1 day ago
1
ARTICLE AD BOX
ନୂଆଦିଲ୍ଲୀ: କେନ୍ଦ୍ର ସରକାରଙ୍କ ପ୍ରସ୍ତାବିତ ‘ବିକଶିତ ଭାରତ ଶିକ୍ଷା ଅଧିଷ୍ଠାନ (ଭିବିଏସ୍ଏ) ବିଲ୍, ୨୦୨୫’କୁ ଯାଞ୍ଚ କରୁଥିବା ସଂସଦୀୟ ଯୁଗ୍ମ କମିଟି (ଜେପିସି)ର ସୋମବାର ହେବାକୁ ଥିବା ଗୁରୁତ୍ୱପୂର୍ଣ୍ଣ ବୈଠକକୁ ବାତିଲ କରାଯାଇଛି। ଏହି ବୈଠକରେ କମିଟିର ଚୂଡ଼ାନ୍ତ ରିପୋର୍ଟକୁ ଅନୁମୋଦନ କରାଯିବାର କାର୍ଯ୍ୟକ୍ରମ ଥିଲା। ବୈଠକ ବାତିଲ ହେବାରୁ ରିପୋର୍ଟ ଗ୍ରହଣ ପ୍ରକ୍ରିୟା ମଧ୍ୟ ଅଟକି ଯାଇଛି। ଫଳରେ ଜୁଲାଇ ୨୦ରୁ ଆରମ୍ଭ ହେଉଥିବା ସଂସଦର ମୌସୁମୀ ଅଧିବେଶନ ପୂର୍ବରୁ ରିପୋର୍ଟ ଦାଖଲ ହେବା ନେଇ ଅନିଶ୍ଚିତତା ସୃଷ୍ଟି ହୋଇଛି।
ବିଜେପି ସାଂସଦ ଡି ପୁରନ୍ଦେଶ୍ୱରୀଙ୍କ ଅଧ୍ୟକ୍ଷତାରେ ଗଠିତ ୩୧ ସଦସ୍ୟ ବିଶିଷ୍ଟ ଏହି ଜେପିସିବିଲ୍ର ବିଭିନ୍ନ ବ୍ୟବସ୍ଥାକୁ ଦୀର୍ଘ ଦିନ ଧରି ଯାଞ୍ଚ କରୁଛି। ସୂତ୍ର ଅନୁସାରେ, ରିପୋର୍ଟର କେତେକ ସୁପାରିସକୁ ନେଇ ସଦସ୍ୟମାନଙ୍କ ମଧ୍ୟରେ ମତଭେଦ ରହିଥିବାରୁ ଏବଂ ଅଧିକ ଆଲୋଚନାର ଆବଶ୍ୟକତା ଅନୁଭବ କରାଯାଇଥିବାରୁ ବୈଠକକୁ ବାତିଲ କରାଯାଇଛି। ସରକାର ବିରୋଧୀ ଦଳଗୁଡ଼ିକ ସହ ସହମତି ଗଠନ ପାଇଁ ଉଦ୍ୟମ କରୁଥିବା ବେଳେ ଏହି ନିଷ୍ପତ୍ତି ନିଆଯାଇଥିବା ଚର୍ଚ୍ଚା ହେଉଛି।
ଭିବିଏସ୍ଏ ବିଲ୍ର ଉଦ୍ଦେଶ୍ୟ ହେଉଛି ଦେଶର ଉଚ୍ଚଶିକ୍ଷା କ୍ଷେତ୍ର ପାଇଁ ଏକକ ନିୟାମକ ସଂସ୍ଥା ଗଠନ କରିବା। ଏହି ବିଲ୍ କାର୍ଯ୍ୟକାରୀ ହେଲେ ବିଶ୍ୱବିଦ୍ୟାଳୟ ମଞ୍ଜୁରି ଆୟୋଗ (ୟୁଜିସି), ଅଖିଳ ଭାରତୀୟ ବୈଷୟିକ ଶିକ୍ଷା ପରିଷଦ (ଏଆଇସିଟିଇ) ଓ ଜାତୀୟ ଶିକ୍ଷକ ଶିକ୍ଷା ପରିଷଦ (ଏନ୍ସିଟିଇ) ପରି ଏକାଧିକ ନିୟାମକ ସଂସ୍ଥା ସ୍ଥାନରେ ଏକ ଛତା ତଳେ ନୂଆ ବ୍ୟବସ୍ଥା ଗଠନ କରାଯିବ।
ଜେପିସି ଏହି ବିଲ୍ ଉପରେ ଆଇଆଇଟି, ଆଇଆଇଏମ୍, ବିଭିନ୍ନ ରାଜ୍ୟ ସରକାର, ବିଶ୍ୱବିଦ୍ୟାଳୟ, ଶିକ୍ଷାବିତ୍ ଓ ଅନ୍ୟ ସମ୍ପୃକ୍ତ ପକ୍ଷଙ୍କ ମତାମତ ମଧ୍ୟ ଗ୍ରହଣ କରିଛି। ବୈଠକ ବାତିଲ ହେବା ପରେ ରିପୋର୍ଟ ଗ୍ରହଣ ପାଇଁ ନୂଆ ତାରିଖ ଘୋଷଣା କରାଯାଇନାହିଁ। ତେବେ ସଂସଦ ଅଧିବେଶନ ସମୟରେ କିମ୍ବା ତା’ ପୂର୍ବରୁ କମିଟି ପୁଣି ବୈଠକ କରି ରିପୋର୍ଟକୁ ଚୂଡ଼ାନ୍ତ ରୂପ ଦେବାକୁ ଉଦ୍ୟମ କରିପାରେ। ମତଭେଦ ଜାରି ରହିଲେ ବିଲ୍କୁ ସଂସଦରେ ଉପସ୍ଥାପନ କରିବା ପ୍ରକ୍ରିୟାରେ ଆହୁରି ବିଳମ୍ବ ହେବାର ସମ୍ଭାବନା ରହିଛି।
