1 hour ago
1
ARTICLE AD BOX
ନୂଆଦିଲ୍ଲୀ: ଦିଲ୍ଲୀର ଜନ୍ତର-ମନ୍ତର ହେଉ କିମ୍ବା ମହାରାଷ୍ଟ୍ରର ରାଜରାସ୍ତା, ଛାତ୍ର ଆନ୍ଦୋଳନର ନିଆଁ ଚାରିଆଡ଼େ ବ୍ୟାପିବାରେ ଲାଗିଛି। ବିଶେଷକରି CJP ର କର୍ମୀ ଏବଂ ସାଧାରଣ ଛାତ୍ରମାନେ ଯେତେବେଳେ ସଂସଦ ଅଭିମୁଖେ ମାର୍ଚ୍ଚ କରୁଛନ୍ତି, ସେତେବେଳେ ସେମାନଙ୍କୁ ପୋଲିସର ବାଧା ଏବଂ ପ୍ରବଳ ସଂଘର୍ଷର ସାମ୍ନା କରିବାକୁ ପଡ଼ୁଛି । କିନ୍ତୁ ଏହି ସଂଘର୍ଷ ମଧ୍ୟରେ ଏକ ଆଶ୍ଚର୍ଯ୍ୟଜନକ ତଥା ମାନବିକତାର ଚିତ୍ର ସାମ୍ନାକୁ ଆସିଛି। ଶହ ଶହ ପ୍ରଦର୍ଶନକାରୀଙ୍କ ପାଇଁ ଖାଦ୍ୟ ଏବଂ ପାଣିର ବ୍ୟବସ୍ଥା କିଏ କରୁଛି? ଆନ୍ଦୋଳନ କାରୀଙ୍କ ପାଇଁ ସ୍ବଗି ଏବଂ ଜୋମାଟରୁ ଦିନକୁ ଶହ ଶହ ଖାଦ୍ୟ ପାର୍ସଲ ଆସୁଛି । କିନ୍ତୁ ପଠାଉଥିବା ବ୍ୟକ୍ତିଙ୍କର ନାଁ କି ଠିକଣା ନାହିଁ।
କୁହାଯାଉଛି ଏହି ସହାୟତା କୌଣସି ବଡ଼ ରାଜନୈତିକ ପାଣ୍ଠିରୁ ଆସୁନାହିଁ, ବରଂ ଦେଶର ବିଭିନ୍ନ କୋଣରେ ରହୁଥିବା ସାଧାରଣ ଜନତା ଏହି ଖାଦ୍ୟ ପଠାଉଛନ୍ତି। ଏହି ଖାଦ୍ୟ ପାର୍ସଲରେ ଚା, ସିଙ୍ଗଡ଼ାଠୁ ଆରମ୍ଭ କରି ବିରିୟାନି , ପିଜା ମଧ୍ୟ ସାମିଲ ଅଛି । ସାରା ଦେଶର ଏହି ଅଜ୍ଞାତ ସମର୍ଥକ ମାନେ ନିଜେ ପ୍ରଦର୍ଶନରେ ସାମିଲ ନହୋଇ ଖାଦ୍ୟ ପୁଡ଼ିଆ ପଠାଇ ଆନ୍ଦୋଳନକୁ ସମର୍ଥନ ଜଣାଉଛନ୍ତି । ଜଣେ ଡେଲିଭରୀ ବୟ କହିଛନ୍ତି ଅର୍ଡର କରିଥିବା ବ୍ୟକ୍ତି ଜଣଙ୍କ ଖାଦ୍ୟ ଅର୍ଡର କରି ଆମକୁ କହିଛନ୍ତି ଯେ ଏହାକୁ ଜନ୍ତର-ମନ୍ତରରେ ଥିବା ସମସ୍ତ ଭୋକିଲା ଲୋକଙ୍କ ମଧ୍ୟରେ ବାଣ୍ଟି ଦେବା ପାଇଁ। ଏହାର ପେମେଣ୍ଟ ଅନଲାଇନ୍ ମାଧ୍ୟମରେ ଦିଆସରିଛି। ଯାହାର ଭିଡିଓ ଖୁବ୍ ଭାଇରାଲ ହେଉଛି ।
ତେବେ ଏତେ ମାତ୍ରାରେ ଖାଦ୍ୟ ଆସି ଧାରଣାସ୍ଥଳରେ ପହଞ୍ଚୁଛି ଯେ ତାହା ନଷ୍ଟ ହେଉଛି। ତେଣୁ କକ୍ରୋଚ୍ ଜନତା ପାର୍ଟି ନିଜର ଅଫିସିଆଲ X ଆକାଉଣ୍ଟରେ ପୋଷ୍ଟ କରି କହିଛି ଯେ ”ଆମ ପାଖରେ ଆଜି ପାଇଁ ଯଥେଷ୍ଟ ଖାଦ୍ୟ ଅଛି! ଦୟାକରି ଆଉ ଅଧିକ ଖାଦ୍ୟ ପଠାନ୍ତୁ ନାହିଁ, କାରଣ ଆମେ ଏହା ସୁନିଶ୍ଚିତ କରିବାକୁ ଚାହୁଁଛୁ ଯେ ଯେପରି କିଛି ବି ଖାଦ୍ୟ ନଷ୍ଟ ନ ହେଉ,”। ବିକ୍ଷୋଭ ପ୍ରଦର୍ଶନ ସ୍ଥଳରୁ ଖାଦ୍ୟ ଦାନ ଅଭିଯାନ ସମ୍ପର୍କିତ ଅନେକ ଇନଷ୍ଟାଗ୍ରାମ ରିଲ୍ସ ଏବଂ ଏକ୍ସ ପୋଷ୍ଟ ସାମ୍ନାକୁ ଆସିଛି।
ଅଧିକ ପଢନ୍ତୁ: CJP Nationwide Protest: ଦେଶବ୍ୟାପୀ ‘ସିଜେପି’ର ଆନ୍ଦୋଳନ ଆହ୍ବାନ
ଜଣେ ୟୁଜର ଲେଖିଛନ୍ତି: "ଗଣତନ୍ତ୍ର ମରିଯାଇଛି, କିନ୍ତୁ ମାନବିକତା ଏବେ ବି ଜୀବିତ ଅଛି। ତେବେ ଏହି ଗୁମନାମ ଦାନଦାତାମାନଙ୍କ ସହାୟତା ପ୍ରମାଣ କରୁଛି ଯେ,ଏହି ଆନ୍ଦୋଳନ କେବଳ କିଛି ଛାତ୍ରଙ୍କର ନୁହେଁ, ବରଂ ଏହା ଏକ ଜନ-ଆନ୍ଦୋଳନରେ ପରିଣତ ହୋଇଛି। ଯେତେବେଳେ ସରକାର କିମ୍ବା ପୋଲିସ ପ୍ରଶାସନ ଛାତ୍ରମାନଙ୍କୁ ଦମନ କରିବାକୁ ଚେଷ୍ଟା କରୁଛନ୍ତି, ସେତେବେଳେ ସାଧାରଣ ଜନତାଙ୍କ ଏହି 'ଅଦୃଶ୍ୟ ସମର୍ଥନ' ସେମାନଙ୍କ ମନୋବଳକୁ ଦ୍ୱିଗୁଣିତ କରୁଛି । ଖାଦ୍ୟର ଏହି ନିରନ୍ତର ସ୍ରୋତ ଦର୍ଶାଉଛି ଯେ, ଯୁବପିଢ଼ିଙ୍କ ନ୍ୟାୟ ପାଇଁ ଆଜି ପୂରା ଦେଶ ଏକଜୁଟ ହୋଇଛି। ମାନବିକତାର ଏହି ଉଦାହରଣ ଆଜି ସୋସିଆଲ ମିଡିଆରେ ମଧ୍ୟ ଖୁବ୍ ପ୍ରଶଂସା ସାଉଁଟୁଛି।
