5 days ago
5
ARTICLE AD BOX
ନୂଆଦିଲ୍ଲୀ: ଉତ୍ତର-ପୂର୍ବ ରାଜ୍ୟରୁ ବିଜେପି ପାଇଁ ଖୁସି ଖବର ଆସିଛି। ମେଘାଳୟର ପ୍ରମୁଖ ଆଞ୍ଚଳିକ ଦଳ ୟୁନାଇଟେଡ୍ ଡେମୋକ୍ରାଟିକ୍ ପାର୍ଟି(ୟୁଡିପି)ର ଆଠ ଜଣ ବିଧାୟକ ବିଜେପିରେ ଯୋଗ ଦେଇଛନ୍ତି। ଏହା ଦ୍ବାରା ରାଜ୍ୟରେ ଦଳର ସ୍ଥିତି ମଜବୁତ ହୋଇଛି। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଏବଂ ବିଜେପି ମୁଖପାତ୍ର ସମ୍ବିତ ପାତ୍ରଙ୍କ ଉପସ୍ଥିତିରେ ବିଧାୟକମାନେ ଦିଲ୍ଲୀର ବିଜେପି ଦଳୀୟ ମୁଖ୍ୟାଳୟରେ ଦଳରେ ଯୋଗଦେଇଛନ୍ତି। ଫଳରେ ୧୨ ଜଣିଆ ୟୁଡିପିରେ ଏବେ ଆଉ ୪ ଜଣ ବିଧାୟକ ରହିଛନ୍ତି। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି,ବିଧାୟକମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମର ବିଜେପି ନେତୃତ୍ୱାଧୀନ ସରକାରଙ୍କ କାର୍ଯ୍ୟ ଯୋଗୁଁ ଗତ ୧୨ ବର୍ଷ ମଧ୍ୟରେ ଉତ୍ତର-ପୂର୍ବ ରାଜ୍ୟ ଏବଂ ମେଘାଳୟରେ ହୋଇଥିବା ପ୍ରଗତି ଏବଂ ପରିବର୍ତ୍ତନ ଦ୍ୱାରା ଗଭୀର ଭାବରେ ପ୍ରଭାବିତ ହୋଇ ଏଭଳି ପଦକ୍ଷେପ ଗ୍ରହଣ କରିଛନ୍ତି।
୧୨ ଜଣିଆ ୟୁଡିପିରେ ଏବେ ରହିଛନ୍ତି ଆଉ ୪ ଜଣ ବିଧାୟକ
ବିଜେପିରେ ଯୋଗ ଦେଇଥିବା ୮ ଜଣ ବିଧାୟକଙ୍କ ମଧ୍ୟରେ ଲାଖମେନ୍ ରିମ୍ବୁଇ,ପିଅସ୍ ମାର୍ଭେନ୍,କିରମେନ୍ ଶିଲା,ମର୍ଟଲବୋର୍ନ ସିଏମ୍,ମାଥ୍ୟୁ କୁର୍ବାହ,ଓଲାନ ସିଂହ ସୁଇନ୍,ବାଲାଜିଦ କୁପର ସିନରେମ୍ ଏବଂ ସିନସାର୍ ଲିଙ୍ଗଡୋ ଥାବାହ୍ ଅଛନ୍ତି। ଏହି ଅବସରରେ ସମ୍ବିତ ପାତ୍ର କହିଛନ୍ତି, ଲଖମେନ ରିମ୍ବୁଇ ବିଜେପିରେ ଯୋଗ ଦେଇଛନ୍ତି। ସେ ତିନି ଥର ବିଧାୟକ ହୋଇଛନ୍ତି। ଲଖମେନ ରିମ୍ବୁଇ ୨୦୦୮, ୨୦୧୮ ଏବଂ ୨୦୨୩ରେ ବିଧାୟକ ହୋଇଥିଲେ। ୨୦୧୮ ରୁ ୨୦୨୩ ପର୍ଯ୍ୟନ୍ତ, ଲଖମେନ ରିମ୍ବୁଇ ଶିକ୍ଷା, ଜଙ୍ଗଲ ଏବଂ ପରିବେଶ, ଗୃହ ଏବଂ ପୁଲିସ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ୨୦୨୫ ରୁ ବର୍ତ୍ତମାନ ପର୍ଯ୍ୟନ୍ତ, ସେ ଶିକ୍ଷା, ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ଏବଂ ଆଇନ ମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି।
ପାତ୍ର କହିଛନ୍ତି, ଆମ ସହିତ ଜଣେ ୩୫ ବର୍ଷୀୟ ବିଧାୟକ ପାୟସ୍ ମାର୍ଭେନ୍ ମଧ୍ୟ ଯୋଗଦେଇଛନ୍ତି। ସେ ୨୦୧୮ ଏବଂ ୨୦୨୩ ରେ ଦୁଇଥର ନିର୍ବାଚିତ ହୋଇଥିଲେ। ସେ ବର୍ତ୍ତମାନ ମେଘାଳୟ ସରକାରୀ ନିର୍ମାଣ ନିଗମର ଅଧ୍ୟକ୍ଷ ଅଛନ୍ତି। ଏହା ସହିତ କିର୍ମେନ୍ ଶିଲା ମଧ୍ୟ ଅଛନ୍ତି। ସେ ୨୦୧୮ ଏବଂ ୨୦୨୩ରେ ଦୁଇଥର ନିର୍ବାଚିତ ହୋଇଥିଲେ। ସେ ୨୦୨୩ ରୁ ୨୦୨୫ ପର୍ଯ୍ୟନ୍ତ ବିଧାୟକ ଭାବରେ କାର୍ଯ୍ୟ କରି ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ମନ୍ତ୍ରୀ ଭାବରେ କାର୍ଯ୍ୟ କରିଥିଲେ।
