1 hour ago
1
ARTICLE AD BOX
ନୂଆଦିଲ୍ଲୀ: ଭାରତ ଓ ବ୍ରିଟେନ ମଧ୍ୟରେ ବହୁ ପ୍ରତୀକ୍ଷିତ ବ୍ୟାପକ ଅର୍ଥନୈତିକ ଓ ବାଣିଜ୍ୟ ରାଜିନାମା (ସିଇଟିଏ) ଜୁଲାଇ ୧୫ରୁ କାର୍ଯ୍ୟକାରୀ ହେବ। ଉକ୍ତ ରାଜିନାମା ଅନୁଯାୟୀ, ଭାରତର ୯୯ ପ୍ରତିଶତ ରପ୍ତାନିକୁ ବ୍ରିଟେନରେ ଶୁଳ୍କମୁକ୍ତ ବଜାର ସୁବିଧା ମିଳିଯିବ। ଅନ୍ୟପକ୍ଷରେ ଭାରତ ମଧ୍ୟ ବ୍ରିଟେନର ୮୯.୫ ପ୍ରତିଶତ ସାମଗ୍ରୀ ଉପରୁ ଶୁଳ୍କ ହଟାଇବାକୁ ରାଜି ହୋଇଛି।
ଦୁଇ ଦେଶ ମଧ୍ୟରେ ଉକ୍ତ ରାଜିନାମା ୨୦୨୫ ଜୁଲାଇ ୨୫ରେ ସ୍ବାକ୍ଷର ହୋଇଥିଲା। ଚୁକ୍ତି ସ୍ବାକ୍ଷରର ବର୍ଷକ ମଧ୍ୟରେ ଏହାକୁ କାର୍ଯ୍ୟକାରୀ କରାଯାଇଛି। ମୋଦୀ ସରକାରଙ୍କ ଅମଳରେ ଏହାକୁ ମିଶାଇ ୬ଟି ମୁକ୍ତ ବାଣିଜ୍ୟ ରାଜିନାମା (ଏଫ୍ଟିଏ) କାର୍ଯ୍ୟକାରୀ ହୋଇଛି। ପୂର୍ବରୁ ମରିସସ୍, ସଂଯୁକ୍ତ ଆରବ ଏମିରେଟ୍ସ (ୟୁଏଇ), ଅଷ୍ଟ୍ରେଲିଆ, ୟୁରୋପୀୟ ମୁକ୍ତ ବାଣିଜ୍ୟ ସଂଘ (ଇଏଫ୍ଟିଏ) ଓ ଓମାନ ସହିତ ଭାରତ ମୁକ୍ତ ବାଣିଜ୍ୟ ରାଜିନାମା କାର୍ଯ୍ୟକାରୀ କରିଛି।
ପୋଷାକ, ବୟନ ସାମଗ୍ରୀ, ଜୋତା, କାର୍ପେଟ, ପ୍ରକ୍ରିୟାକୃତ ଖାଦ୍ୟ, ଶସ୍ୟ, ପନିପରିବା, ଫଳ, ମସଲା, ମାଂସ ଓ ଅନ୍ୟାନ୍ୟ କେତେକ ଶ୍ରମଭିତ୍ତିକ କ୍ଷେତ୍ରରୁ ପ୍ରସ୍ତୁତ ଉତ୍ପାଦଗୁଡ଼ିକ ବ୍ରିଟେନ ବଜାରରେ ବିନା ଶୁଳ୍କରେ ପ୍ରବେଶ କରିବ। ବର୍ତ୍ତମାନ ଏସବୁ ସାମଗ୍ରୀ ଉପରେ ବ୍ରିଟେନ ୪ରୁ ୧୬ ପ୍ରତିଶତ ପର୍ଯ୍ୟନ୍ତ ଶୁଳ୍କ ଆଦାୟ କରୁଛି। ସେହିଭଳି ଅଟୋମୋବାଇଲ, ମୋଟରସାଇକଲ୍, ଯନ୍ତ୍ରାଂଶ, ଇଲେକ୍ଟ୍ରୋନିକ୍ସ, ଫେବ୍ରିକେଟେଡ୍ ମେଟାଲ ପ୍ରଡକ୍ଟ, ସେରାମିକ୍ସ, ଗ୍ଲାସ୍, ଷ୍ଟୋନ ଏବଂ ସିମେଣ୍ଟ କ୍ଷେତ୍ର ମଧ୍ୟ ଏହାଦ୍ବାରା ଲାଭବାନ ହେବ।
ରୁପା ଆମଦାନି ଉପରେ ଭାରତ ୧୦ ବର୍ଷରେ ଶୁଳ୍କ ଶୂନ ପ୍ରତିଶତକୁ ହ୍ରାସ କରିବ। ସେହିଭଳି ବ୍ରିଟେନରୁ ଆମଦାନି ହେଉଥିବା ଅନେକ ସାମଗ୍ରୀ ଯଥା ଚକୋଲେଟ, ମୃଦୁପାନୀୟ, ପ୍ରସାଧନ ସାମଗ୍ରୀ, ସାବୁନ, ପର୍ଫ୍ୟୁମ୍, ସେଭିଂ କ୍ରିମ, ନେଲ୍ ପଲିସ ଆଦି ଉପରୁ ଭାରତ ଶୁଳ୍କ ହ୍ରାସ କରିବା ଦ୍ବାରା ଏସବୁ ଦାମ ଶସ୍ତା ହେବ। ବ୍ରିଟେନରୁ ଆମଦାନି ହେଉଥିବା ଦାମୀ କାରଗୁଡ଼ିକ ଉପରୁ ଶୁଳ୍କ ବର୍ତ୍ତମାନର ୧୧୦ ପ୍ରତିଶତରୁ ୧୦ ପ୍ରତିଶତ ସ୍ତରକୁ ପର୍ଯ୍ୟାୟକ୍ରମେ ହ୍ରାସ କରାଯିବ।
ସାଇଡର, ମିଡ୍, ସେକ୍, ବ୍ରାଣ୍ଡି, ବର୍ବନ, ରମ୍, ଜିନ୍, ଭୋଡ୍କା, ଲିକର୍ସ ଏବଂ ଟକିଲା ଭଳି ପ୍ରିମିୟମ ପାନୀୟର ଶୁଳ୍କ ହ୍ରାସ ପାଇବ। ଯୋଗ୍ୟ ସାମଗ୍ରୀଗୁଡ଼ିକ ଉପରେ ଶୁଳ୍କ ପ୍ରଥମ ବର୍ଷ ୧୧୦ ପ୍ରତିଶତକୁ ଏବଂ ୧୦ ବର୍ଷ ବେଳକୁ ୭୫ ପ୍ରତିଶତକୁ କମିବ। ସ୍କଚ ହ୍ବିସ୍କି ଉପରୁ ଭାରତ ପ୍ରଥମ ବର୍ଷରେ ଶୁଳ୍କ ୧୫୦ ପ୍ରତିଶତରୁ ୭୫ ପ୍ରତିଶତକୁ କମାଇବ। ୧୦ ବର୍ଷ ବେଳକୁ ଏହା ୪୦ ପ୍ରତିଶତକୁ କମିବ।
Trade: ଜୁଲାଇ ୧୫ରୁ ଭାରତ-ବ୍ରିଟେନ୍ ବାଣିଜ୍ୟ ରାଜିନାମା କାର୍ଯ୍ୟକାରୀ
କିନ୍ତୁ ସମ୍ବେଦନଶୀଳ କୃଷିଜାତ ଓ ଦୁଗ୍ଧଜାତ ସାମଗ୍ରୀ ସହିତ ସତେଜ ସେଓ, ୱାଲନଟ୍, କେତେକ ନିର୍ଦ୍ଦିଷ୍ଟ ପ୍ରକାର ମଞ୍ଜି, ଗୋଲ୍ଡ ବାର୍ ଏବଂ ସ୍ମାର୍ଟଫୋନ ଉପରେ ଭାରତ କୌଣସି ଶୁଳ୍କ ରିହାତି ଦେବନାହିଁ। ସେହିଭଳି ବ୍ରିଟେନ ମଧ୍ୟ ଭାରତର ମାଂସ ସାମଗ୍ରୀ, ଅଣ୍ଡାରେ ପ୍ରସ୍ତୁତ ସାମଗ୍ରୀ ଆଦି ଉପରେ ଶୁଳ୍କ ରିହାତି ପ୍ରଦାନ କରିବ ନାହିଁ।
ପ୍ରଥମ ଥର ପାଇଁ କେନ୍ଦ୍ର ସରକାରଙ୍କ ବିଭିନ୍ନ ମନ୍ତ୍ରାଳୟ ଓ ବିଭାଗଗୁଡ଼ିକରେ ସାମଗ୍ରୀ ସଂଗ୍ରହ ପ୍ରକ୍ରିୟାରେ ବ୍ରିଟେନର ଯୋଗାଣକାରୀମାନଙ୍କୁ ଅନୁମତି ଦିଆଯିବ। ବ୍ରିଟେନରେ କାର୍ଯ୍ୟ କରୁଥିବା ଭାରତୀୟ କମ୍ପାନିଗୁଡ଼ିକରେ କାର୍ଯ୍ୟରତ ଭାରତୀୟ କର୍ମଚାରୀମାନଙ୍କ ସାମାଜିକ ମଙ୍ଗଳ ଯୋଜନା ବାବଦ ଅର୍ଥ ୫ ବର୍ଷ ପାଇଁ ଜମା କରିବାକୁ ପଡ଼ିବ ନାହିଁ। ଏହାଦ୍ବାରା ଭାରତୀୟ କମ୍ପାନି ଓ କର୍ମଚାରୀମାନେ ଉପକୃତ ହେବେ। ଭାରତ ଓ ବ୍ରିଟେନ ବାଣିଜ୍ୟ ରାଜିନାମା କାର୍ଯ୍ୟକାରୀ ହେବା ଦ୍ବାରା ଦୁଇ ଦେଶ ମଧ୍ୟରେ ବାଣିଜ୍ୟ ଓ ନିବେଶ ବୃଦ୍ଧି ପାଇବ।
ଏହି ଗୁରୁତ୍ବପୂର୍ଣ୍ଣ ବାଣିଜ୍ୟ ରାଜିନାମା କାର୍ଯ୍ୟକାରୀ ହେବା ଫଳରେ ୨୦୩୦ ସୁଦ୍ଧା ଦ୍ବିପାକ୍ଷିକ ବାଣିଜ୍ୟ କାରବାର ପ୍ରାୟ ୧୨୦ ବିଲିଅନ ଡଲାରରେ ପହଞ୍ଚିବ ବୋଲି ଶିଳ୍ପସଂଘ ଆସୋଚାମ ଆକଳନ କରିଛି। ୨୦୨୫-୨୬ରେ ଦ୍ବିପାକ୍ଷିକ ବାଣିଜ୍ୟ କାରବାର ପ୍ରାୟ ୫୮ ବିଲିଅନ ଡଲାରରେ ରହିଥିଲା। ଭାରତର ମୁକ୍ତ ବାଣିଜ୍ୟ ରାଜିନାମା ଯାତ୍ରାରେ ଏହା ଏକ ଐତିହାସିକ ମାଇଲଖୁଣ୍ଟ ବୋଲି ଆସୋଚାମ ସଭାପତି ନିର୍ମଳ କେ ମିଣ୍ଡା କହିଛନ୍ତି।
