2 hours ago
1
ARTICLE AD BOX
ରାସ୍ତାକଡ଼ରେ ଜମିଥିବା ଆବର୍ଜନା, ପ୍ଲାଷ୍ଟିକ୍ରେ ଭରିଯାଇଥିବା ନାଳ, ଶୁଖିଯାଉଥିବା ଜଳାଶୟ ଓ କମିଯାଉଥିବା ସବୁଜିମା କେବଳ ପରିବେଶର ସମସ୍ୟା ନୁହେଁ, ଏସବୁ ମାନବ ଜୀବନ ଓ ଆମ ଭବିଷ୍ୟତ ପାଇଁ ଏକ ବଡ଼ ଚେତାବନୀ। ଏହି ସମୟରେ ପରିବେଶ ସୁରକ୍ଷାକୁ କେବଳ ଆଲୋଚନାରେ ସୀମିତ ନ ରଖି, ଲୋକଙ୍କୁ ସିଧାସଳଖ କାମରେ ଯୋଡ଼ିବାର ପ୍ରୟାସ କରୁଛି ‘ଆର୍ଥ୫ଆର୍’। ମୁମ୍ବାଇରୁ ଆରମ୍ଭ ହୋଇଥିବା ଆର୍ଥ୫ଆର୍ ଏବେ ଏକ ବଡ଼ ପରିବେଶ ଅଭିଯାନରେ ପରିଣତ ହୋଇଛି। ଏହାର ଲକ୍ଷ୍ୟ କେବଳ ଗଛ ଲଗାଇବା କିମ୍ବା ଆବର୍ଜନା ସଫା କରିବା ନୁହେଁ, ସ୍ଥାନୀୟ ଲୋକଙ୍କୁ ସାମିଲ କରି ପରିବେଶ ସୁରକ୍ଷାକୁ ଦୈନନ୍ଦିନ ଜୀବନର ଏକ ଅଂଶ କରିବା ଏହାର ମୁଖ୍ୟ ଉଦ୍ଦେଶ୍ୟ। ସଂସ୍ଥାର ପ୍ରତିଷ୍ଠାତା ଓ ସିଇଓ ସୌରଭ ଗୁପ୍ତାଙ୍କ ପରିବେଶ ପ୍ରତି ଚିନ୍ତା ଏହି ଅଭିଯାନର ପ୍ରମୁଖ ପ୍ରେରଣା। ସେ ପ୍ରାୟ ୫୦ହଜାର କିଲୋମିଟର ସାଇକେଲ୍ ଯାତ୍ରା କରି ଏସିଆ, ଆଫ୍ରିକା ଓ ୟୁରୋପର ବିଭିନ୍ନ ଅଞ୍ଚଳର ପରିବେଶୀୟ ସମସ୍ୟାକୁ ନିକଟରୁ ଦେଖିଥିଲେ। ଏହାପରେ ସେ ସାମୂହିକ ଭାବେ ପରିବେଶ ସୁରକ୍ଷା ପାଇଁ କାମ କରିବାର ଆବଶ୍ୟକତା ବୁଝିଥିଲେ।
KIIT: କିଟ୍ ଉଚ୍ଚ ମାଧ୍ୟମିକ ବିଦ୍ୟାଳୟର ପ୍ରତିଷ୍ଠା ଦିବସ
ଆର୍ଥ୫ଆର୍ ଆବର୍ଜନା ପରିଚାଳନା, ବୃକ୍ଷରୋପଣ, ଜଳ ଓ ନଦୀ ସଂରକ୍ଷଣ, ସ୍ଥାୟୀ କୃଷି ଏବଂ ଆବର୍ତ୍ତନଶୀଳ ଅର୍ଥନୀତି ଭଳି ବିଭିନ୍ନ କ୍ଷେତ୍ରରେ କାମ କରୁଛି। ବର୍ଜ୍ୟକୁ କେବଳ ଆବର୍ଜନା ଭାବେ ନଦେଖି, ତାହାକୁ ସମ୍ପଦ ଓ ଜୀବିକାର ସୁଯୋଗରେ ପରିଣତ କରିବା ଏହାର ଏକ ବିଶେଷ ଦିଗ। ସଂସ୍ଥାର ଦାବି ଅନୁସାରେ, ଏହାର କାର୍ଯ୍ୟକଳାପ ୬୫ଟି ଦେଶ ପର୍ଯ୍ୟନ୍ତ ପହଞ୍ଚିଛି। ପରିବେଶ ସୁରକ୍ଷା କେବଳ ସରକାର କିମ୍ବା କୌଣସି ସଂସ୍ଥାର ଦାୟିତ୍ୱ ନୁହେଁ, ପ୍ରତ୍ୟେକ ନାଗରିକଙ୍କ ଛୋଟ ଛୋଟ ପଦକ୍ଷେପ- ପ୍ଲାଷ୍ଟିକ ବ୍ୟବହାର କମାଇବା, ଆବର୍ଜନା ଠିକ୍ ଭାବେ ପକାଇବା, ଗଛ ଲଗାଇବା ଓ ଜଳ ସଂରକ୍ଷଣ ମିଶି ବଡ଼ ପରିବର୍ତ୍ତନ ଆଣିପାରେ। ଏହି ସାମୂହିକ ପରିବର୍ତ୍ତନର ସ୍ୱପ୍ନକୁ ରୂପ ଦେବାର ଏକ ସଫଳ ଉଦାହରଣ ହେଉଛି ‘ଆର୍ଥ୫ଆର୍’।
