2 days ago
3
ARTICLE AD BOX
ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ନୂଆ ପୁସ୍ତକ ‘ବିଲଙ୍ଗିଂ: ଏ ଜର୍ଣ୍ଣି ଅଫ୍ ଲଭ୍’କୁ ନେଇ ବିଜେପି ତୀବ୍ର ସମାଲୋଚନା କରିଛି। ପୁସ୍ତକର ନାଁ ‘ବିଲଙ୍ଗିଂ’ ବଦଳରେ ‘ହ୍ୱାଇଟ୍ୱାସିଂ’ (ଅତୀତର ଭୁଲ୍କୁ ଲୁଚାଇବା) ରଖାଯିବା ଉଚିତ ଥିଲା ବୋଲି ବିଜେପି କହିଛି। ଗାନ୍ଧୀ ପରିବାର ଓ କଂଗ୍ରେସର ଅତୀତର ଭୁଲ୍କୁ ଘୋଡ଼ାଇବା ପାଇଁ ଏହି ପୁସ୍ତକରେ ଉଦ୍ୟମ ହୋଇଛି ବୋଲି ଦଳ ଅଭିଯୋଗ କରିଛି।
ମଙ୍ଗଳବାର ନୂଆଦିଲ୍ଲୀରେ ପୁସ୍ତକଟି ପ୍ରକାଶ ପାଇବା ପରେ ବିଜେପିର ଜାତୀୟ ମୁଖପାତ୍ର ସି.ଆର୍. କେଶବନ୍ ସାମାଜିକ ଗଣମାଧ୍ୟମ ‘ଏକ୍ସ’ରେ ଏକ ବିବୃତି ଦେଇ ଏହି ସମାଲୋଚନା କରିଛନ୍ତି। ତାଙ୍କ କହିବା ଅନୁଯାୟୀ, ପୁସ୍ତକର ଉଦ୍ଦେଶ୍ୟ ନେହରୁ-ଗାନ୍ଧୀ ପରିବାରର ଐତିହାସିକ ଭୁଲ୍ଗୁଡ଼ିକୁ ହାଲୁକା କରି ଦେଖାଇବା ଏବଂ କଂଗ୍ରେସର ଅତୀତର କାର୍ଯ୍ୟକଳାପକୁ ଘୋଡ଼ାଇବା। କେନ୍ଦ୍ରରେ ପ୍ରାୟ ୫୫ ବର୍ଷର କଂଗ୍ରେସ ଶାସନ ଦେଶର ରାଜନୀତି ଓ ଗଣତନ୍ତ୍ରକୁ ଗଭୀର କ୍ଷତି ପହଞ୍ଚାଇଛି ବୋଲି ମଧ୍ୟ ସେ ଅଭିଯୋଗ କରିଛନ୍ତି।
୧୯୭୫ର ଜରୁରୀ ପରିସ୍ଥିତି ପ୍ରସଙ୍ଗରେ ସୋନିଆଙ୍କ ମନ୍ତବ୍ୟକୁ ନେଇ ବିଜେପିର ଏହି ଆକ୍ରମଣ ଆସିଛି। ପୁସ୍ତକରେ ସୋନିଆ ଜରୁରୀ ପରିସ୍ଥିତିକୁ ଏକ ଭୁଲ୍ ବୋଲି ସ୍ୱୀକାର କରିଛନ୍ତି। ତାଙ୍କ ଶାଶୂ ତଥା ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ମଧ୍ୟ ପରବର୍ତ୍ତୀ ସମୟରେ ଏହାକୁ ଭୁଲ୍ ବୋଲି ବୁଝିଥିବେ ବୋଲି ସୋନିଆ ଲେଖିଛନ୍ତି। ଏହା ସହ ଇନ୍ଦିରା ଗାନ୍ଧୀ ତାଙ୍କ ସାନପୁଅ ସଞ୍ଜୟ ଗାନ୍ଧୀଙ୍କୁ ନିୟନ୍ତ୍ରଣରେ ରଖିଥିଲେ ଜରୁରୀ ପରିସ୍ଥିତି ପରବର୍ତ୍ତୀ ଅନେକ କ୍ଷତିକୁ ଏଡ଼ାଇ ଦିଆଯାଇପାରିଥାନ୍ତା ବୋଲି ମଧ୍ୟ ସେ ମତ ଦେଇଛନ୍ତି। କେଶବନ୍ ଅଭିଯୋଗ କରିଛନ୍ତି ଯେ, ସୋନିଆ ଜରୁରୀ ପରିସ୍ଥିତିରେ ମୌଳିକ ଅଧିକାର ସ୍ଥଗିତ ରହିବା, ଗଣମାଧ୍ୟମ ଉପରେ କଟକଣା ଏବଂ ଅନ୍ୟାନ୍ୟ ଅତ୍ୟାଚାରର ଗୁରୁତ୍ୱକୁ ସ୍ୱୀକାର କରିବା ପରିବର୍ତ୍ତେ ଏହାକୁ ସାଧାରଣ ଘଟଣା ଭାବେ ଦେଖାଇବାକୁ ଚେଷ୍ଟା କରିଛନ୍ତି।
୧୯୮୪ ଶିଖ୍ ବିରୋଧୀ ହିଂସା, ବାଟଲା ହାଉସ୍ ଘଟଣା ଓ ୨୬/୧୧ ଆକ୍ରମଣକୁ ନେଇ ଉଠିଲା ପ୍ରଶ୍ନ
ସେହିପରି ବାବ୍ରି ମସ୍ଜିଦ୍ ଭଙ୍ଗାଯିବା ଘଟଣାକୁ ମନେ ପକାଇ ସୋନିଆ ଦୁଃଖ ପ୍ରକାଶ କରିଥିବା ପ୍ରସଙ୍ଗରେ କେଶବନ୍ ପ୍ରଶ୍ନ ଉଠାଇଛନ୍ତି। ୧୯୮୪ରେ ଶିଖ୍ ବିରୋଧୀ ହିଂସାରେ ଗୁରୁଦ୍ୱାରଗୁଡ଼ିକ ଉପରେ ଆକ୍ରମଣ ଓ ହଜାର ହଜାର ଲୋକଙ୍କ ମୃତ୍ୟୁ ଘଟଣାରେ ସୋନିଆ ସମାନ ଭାବେ ଦୁଃଖ ପ୍ରକାଶ କରି ନ ଥିବା ସେ ଅଭିଯୋଗ କରିଛନ୍ତି। ୨୦୦୮ର ବାଟଲା ହାଉସ୍ ଏନ୍କାଉଣ୍ଟର ପ୍ରସଙ୍ଗରେ ସୋନିଆଙ୍କ ଭାବପ୍ରବଣ ପ୍ରତିକ୍ରିୟାକୁ ନେଇ ମଧ୍ୟ ସେ ପ୍ରଶ୍ନ କରିଛନ୍ତି। ଦେଶର ସୁରକ୍ଷା ପାଇଁ ପ୍ରାଣ ହରାଇଥିବା ସିଆର୍ପିଏଫ୍ ଯବାନଙ୍କ ପ୍ରତି ସମାନ ସମବେଦନା ଥିଲା କି ବୋଲି ସେ ପଚାରିଛନ୍ତି। ଏହା ସହ ୨୦୦୮ ନଭେମ୍ବର ୨୬ର ମୁମ୍ବାଇ ଆତଙ୍କବାଦୀ ଆକ୍ରମଣ ପରେ ତତ୍କାଳୀନ ଉପା ସରକାର କାହିଁକି ପ୍ରତିଆକ୍ରମଣ କରିନଥିଲେ, ତାହାର ଉତ୍ତର ମଧ୍ୟ ପୁସ୍ତକରେ ରହିଛି କି ବୋଲି ସେ ପ୍ରଶ୍ନ କରିଛନ୍ତି।
୨୦୦୪ରେ କଂଗ୍ରେସ କ୍ଷମତାକୁ ଆସିବା ପରେ ସୋନିଆ ଗାନ୍ଧୀ ପ୍ରଧାନମନ୍ତ୍ରୀ ନ ହେବାକୁ ନିଷ୍ପତ୍ତି ନେଇଥିବା ପ୍ରସଙ୍ଗରେ ମଧ୍ୟ କେଶବନ୍ ପ୍ରଶ୍ନ ଉଠାଇଛନ୍ତି। ପୂର୍ବତନ ବୈଦେଶିକ ମନ୍ତ୍ରୀ କେ. ନଟବର ସିଂହଙ୍କ ୨୦୧୪ର ଆତ୍ମଜୀବନୀ ‘ୱାନ୍ ଲାଇଫ୍ ଇଜ୍ ନଟ୍ ଏନଫ୍’ରେ ଏହି ସମୟର କିଛି ଘଟଣାର ଉଲ୍ଲେଖ ରହିଛି। ପୁସ୍ତକ ପ୍ରକାଶ ପୂର୍ବରୁ ସୋନିଆ ଓ ପ୍ରିୟଙ୍କା ଗାନ୍ଧୀ ତାଙ୍କୁ ଭେଟିଥିବା ନେଇ ନଟବର ସିଂହଙ୍କ ବିବରଣୀକୁ ଉଦ୍ଧାର କରି କେଶବନ୍ ଏହି ସାକ୍ଷାତ୍ର କାରଣ ନେଇ ପ୍ରଶ୍ନ କରିଛନ୍ତି। ବିଜେପିର ଏହି ସମସ୍ତ ମନ୍ତବ୍ୟ ସୋନିଆଙ୍କ ପୁସ୍ତକ ଓ ସେଥିରେ ଉଲ୍ଲେଖିତ ଐତିହାସିକ ଘଟଣାଗୁଡ଼ିକୁ ନେଇ ରାଜନୈତିକ ବିବାଦକୁ ଆହୁରି ତୀବ୍ର କରିଛି।
ମଧୁବାବୁ ପେନ୍ସନ ଯୋଜନା: ଡିସେମ୍ବରରୁ ପ୍ରତିମାସ ୧୫ ତାରିଖରେ ନିୟମିତ ଭତ୍ତା
