1 week ago
5
ARTICLE AD BOX
ପୁଣେ: ମହାରାଷ୍ଟ୍ରର ପୁଣେ ଜିଲ୍ଲା ଅନ୍ତର୍ଗତ ଶିରୁରରେ ବାର୍ ମାଲିକ ହରିଶ ଓରଫ୍ ହରି ଦାଦାଭାଉ ଗଙ୍ଗାୱାଣେଙ୍କୁ ଗୁଳିକରି ହତ୍ୟା ଘଟଣାରେ ପୁଲିସ ୩ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ରୋହିତ ରବୀନ୍ଦ୍ର ସୋନାୱାଣେ, ଅନିକେତ ବିଲାସ ଗାଭାଣେ ଓ ଆଦିତ୍ୟ ଦାଦାସାହେବ ପାୱାର। ପୁଣେ ଗ୍ରାମୀଣ ପୁଲିସ ଶନିବାର ବିଳମ୍ବିତ ରାତିରେ ଅହିଲ୍ୟାନଗର ଜିଲ୍ଲାର ସୁପା ଟୋଲ୍ ପ୍ଲାଜା ନିକଟରୁ ସେମାନଙ୍କୁ ଧରିଥିବା ରବିବାର କହିଛି।
୩୩ ବର୍ଷୀୟ ହରିଶ ଶିରୁରର ପ୍ରୀତମ ପ୍ରକାଶ ନଗରର ବାସିନ୍ଦା ଥିଲେ। ସେ ଶିରୁରର ଡ. ବି.ଆର୍. ଆମ୍ବେଡ଼କର ନଗର ଅଞ୍ଚଳରେ ଏକ ବାର୍ ଓ ରେସ୍ତୋରାଁ ଚଳାଉଥିଲେ। ଶୁକ୍ରବାର ସକାଳ ପ୍ରାୟ ୬ଟା ୩୦ରେ ସେ ଜଣେ ବନ୍ଧୁଙ୍କ ସହ ମୋଟରସାଇକେଲରେ ଯାଉଥିବା ବେଳେ ଏକ ସଂକୀର୍ଣ୍ଣ ଗଳିରେ ୩ ଜଣ ତାଙ୍କୁ ଅଟକାଇଥିଲେ। ରୋହିତ ନିକଟରୁ ଦେଶୀ ପିସ୍ତଲରେ ଗୁଳି ଚଳାଇଥିବା ପୁଲିସ କହିଛି। ଗୁଳି ହରିଶଙ୍କ ଦେହରେ ବାଜିବା ପରେ ସେ ତଳେ ପଡ଼ିଯାଇଥିଲେ। ତାଙ୍କୁ ହସ୍ପିଟାଲ ନିଆଯାଇଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ। ତାଙ୍କ ସହ ଥିବା ବନ୍ଧୁ ବଞ୍ଚିଯାଇଥିଲେ।
ଆହୁରି ପଢନ୍ତୁ: Congress: କହ୍ନେୟାଙ୍କୁ ବେଣୁଗୋପାଳଙ୍କ କଡ଼ା ତାଗିଦ୍; କଂଗ୍ରେସର ରାତିଅଧିଆ ବୈଠକ
ପୁଲିସ ତଦନ୍ତ ଅନୁସାରେ, ହତ୍ୟା ପଛରେ ପୁରୁଣା ବିବାଦ ଥିବା ସନ୍ଦେହ କରାଯାଉଛି। ପ୍ରାୟ ୬ ମାସ ତଳେ ରୋହିତ ଓ ଅନିକେତ ହରିଶଙ୍କ ବାର୍କୁ ଯାଇଥିବା ବେଳେ ବିଲ୍ ପଇଠକୁ ନେଇ ବିବାଦ ହୋଇଥିଲା। ସେହି ସମୟରେ ହରିଶ ଉଭୟଙ୍କୁ ମାଡ଼ ମାରିଥିବା ପୁଲିସ କହିଛି। ଏହି ଘଟଣା ପରେ ଦୁଇ ପକ୍ଷ ମଧ୍ୟରେ ଶତ୍ରୁତା ରହିଥିଲା। ସିସିଟିଭି ଫୁଟେଜ୍ ଓ ଅନ୍ୟାନ୍ୟ ତଥ୍ୟ ଆଧାରରେ ପୁଲିସ ଅଭିଯୁକ୍ତମାନଙ୍କ ଗତିବିଧି ଠାବ କରିଥିଲା। ଶିରୁର ଥାନା ପୁଲିସ ଓ ଲୋକାଲ କ୍ରାଇମ୍ ବ୍ରାଞ୍ଚର ଟିମ୍ ମିଳିତ ଭାବେ ସେମାନଙ୍କୁ ଧରିଥିଲେ। ହତ୍ୟାରେ ବ୍ୟବହୃତ ଅସ୍ତ୍ର ଜବତ କରିବା ସହ ଘଟଣାର ସମ୍ପୂର୍ଣ୍ଣ କ୍ରମ ଓ ହତ୍ୟାର ପ୍ରକୃତ କାରଣ ଜାଣିବା ପାଇଁ ପୁଲିସ ତିନି ଅଭିଯୁକ୍ତଙ୍କୁ ପଚରାଉଚରା କରୁଛି।
