46 minutes ago
1
ARTICLE AD BOX
ମାଲକାନଗିରି: ମାଲକାନଗିରି ଜିଲ୍ଲାର ମାଥିଲି ବ୍ଲକ୍ରେ କାର୍ଯ୍ୟରତ ତଥା DRDA, ମାଲକାନଗିରିକୁ ସଂଲଗ୍ନ ଥିବା ସହକାରୀ ନିର୍ବାହୀ ଯନ୍ତ୍ରୀ (AEE) ଶିଶିର କୁମାର ଦାଶଙ୍କୁ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଓଡ଼ିଶା ଭିଜିଲାନ୍ସ ଗିରଫ କରିଛି। ତାଙ୍କୁ ଆଜି ବ୍ରହ୍ମପୁର ସ୍ଥିତ ଭିଜିଲାନ୍ସର ସ୍ୱତନ୍ତ୍ର ବିଚାରପତିଙ୍କ ଅଦାଲତରେ ହାଜର କରାଯିବ।
ଶିଶିର କୁମାର ଦାଶଙ୍କ ବିଭିନ୍ନ ସମ୍ପତ୍ତି ଉପରେ ଚଢ଼ାଉ ଓ ତଲାସି ବେଳେ ତାଙ୍କ ନିକଟରୁ ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଛି। ଏଥିରେ ୯,୩୦୦ ବର୍ଗଫୁଟ୍ ଅଞ୍ଚଳରେ ନିର୍ମିତ ୨ଟି ବହୁତଳ କୋଠା, ୬ଟି ଦାମୀ ପ୍ଲଟ୍, ୮୨ ଲକ୍ଷ ଟଙ୍କାର ଜମା, ଗୋଟିଏ ଚାରିଚକିଆ ଗାଡ଼ି ଆଦି ରହିଛି। ଏହି ସମ୍ପତ୍ତିଗୁଡ଼ିକର ଉତ୍ସ ସମ୍ପର୍କରେ ଶିଶିର କୁମାର ଦାଶ ସନ୍ତୋଷଜନକ ହିସାବ ଦେଇପାରିନଥିବା ଭିଜିଲାନ୍ସ ପକ୍ଷରୁ କୁହାଯାଇଛି।
ଏହି ଘଟଣାରେ ଶିଶିର କୁମାର ଦାଶଙ୍କ ବିରୋଧରେ ଦୁର୍ନୀତି ନିବାରଣ ଆଇନ ଅନୁଯାୟୀ ବ୍ରହ୍ମପୁର ଭିଜିଲାନ୍ସ ଥାନାରେ କେସ୍ ନଂ ୧୧/୨୦୨୬ ରୁଜୁ କରାଯାଇଛି।
ସୀମିତ ସରକାରୀ ଦରମାରେ ବିପୁଳ ସମ୍ପତ୍ତି ଠୁଳ କରିଛନ୍ତି ମାଲକାନଗିରି ଜିଲ୍ଲା ମାଥିଲି ବ୍ଲକ ସହକାରୀ ନିର୍ବାହୀ ଯନ୍ତ୍ରୀ ଶିଶିର କୁମାର ଦାଶ। ଭିଜିଲାନ୍ସର ୬ଟି ଟିମ୍ ଏକକାଳୀନ ତାଙ୍କର ୬ଟି ଠିକଣାରେ ଚଢ଼ଉ କରିଥିଲେ। ସହକାରୀ ନିର୍ବାହୀ ଯନ୍ତ୍ରୀ ଶ୍ରୀ ଦାଶ ଆୟ ବହିର୍ଭୂତ ସମ୍ପତ୍ତି ଠୁଳ କରିଥିବା ନେଇ ଭିଜିଲାନ୍ସକୁ କୌଣସି ସୂତ୍ରରୁ ସୂଚନା ମିଳିଥିଲା। ସମ୍ପତ୍ତି ଯାଞ୍ଚ ପାଇଁ ବ୍ରହ୍ମପୁର ଭିଜିଲାନ୍ସ ସ୍ବତନ୍ତ୍ର ଅଦାଲତରେ ଆବେଦନ କରାଯାଇଥିଲା। ବିଚାରପତି ସର୍ଚ୍ଚ ୱାରେଣ୍ଟ ଜାରି କରିବା ପରେ ରବିବାର ସକାଳୁ ଭୁବନେଶ୍ବର, ବ୍ରହ୍ମପୁର, ଗଞ୍ଜାମ ଓ ମାଲକାନଗିରିରେ ଏକାଧିକ ଟିମ୍ ତଲାସୀ ଆରମ୍ଭ କରିଥିଲେ। ଜଣେ ଅତିରିକ୍ତ ଏସ୍ପିଙ୍କ ନେତୃତ୍ବରେ ୫ଜଣ ଡିଏସ୍ପି, ୫ଜଣ ଇନ୍ସପେକ୍ଟର ଚଢ଼ଉ କରିଥିଲେ।
୨ କୋଠା, ୬ ମୂଲ୍ୟବାନ ପ୍ଲଟ୍, କାର୍ ଠାବ
ଭୁବନେଶ୍ବର ବରମୁଣ୍ଡାରେ ୪ ମହଲା କୋଠା, ବ୍ରହ୍ମପୁର ନୀଳାଚଳ ନଗରରେ ୨ ମହଲା କୋଠା, ଗଞ୍ଜାମ ଜିଲ୍ଲା ବାସୁଦେବପୁର (ଗୋବରା) ସ୍ଥିତ ଘର, ବ୍ରହ୍ମପୁର ଗଜପତିନଗର ସ୍ଥିତ ପୈତୃକ ଘର, ମାଲକାନଗିରିସ୍ଥିତ ଭଡ଼ାଘର ଏବଂ ମାଲକାନଗିରି ଡିଆର୍ଡିଏ କାର୍ଯ୍ୟାଳୟ ସ୍ଥିତ ଚାମ୍ବରରେ ଭିଜିଲାନ୍ସ ଟିମ୍ ତନ୍ନ ତନ୍ନ କରି ଯାଞ୍ଚ କରିଥିଲେ। ଘର ଓ କାର୍ଯ୍ୟାଳୟରୁ ଜମିଜମା ଦସ୍ତାବିଜ, ବ୍ୟାଙ୍କ ଓ ଡାକଘର ଜମା, ନିବେଶ ଏବଂ ଅନ୍ୟାନ୍ୟ ଆର୍ଥିକ କାରବାର ସଂପର୍କିତ କାଗଜପତ୍ର ମିଳିଛି। ଶିଶିର ଓ ତାଙ୍କ ପରିବାର ସଦସ୍ୟଙ୍କ ନାମରେ ଦୁଇଟି ବହୁତଳ କୋଠା ରହିଛି। ଭୁବନେଶ୍ୱର ବରମୁଣ୍ଡାରେ ୬୭୬୦ ବର୍ଗଫୁଟର ୪ ମହଲା କୋଠା, ବ୍ରହ୍ମପୁର ନୀଳାଚଳ ନଗରରେ ୨୫୦୦ ବର୍ଗଫୁଟର ୨ ମହଲା କୋଠା ଚିହ୍ନଟ ହୋଇଛି। ସେହିପରି ବ୍ରହ୍ମପୁରରେ ୩ଟି, ପୁରୀରେ ଗୋଟିଏ, ଖୋର୍ଦ୍ଧାରେ ଗୋଟିଏ ଏବଂ ଗଞ୍ଜାମ ଗୋବରା ଅଞ୍ଚଳରେ ଗୋଟିଏ ମୂଲ୍ୟବାନ ପ୍ଲଟ୍ ଠାବ ହୋଇଥିବା ଭିଜିଲାନ୍ସ ସୂତ୍ରରୁ ସୂଚନା ମିଳିଛି। ଏହାବ୍ୟତୀତ ଗୋଟିଏ ହୁଣ୍ଡାଇ ଆଇ-୧୦ କାର୍ ସହ ୩ଟି ଦୁଇଚକିଆ ଗାଡ଼ି ଠାବ ହୋଇଛି। ଚଢ଼ଉ ଜାରି ରହିଥିବାରୁ ସମ୍ପତ୍ତିର ପରିମାଣ ଆହୁରି ବଢ଼ିପାରେ ବୋଲି ଅନୁମାନ କରାଯାଉଛି।
