯୋଗାଇଦେବାକୁ ଦାବି କରିଛନ୍ତି। ଏହି ଦାବିକୁ ନେଇ ଧାର୍ମିକ ନଗରୀ ବୃନ୍ଦାବନରେ ମଧ୍ୟ ଚର୍ଚ୍ଚା ଜୋର ଧରିଛି। ନିକଟରେ ପ୍ରେମାନନ୍ଦ ମହାରାଜଙ୍କ ଶିଷ୍ୟ ରସିକ ଦୁଲାରୀଙ୍କ ମୃତ୍ୟୁ ପରେ ଏହି ମାମଲା ଅଧିକ ଚର୍ଚ୍ଚାକୁ ଆସିଛି।
ପ୍ରେମାନନ୍ଦ ମହାରାଜଙ୍କ ସୁରକ୍ଷା ପାଇଁ କାହିଁକି ଉଠିଲା ଦାବି?
ପ୍ରେମାନନ୍ଦ ମହାରାଜଙ୍କ ରାଧା କେଳି କୁଞ୍ଜ ଆଶ୍ରମ ନିକଟରେ ତାଙ୍କ ଶିଷ୍ୟ ରସିକ ଦୁଲାରୀଙ୍କ ଆତ୍ମହତ୍ୟା ଘଟଣାର ରହସ୍ୟ ସମ୍ପୂର୍ଣ୍ଣ ଭାବେ ସମାଧାନ ହୋଇନାହିଁ। ଏହା ମଧ୍ୟରେ ଆଶ୍ରମରେ କିଛି ବିବାଦ ଥିବା ନେଇ ଆଲୋଚନା ହେଉଛି। ଆଶ୍ରମରେ ଦୁଇଟି ଗୋଷ୍ଠୀ ସକ୍ରିୟ ଥିବା ନେଇ ମଧ୍ୟ ଚର୍ଚ୍ଚା ରହିଛି। ଏଥିରୁ ଗୋଟିଏ ଗୋଷ୍ଠୀ ଭୂମାଫିଆଙ୍କ ସହ ମିଶି ଜମି ଦଖଲ କରୁଥିବା ଅଭିଯୋଗ ହୋଇଛି। ଏହା ପରେ ବୃନ୍ଦାବନର କିଛି ସନ୍ଥ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଚିଠି ଲେଖି ପ୍ରେମାନନ୍ଦ ମହାରାଜଙ୍କ ଜୀବନ ପ୍ରତି ବିପଦ ଥିବା ଦାବି କରିବା ସହ ତାଙ୍କୁ ଜେଡପ୍ଲସ ସୁରକ୍ଷା ଦେବାକୁ ଅନୁରୋଧ କରିଛନ୍ତି। ଅନ୍ୟପକ୍ଷରେ, କିଛି ଲୋକ ଅଭିଯୋଗ କରିଛନ୍ତି ଯେ ସେମାନଙ୍କ ପିଲାମାନେ ଆଶ୍ରମକୁ ଆସିବା ପରେ ନିଖୋଜ ହୋଇଯାଇଛନ୍ତି।
ବେଲବନ ଆଶ୍ରମରେ ଅଛନ୍ତି ସନ୍ଥ ପ୍ରେମାନନ୍ଦ
ରସିକ ଦୁଲାରୀଙ୍କ ମୃତ୍ୟୁ ଏବଂ ଆଶ୍ରମକୁ ନେଇ ଉଠୁଥିବା ପ୍ରଶ୍ନଗୁଡ଼ିକ ଯୋଗୁଁ ସନ୍ଥ ପ୍ରେମାନନ୍ଦ ମହାରାଜ ମର୍ମାହତ ହୋଇପଡ଼ିଛନ୍ତି। ଏହା ପରେ ସେ କେଳିକୁଞ୍ଜ ଆଶ୍ରମ ଛାଡ଼ି ବେଲବନ ସ୍ଥିତ ଆଶ୍ରମକୁ ଚାଲିଯାଇଥିବା ଜଣାପଡ଼ିଛି।ମୁଖ୍ୟମନ୍ତ୍ରୀ ଯୋଗୀଙ୍କୁ ଲେଖାଯାଇଥିବା ଚିଠିରେ ଏହା ମଧ୍ୟ ଉଲ୍ଲେଖ ରହିଛି ଯେ, ଭୂମାଫିଆ ଏବଂ ପ୍ରଭାବ ବିସ୍ତାରକୁ ନେଇ ଚାଲିଥିବା ବିବାଦରେ ସାମିଲ କିଛି ଲୋକ ମହାରାଜଙ୍କ ଛବିକୁ ଖରାପ କରିବାକୁ ଚାହୁଁଛନ୍ତି। ତେଣୁ ତାଙ୍କୁ କ୍ଷତି ପହଞ୍ଚାଇବାର ଆଶଙ୍କା ଥିବା ଦର୍ଶାଇ ପୂର୍ବରୁ ହିଁ ତାଙ୍କ ସୁରକ୍ଷା ବଢ଼ାଇବାକୁ ଦାବି କରାଯାଇଛି।
ମଧ୍ୟାହ୍ଣ ଭୋଜନ ବିଲ୍ ପାଇଁ ଲାଞ୍ଚ ନେଉଥିଲେ ପ୍ରଧାନଶିକ୍ଷକ, ମାଡ଼ିବସିଲା ଭିଜିଲାନ୍ସ
