1 hour ago
4
ARTICLE AD BOX
କାଠମାଣ୍ଡୁ: ନେପାଳ ପ୍ରଳୟଙ୍କାରୀ ବନ୍ୟା ମୃତ୍ୟୁ ସଂଖ୍ୟା ଲଗାତାର ବୃଦ୍ଧି ପାଇବାରେ ଲାଗିଛି। ଶୁକ୍ରବାର ଅପରାହ୍ଣ ସୁଦ୍ଧା ମୃତ୍ୟୁ ସଂଖ୍ୟା ୫୪୭ରେ ପହଞ୍ଚି ଥିବାବେଳେ ଅନେକ ମୃତଦେହ ଶହ ଶହ କିଲୋମିଟର ଦୂର ପର୍ଯ୍ୟନ୍ତ ଭାସି ଯାଇଛି। ପରିବାରବର୍ଗ ଅତି ଆତୁର ହୋଇ ସେମାନଙ୍କ ନିଖୋଜ ସମ୍ପର୍କୀୟମାନଙ୍କୁ ଖୋଜୁଥିବା ବେଳେ ବିଭିନ୍ନ ଜିଲ୍ଲାରେ ଶବାଗାରଗୁଡ଼ିକରେ ମୃତଦେହ ରଖିବାକୁ ସ୍ଥାନାଭାବ ଦେଖାଗଲାଣି। ନେପାଳ କର୍ତ୍ତୃପକ୍ଷ ପୁନରୁଦ୍ଧାର ଅଭିଯାନ ସହିତ ମୃତଦେହଗୁଡ଼ିକର ସଂରକ୍ଷଣ, ଚିହ୍ନଟରେ ମଧ୍ୟ ସମସ୍ୟାର ସମ୍ମୁଖୀନ ହେଉଛନ୍ତି। ୧୦୦୦ରୁ ଅଧିକ ଲୋକ ଏବେବି ନିଖୋଜ ଅଛନ୍ତି। ଭୋଟେକୋଶୀ ନଦୀରୁ ମିଳୁଥିବା ମୃତଦେହଗୁଡ଼ିକୁ ଚିହ୍ନଟ କରିବା ଏବେ ନେପାଳ ସରକାରଙ୍କ ପାଇଁ କାଠିକର ପାଠ ହେଲାଣି।
କାଠମାଣ୍ଡୁ ପୋଷ୍ଟ ଅନୁଯାୟୀ, ଭୋଟେକୋଶୀ ବନ୍ୟାରେ ଭାସି ଯାଇଥିବା ମୃତଦେହଗୁଡ଼ିକୁ ନୁୱାକୋଟ, ଚିତୱାନ, ତାନାହୁନ ଓ ନବଲପରାସି ସମେତ କେନ୍ଦ୍ରୀୟ ନେପାଳର ବିସ୍ତୃତ ଅଞ୍ଚଳରେ ଉଦ୍ଧାର କରାଯାଇଛି। ସ୍ଥାନୀୟ ହସ୍ପିଟାଲଗୁଡ଼ିକରେ ସ୍ଥାନ ସରିଯିବା ପରେ ଅନେକ ଜିଲ୍ଲାର କର୍ତ୍ତୃପକ୍ଷ ମୃତଦେହଗୁଡ଼ିକୁ ଅନ୍ୟତ୍ର ସ୍ଥାନାନ୍ତର କରିବାକୁ ବାଧ୍ୟ ହୋଇଛନ୍ତି। ଅଧିକ ମୃତଦେହ ଉଦ୍ଧାର ହେଲେ ଏସବୁର ସଂରକ୍ଷଣ ପାଇଁ ଅସ୍ଥାୟୀ ସୁବିଧା ପ୍ରସ୍ତୁତ କରାଯାଉଛି। ଗୁରୁବାର ସକାଳ ୯ଟା ୩୦ ସୁଦ୍ଧା ଚିତୱାନରେ ଫିସଲିଙ୍ଗ ଓ ଗୋଲାଘାଟ ମଧ୍ୟରେ ତ୍ରିଶୁଲି ଓ ନାରାୟଣୀ ନଦୀରୁ ସର୍ବାଧିକ ୧୩୭ଟି ମୃତଦେହ ଉଦ୍ଧାର କରାଯାଇଥିଲା। ସେତେବେଳେ ହସ୍ପିଟାଲର ଶବାଗାରରେ ମାତ୍ର ୩୦ରୁ ୫୦ଟି ମୃତଦେହ ରଖିବାର ବ୍ୟବସ୍ଥା ଥିଲା। ଅଧିକାରୀମାନେ ଭରତପୁରର ଏକ ଅବ୍ୟବହୃତ ସରକାରୀ କୋଠାକୁ ଅସ୍ଥାୟୀ ମୃତଦେହ ସଂରକ୍ଷଣ କେନ୍ଦ୍ରରେ ପରିଣତ କରିଥିଲେ। ସେଠାରେ ୨୫୦ ମୃତଦେହ ରଖିବାର ବ୍ୟବସ୍ଥା କରାଯାଇଥିଲା। କାଠମାଣ୍ଡୁ ପୋଷ୍ଟ ଅନୁଯାୟୀ, କର୍ତ୍ତୃପକ୍ଷମାନେ ଶବ ସଢ଼ିବା ପ୍ରକ୍ରିୟାକୁ ମନ୍ଥର କରିବା ପାଇଁ ଏୟାର କଣ୍ଡିସନର ଓ ଶୁଷ୍କ ବରଫ ବ୍ୟବହାର କରିବାକୁ ଯୋଜନା କରୁଛନ୍ତି। ସ୍ଥାନୀୟ ଶିଳ୍ପ ଓ ବ୍ୟବସାୟିକ ଗୋଷ୍ଠୀଗୁଡ଼ିକ ଶୁଷ୍କ ବରଫ ବ୍ୟବସ୍ଥା କରିବାରେ ସାହାଯ୍ୟ କରିବାକୁ ରାଜି ହୋଇଛନ୍ତି। ଯଦି ଅସ୍ଥାୟୀ ସୁବିଧା ମଧ୍ୟ କ୍ଷମତାରେ ପହଞ୍ଚିଯାଏ, ତେବେ ଅଧିକାରୀମାନେ ଦେବଘାଟରେ ବୈଦ୍ୟୁତିକ ଶ୍ମଶାନକୁ ଅନ୍ୟ ଏକ ବିକଳ୍ପ ଭାବରେ ଚିହ୍ନଟ କରିଛନ୍ତି। ଖବର ସରବରାହ ସଂସ୍ଥା ପିଟିଆଇ କାଠମାଣ୍ଡୁର ଟିଚିଂ ହସ୍ପିଟାଲର ଶବାଗାର ବାହାରେ ସମ୍ପର୍କୀୟମାନଙ୍କ ଏକ ଭିଡିଓ ସେୟାର କରିଛି ଯେଉଁଠାରେ ବନ୍ୟାରେ ମୃତ୍ୟୁ ହୋଇଥିବା ଲୋକଙ୍କ ପୋଷ୍ଟର ଲଗାଯାଇଥିଲା।
କାଠମାଣ୍ଡୁ ପୋଷ୍ଟ ରିପୋର୍ଟ କରିଛି ଯେ ଗୁରୁବାର ସୁଦ୍ଧା ତାନାହୁନ୍, ଗୋର୍ଖା, ନବଲପରାସି ପୂର୍ବ ଏବଂ ଧାଡିଂରୁ ମୋଟ ୯୩ଟି ମୃତଦେହ ପୋଖରାକୁ ଅଣାଯାଇଛି। କାସ୍କିର ହସ୍ପିଟାଲ ଏବଂ ଚିକିତ୍ସା ପ୍ରତିଷ୍ଠାନଗୁଡ଼ିକ ମିଳିତ ଭାବରେ ୮୮ ମୃତଦେହ ରଖିପାରିବେ। ତାନାହୁନ୍ରୁ ବୁଧବାର ୯ଟି ମୃତଦେହ ଉଦ୍ଧାର କରାଯାଇଥିଲା। ଗୁରୁବାର ନବଲପରାସି ପୂର୍ବରୁ ୪୧, ଧାଡିଂରୁ ୨୭ ଓ ଗୋର୍ଖାରୁ ୧୧ଟି ମୃତଦେହ ଉଦ୍ଧାର କରାଯାଇଥିଲା। କାସ୍କି ମୁଖ୍ୟ ଜିଲ୍ଲା ଅଧିକାରୀ କାଠମାଣ୍ଡୁ ପୋଷ୍ଟକୁ କହିଛନ୍ତି ଯେ, ବର୍ତ୍ତମାନ ପାଇଁ ମୃତଦେହଗୁଡ଼ିକୁ ରଖାଯାଇଛି, କିନ୍ତୁ ଅଧିକ ମୃତଦେହ ଆସିଲେ ପଡ଼ୋଶୀ ଜିଲ୍ଲା ସହିତ ସମନ୍ୱୟ ଆବଶ୍ୟକ ହୋଇପାରେ।
ନେପାଳ ବନ୍ୟା: ସୀମାପାର ବାଣିଜ୍ୟ ପ୍ରଭାବିତ; ରାସ୍ତାରେ ମାଲବାହୀ ଟ୍ରକର ଲାଗିଛି ଧାଡ଼ି
