1 hour ago
2
ARTICLE AD BOX
କାମ୍ପଲା: ଉଗାଣ୍ଡାର ଆଦିବାସୀ ରାଜା, ଓୟୋ ନିମ୍ବା କାବାମ୍ବା ଇଗୁରୁ ରୁକିଡି ଚତୁର୍ଥଙ୍କର ୩୪ ବର୍ଷ ବୟସରେ ମୃତ୍ୟୁ ଘଟିଛି। ସେ ବିଶ୍ୱର ସବୁଠାରୁ କମ୍ ବୟସର ରାଜା ଥିଲେ ମାତ୍ର ତିନି ବର୍ଷ ବୟସରେ ସେ ସିଂହାସନ ଆରୋହଣ କରିଥିଲେ। ଓୟୋ ନିମ୍ବାଙ୍କ ମୃତ୍ୟୁର କାରଣ ଏପର୍ଯ୍ୟନ୍ତ ସରକାରୀ ଭାବରେ ଘୋଷଣା କରାଯାଇ ନାହିଁ। ଉଗାଣ୍ଡାର ଟୋରୋ ରାଜ୍ୟର ରାଜା ଓୟୋ ନିମ୍ବାଙ୍କ ମୃତ୍ୟୁ ସମ୍ପର୍କରେ ପ୍ରଧାନମନ୍ତ୍ରୀ କାଲଭିନ୍ ୱୋମିରେ ଆକିକି ଶୁକ୍ରବାର ୨୮ ଅଗଷ୍ଟରେ ଘୋଷଣା କରିଥିଲେ। ସର୍ବକନିଷ୍ଠ ରାଜା ଓୟୋ ନିମ୍ବା କାବାମ୍ବା ଇଗୁରୁ ରୁକିଡି ଚତୁର୍ଥଙ୍କର ପ୍ରକୃତରେ ଗୁରୁବାର ୨୭ ଅଗଷ୍ଟରେ ଦେହାନ୍ତ ହୋଇଥିଲା। ରାଜାଙ୍କ ଦେହାନ୍ତର ଖବର ସେୟାର କରି ଟୋରୋ ରାଜ୍ୟ ପ୍ରଧାନମନ୍ତ୍ରୀ କେଲଭିନ୍ ଆର୍ମଷ୍ଟ୍ରଙ୍ଗ ରୱାମିରେ ଆକିକି କହିଛନ୍ତି, ଗମ୍ଭୀର ଦୁଃଖ ଏବଂ ଭାରାକ୍ରାନ୍ତ ହୃଦୟରେ, ମୁଁ ମହାମହିମ, ଟୋରୋର ଓମୁକାମା, ରାଜା ଓୟୋ ନିମ୍ବା କାବାମ୍ବା ଇଗୁରୁ ରୁକିଡି ଚତୁର୍ଥଙ୍କ ଦେହାନ୍ତ ଘୋଷଣା କରୁଛି। ଆକିକି କହିଛନ୍ତି, ରାଜାଙ୍କର ସ୍ଥାନୀୟ ସମୟ ପ୍ରାୟ ରାତି ୧୦ଟାରେ ଦେହାନ୍ତ ଘଟିଥିଲା।
କମ୍ ବୟସ୍କ ରାଜା ଭାବରେ ସ୍ୱୀକୃତି
ରାଜା ଓୟୋ ନିମ୍ବା ୧୬ ଏପ୍ରିଲ ୧୯୯୫ରେ ପଶ୍ଚିମ ଉଗାଣ୍ଡାର ଟୁରୋ ରାଜପରିବାରରେ ଜନ୍ମଗ୍ରହଣ କରିଥିଲେ। ସେ ତାଙ୍କ ପିତା, ରାଜା ପାଟ୍ରିକ୍ ଡେଭିଡ୍ ମାଥ୍ୟୁ କାବୋୟୋ ଓଲିମି ତୃତୀୟଙ୍କ ମୃତ୍ୟୁର କିଛି ସପ୍ତାହ ପରେ ୧୨ ସେପ୍ଟେମ୍ବର ୧୯୯୫ରେ ଟୁରୋ ସିଂହାସନ ଆରୋହଣ କରିଥିଲେ। ୧୮ ବର୍ଷ ବୟସରେ ୨୦୧୦ରେ ଆନୁଷ୍ଠାନିକ ଭାବରେ ତାଙ୍କର ରାଜ୍ୟାଭିଷେକ କରାଯାଇଥିଲା। ସେ ପ୍ରାୟ ୩୧ ବର୍ଷ ଧରି ଟୋରୋ ରାଜ୍ୟ ଶାସନ କରିଥିଲେ। କୁହାଯାଉଛି ଯେ, ଓୟୋ ବିବାହ କରି ନଥିଲେ। ଜଣେ ସମ୍ରାଟ ହେବା ସତ୍ତ୍ୱେ, ତାଙ୍କର ବ୍ୟକ୍ତିଗତ ଜୀବନ ଗୁପ୍ତ ରହିଥିଲା। ତାଙ୍କର ଏକ ପୁଅ ଥିବା ଜଣାପଡ଼ିଛି। ତେବେ ତାଙ୍କ ସ୍ତ୍ରୀ କିମ୍ବା ଅନ୍ୟ କୌଣସି ସାଥୀଙ୍କ ବିଷୟରେ କୌଣସି ରେକର୍ଡ ନାହିଁ। ଆକିକିଙ୍କ ଅନୁଯାୟୀ, ଓୟୋଙ୍କ ପୁଅ ତାଙ୍କର ପରବର୍ତ୍ତୀ ଉତ୍ତରାଧିକାରୀ ହେବେ, ଯାହାଙ୍କ ପରିଚୟ ଉପଯୁକ୍ତ ସମୟରେ ଆନୁଷ୍ଠାନିକ ଭାବରେ ପ୍ରକାଶ କରାଯିବ। ତେବେ ଏନେଇ ସସପେନ୍ସ ଜାରି ରହିଛି।
ଯଦିଓ ରାଜାଙ୍କ ମୃତ୍ୟୁର କାରଣ ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ, ତେବେ ଗଣମାଧ୍ୟମ ଅନୁଯାୟୀ, ସେ ଗୁରୁତର ଅସୁସ୍ଥ ଥିଲେ ଏବଂ ଆମେରିକାରେ ଚିକିତ୍ସାଧୀନ ଥିଲେ। ତାଙ୍କ ସ୍ୱାସ୍ଥ୍ୟ ଅବସ୍ଥା ବିଷୟରେ ସୂଚନା ଗୋପନୀୟ ରଖାଯାଇଛି। ରାଜା ଓୟୋଙ୍କୁ ଗିନିଜ୍ ୱାର୍ଲ୍ଡ ରେକର୍ଡସ୍ ଦ୍ୱାରା ବିଶ୍ୱର ସବୁଠାରୁ କମ୍ ବୟସ୍କ ରାଜା ଭାବରେ ସ୍ୱୀକୃତି ଦିଆଯାଇଥିଲା।
କିଙ୍ଗ ଓୟୋ ଉଗାଣ୍ଡାରେ ଆନୁଷ୍ଠାନିକ ଭାବେ ସ୍କୁଲରେ ନାମ ଲେଖାଇବା ପୂର୍ବରୁ ଘରେ ଶିକ୍ଷା ଗ୍ରହଣ କରିଥିଲେ। ସେ ଆଗା ଖାନ ପ୍ରାଥମିକ ବିଦ୍ୟାଳୟରେ ପଢିଥିଲେ ଏବଂ ଉଗାଣ୍ଡାରେ ତାଙ୍କର ମାଧ୍ୟମିକ ଶିକ୍ଷା ସମାପ୍ତ କରିଥିଲେ। ସେ ୨୦୧୦ ରୁ ୨୦୧୩ ପର୍ଯ୍ୟନ୍ତ ୟୁକେର ୱିନଚେଷ୍ଟର ବିଶ୍ୱବିଦ୍ୟାଳୟରେ ବ୍ୟବସାୟ ପରିଚାଳନା ମଧ୍ୟ ଅଧ୍ୟୟନ କରି ତାଙ୍କର ସ୍ନାତକ ଶିକ୍ଷା ସମାପ୍ତ କରିଥିଲେ। ସ୍ୱର୍ଗତ ରାଜା ଓୟୋ ନିମ୍ବାଙ୍କ ଆର୍ଥିକ ବିବରଣୀ, ଯେପରିକି ତାଙ୍କର ମୋଟ ସମ୍ପତ୍ତି ଏବଂ ନିବେଶ, ବର୍ତ୍ତମାନ ଗୁପ୍ତ ରଖାଯାଇଛି। ବୟସ ବଢ଼ିବା ସହିତ, ବିଶ୍ୱର ସବୁଠାରୁ କନିଷ୍ଠ ରାଜା ଯୁବ ସଶକ୍ତିକରଣ, ଶିକ୍ଷା, ଏଚଆଇଭି/ଏଡସ୍ ସଚେତନତା, ପରିବେଶ ସୁରକ୍ଷା, କୃଷି ଏବଂ ସମ୍ପ୍ରଦାୟ ବିକାଶରେ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଥିଲେ। ୨୦୧୬ରେ, ତାଙ୍କୁ ପୂର୍ବ ଏବଂ ଦକ୍ଷିଣ ଆଫ୍ରିକାର ଯୁବପିଢ଼ିଙ୍କ ମଧ୍ୟରେ ଏଚଆଇଭି/ଏଡସ୍ ପାଇଁ ୟୁଏନଏଆଇଡି ଚାମ୍ପିଅନ୍ ଭାବରେ ନାମିତ କରାଯାଇଥିଲା।
