52 minutes ago
1
ARTICLE AD BOX
ଭବିଷ୍ୟତରେ ରାସ୍ତାରେ ଚାଲୁଥିବା ଗାଡ଼ିଗୁଡ଼ିକ ପରସ୍ପରକୁ ସୂଚନା ପଠାଇପାରିବେ। ଏହା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ସତ ହେବାକୁ ଯାଉଛି। ନୂଆ ଭିଟୁଭି (ଭେଇକଲ୍-ଟୁ-ଭେଇକଲ୍) ପ୍ରଯୁକ୍ତି ମାଧ୍ୟମରେ ଏହା ସମ୍ଭବ ହେବ। ସଡ଼କ ଦୁର୍ଘଟଣା କମାଇବା ଓ ଯାତ୍ରାକୁ ସୁରକ୍ଷିତ କରିବା ପାଇଁ ଭାରତ ସରକାର ଏହି ପ୍ରଯୁକ୍ତି ଆଣିବାକୁ ଯୋଜନା କରୁଛନ୍ତି। ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟର ଡ୍ରାଫ୍ଟ ନିୟମ ଅନୁସାରେ, ୧ ଅକ୍ଟୋବର ୨୦୨୮ ପରେ ତିଆରି ହେବାକୁ ଥିବା କାର୍, ବାଇକ୍, ବସ୍ ଓ ଟ୍ରକ୍ରେ ଏହି ବ୍ୟବସ୍ଥା ଲାଗୁ ହୋଇପାରେ।
Media workshop: ସଠିକ୍ ସୂଚନା ହିଁ ସରକାର ଓ ଜନତାଙ୍କ ମଧ୍ୟରେ ବିଶ୍ୱାସର ଆଧାର: ଅଖିଳ କୁମାର ମିଶ୍ର
ଭିଟୁଭି କ’ଣ?
ଭିଟୁଭି ହେଉଛି ଏକ ବେତାର (ଓୟାର୍ଲେସ୍) ପ୍ରଯୁକ୍ତି। ଏହା ସାହାଯ୍ୟରେ ଗୋଟିଏ ଗାଡ଼ି ଅନ୍ୟ ଗାଡ଼ିକୁ ନିଜର ଗତି, ଦିଗ, ସ୍ଥାନ ଓ ବ୍ରେକ୍ ଲଗାଇବା ଭଳି ସୂଚନା ପଠାଇପାରେ। ଏହି କାମ ପାଇଁ ମୋବାଇଲ୍ ନେଟ୍ୱର୍କର ଆବଶ୍ୟକତା ନାହିଁ। ସୂଚନା ପ୍ରତି ସେକେଣ୍ଡରେ ଅନେକଥର ବଦଳିଥାଏ।
ଏହା କିପରି ସାହାଯ୍ୟ କରିବ?
ଧରନ୍ତୁ, ଆପଣଙ୍କ କାର୍ ଆଗରେ ଗୋଟିଏ ଟ୍ରକ୍ ଯାଉଛି। ହଠାତ୍ ଟ୍ରକ୍ଟି ଜୋର୍ରେ ବ୍ରେକ୍ ଲଗାଇଲା। ଯଦି ଆପଣ ଏହା ଦେଖିପାରୁନାହାନ୍ତି, ତେବେ ଭିଟୁଭି ସିଷ୍ଟମ୍ ଆପଣଙ୍କ ଗାଡ଼ିକୁ ତୁରନ୍ତ ସତର୍କ ସୂଚନା ପଠାଇଦେବ। ଏହାଦ୍ୱାରା ଡ୍ରାଇଭର୍ ଠିକ୍ ସମୟରେ ସାବଧାନ ହୋଇ ଦୁର୍ଘଟଣାକୁ ଏଡ଼ାଇପାରିବେ। ମୋଡ଼ ରାସ୍ତା, ଫ୍ଲାଏଓଭର୍ କିମ୍ବା ଯେଉଁଠାରେ ସାମ୍ନା ଦେଖାଯାଏ ନାହିଁ, ସେଠାରେ ମଧ୍ୟ ଏହି ପ୍ରଯୁକ୍ତି ବହୁତ ଉପକାରୀ ହେବ।
Horoscope 2026 August 06: ଜାଣନ୍ତୁ ଆଜିର ରାଶିଫଳ...
ଆଡାସ୍ ଓ ଭିଟୁଭିର ତଫାତ୍
ଆଡାସ୍ କ୍ୟାମେରା, ରାଡାର୍ ଓ ସେନ୍ସର୍ ବ୍ୟବହାର କରି ଗାଡ଼ି ଚାରିପାଖର ସ୍ଥିତି ବୁଝେ। ହେଲେ ଭିଟୁଭି ଅନ୍ୟ ଗାଡ଼ିରୁ ସିଧାସଳଖ ସୂଚନା ନେଇ କାମ କରେ। ଏହି ଦୁଇ ପ୍ରଯୁକ୍ତି ଏକା ସାଙ୍ଗରେ କାମ କଲେ ସଡ଼କ ସୁରକ୍ଷା ଆହୁରି ବଢ଼ିବ।
ପୁରୁଣା ଗାଡ଼ିରେ ଏହା ଲାଗିବ କି?
ବର୍ତ୍ତମାନର ଯୋଜନା ଅନୁସାରେ, ଭିଟୁଭି ବ୍ୟବସ୍ଥା କେବଳ ୧ ଅକ୍ଟୋବର ୨୦୨୮ ପରେ ତିଆରି ହେଉଥିବା ନୂଆ ଗାଡ଼ିରେ ଲାଗିପାରେ। ପୁରୁଣା ଗାଡ଼ିରେ ଏହାକୁ ବାଧ୍ୟତାମୂଳକ କରାଯିବ କି ନାହିଁ, ସେନେଇ ଏପର୍ଯ୍ୟନ୍ତ କୌଣସି ନିଷ୍ପତ୍ତି ହୋଇନାହିଁ। ଭବିଷ୍ୟତରେ ଆମ୍ବୁଲାନ୍ସ, ଅଗ୍ନିଶମ ଗାଡ଼ି ଓ ପୁଲିସ ଗାଡ଼ି ପାଇଁ ମଧ୍ୟ ଏହି ପ୍ରଯୁକ୍ତି ବହୁତ ଉପକାରୀ ହେବ। ଏହା ଜରୁରି ସେବା ଗାଡ଼ିକୁ ଶୀଘ୍ର ଗନ୍ତବ୍ୟରେ ପହଞ୍ଚିବାରେ ସାହାଯ୍ୟ କରିବ।
