3 hours ago
1
ARTICLE AD BOX
ଫୁଟ୍ବଲ୍ ଦୁନିଆ ପୁଣି ମନେ ପକାଇଛି ଅନ୍ୟତମ ମହାନ ଖେଳାଳି ଡିଏଗୋ ମାରାଡୋନାଙ୍କୁ। ୩୬ ବର୍ଷ ତଳେ ମାରାଡୋନା ଯେଭଳି କ୍ରମାଗତ ଟ୍ରଫି ଜିତିବାର ଦୁଃଖରେ ଭାଙ୍ଗିପଡ଼ିଥିଲେ ରବିବାର ସେହିଭଳି ଦୁଃଖରେ ବୁଡ଼ିଯାଇଥିଲେ ଲିଓନେଲ୍ ମେସି। ୧୯୯୦ ଫାଇନାଲ୍ରେ ରୋମର ଷ୍ଟାଡିଓ ଅଲିମ୍ପିକୋରେ ଜର୍ମାନୀ ନିକଟରୁ ହାରି ଆର୍ଜେଣ୍ଟିନା ଟ୍ରଫି ତୋଳି ଧରିବାରୁ ବଞ୍ଚିତ ହୋଇଥିଲେ। ମାରାଡୋନାଙ୍କ ଆଖିରେ ଏତେ ଲୁହ ଆସିଯାଇଥିଲା ଯେ ତାଙ୍କୁ ବୁଝାଇବା ଭଳି ସ୍ଥିତି ନଥିଲା। ପ୍ରାୟ ୪ ଦଶନ୍ଧି ପରେ ସମାନ ସ୍ଥିତିିରେ ରହିଥିଲେ ମେସି। ନ୍ୟୁୟର୍କ ନୁଜର୍ସିର ମେଟ୍ଲାଇଫ୍ ଷ୍ଟାଡିୟମ୍ରେ ସମାନ ୦-୧ ବ୍ୟବଧାନର ସ୍ପେନ୍ଠାରୁ ଆର୍ଜେଣ୍ଟିନା ହାରିଯିବା ପରେ ମେସି ବି ପଡ଼ିଆରେ ଲୋଟିପଡ଼ିଥିଲେ। ସାଥୀ ଖେଳାଳି, ପ୍ରତିଦ୍ବନ୍ଦ୍ବୀ, ପ୍ରଶିକ୍ଷକ ସମସ୍ତଙ୍କ ସାନ୍ତ୍ବନା ବି କୌଣସି ଫରକ ପକାଇପାରି ନ ଥିଲା।
Gallium Nitride Chip: ଦେଶରେ ପ୍ରସ୍ତୁତ ହେଲା ଉନ୍ନତ ଗାଲିୟମ୍ ନାଇଟ୍ରାଇଡ୍ ଚିପ୍
ଏହି ଦୁଇ ମହାନ ଖେଳାଳି କ୍ରମାଗତ ଟ୍ରଫି ହାତେଇବାରୁ ବଞ୍ଚିତ ହୋଇଥିଲେ। ୧୯୮୬ରେ ମାରାଡୋନା ବିଶ୍ବକପ୍ ଜିତିବା ପରେ ୧୯୯୦ରେ ଏହାକୁ ଦୋହରାଇପାରି ନ ଥିଲେ। ସମାନ ଭାବେ ମେସି ୨୦୨୨ରେ ଜିତିବା ପରେ ୨୦୨୬ରେ ଏଥିରୁ ବଞ୍ଚିତ ହୋଇଛନ୍ତି। ଆଉ ଏକ ପରିସଂଖ୍ୟାନ ବି ସମାନ କାହାଣୀ ଦେଖାଉଛି। ରବିବାର ମେସିଙ୍କ ଦଳ ସ୍ପେନ୍ ବିପକ୍ଷରେ ବଲ୍ ନିୟନ୍ତ୍ରଣରେ ୩୫ ପ୍ରତିଶତ ରଖିଥିଲେ। ୧୯୯୦ ଫାଇନାଲ୍ରେ ମାରାଡୋନାଙ୍କ ଦଳ ଜର୍ମାନୀ ବିପକ୍ଷରେ ମଧ୍ୟ ୩୯ ପ୍ରତିଶତ ବଲ୍ ନିୟନ୍ତ୍ରଣ କରି ପଛରେ ପଡ଼ିଯାଇଥିଲେ। ରବିବାର ରାତିରେ ସ୍ପେନ୍ କିନ୍ତୁ ସମ୍ପୂର୍ଣ୍ଣ ଆଧିପତ୍ୟ ବିସ୍ତାର କରିଥିଲା। ମ୍ୟାଚ୍ର ୧୧୬ ମିନିଟ୍ ପର୍ଯ୍ୟନ୍ତ ଆର୍ଜେଣ୍ଟିନାର ଗୋଟିଏ ବି ସଟ୍ ସ୍ପେନ୍ ଗୋଲ୍ପୋଷ୍ଟ୍ରେ ପହଞ୍ଚି ନ ଥିଲା। ସେତେବେଳକୁ ସ୍ପେନ୍ ୨୦ତମ ସଟ୍ରେ ସଫଳ ହୋଇ ଫେରାନ୍ ଟୋରେସଙ୍କ ଜରିଆରେ ବାଜି ମାରି ନେଇଥିଲା।
‘ବିଶ୍ବକପ୍ ପରାଜୟ ଚିର ଯନ୍ତ୍ରଣା’
୪ ବର୍ଷ ତଳେ କତର ସଂସ୍କରଣଠାରୁ ବିଶ୍ବକପ୍ ବିଜୟର ସ୍ବପ୍ନକୁ ସାକାର କରି ସାରିଥିଲେ। କିନ୍ତୁ କ୍ରମାଗତ ଟ୍ରଫି ଜିତିବାର ଗୌରବ ଅର୍ଜନ ଲାଗି ରଖିଥିବା ଅଭିଳାଷ ପୂର୍ଣ୍ଣ କରି ନ ପାରିବା ପରେ ଏବେ ମହାନ ଫୁଟ୍ବଲର୍ ଲିଓନେଲ୍ ମେସି ଯନ୍ତ୍ରଣା ଭିତରେ ଛଟପଟ ହେଉଛନ୍ତି। ରବିବାର ରାତିରେ ସ୍ପେନ୍ ନିକଟରୁ ୦-୧ ଗୋଲ୍ରେ ପରାଜୟ ବରଣ ପରେ ମେସି କହିଛନ୍ତି ଏ’ ପରାଜୟ ଅତ୍ୟନ୍ତ ଯନ୍ତ୍ରଣାଦାୟକ। ଏହା ମୋ ସହ ଚିରକାଳ ରହିବ ଏବଂ ଯନ୍ତ୍ରଣାକୁ ମୁକ୍ତ କରିବା ପାଇଁ ଲମ୍ବା ସମୟ ଲାଗିବ’। ସମାନ ସମୟରେ ମେସି ମଧ୍ୟ ତାଙ୍କ ପ୍ରଶଂସକ ଓ ଦେଶବାସୀଙ୍କୁ କୃତଜ୍ଞତା ଜଣାଇଛନ୍ତି। ବିଶ୍ବକପ୍ର ପ୍ରତିଟି ମୁହୂର୍ତ୍ତ ଓ ଅଭିଯାନ ସମୟରେ ଦଳକୁ ସମର୍ଥନ କରିଥିବାରୁ ସେ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ୩୯ ବର୍ଷୀୟ ମେସି ମଧ୍ୟ ବିଜୟୀ ସ୍ପେନ୍କୁ ଅଭିନନ୍ଦନ ଜଣାଇଛନ୍ତି। ତଥାପି ଆର୍ଜେଣ୍ଟିନା ସମର୍ଥକମାନେ ଏକାଠି ରହିବା ଏବଂ ଗର୍ବର ସହ ବିଶ୍ବକପ୍ ସ୍ମୃତିକୁ ସାଉଁଟିଥିବାରୁ ଖୁସି ବ୍ୟକ୍ତ କରିଛନ୍ତି। କ୍ରମାଗତ ଫାଇନାଲ୍ ଖେଳିବାର ଉପଲବ୍ଧିକୁ ନେଇ ଗର୍ବ କରିବାକୁ କହିଛନ୍ତି। ୨୦୨୨ ମସିହା ଫାଇନାଲ୍ରେ ମେସିଙ୍କ ଦଳ ଫାଇନାଲ୍ରେ ଫ୍ରାନ୍ସକୁ ପରାସ୍ତ କରି ବିଶ୍ବ ବିଜେତା ହୋଇଥିଲା। ଏଥର ଜିତିପାରିଥିଲେ ଦଳ ବିଶ୍ବର ତୃତୀୟ ଦେଶ ଭାବେ ଟାଇଟଲ୍ ଜିତି ୬୪ ବର୍ଷ ପ୍ରତୀକ୍ଷାର ଅନ୍ତ ଘଟାଇଥାନ୍ତା। ଏ ପର୍ଯ୍ୟନ୍ତ କେବଳ ଇଟାଲି (୧୯୩୪ ଓ ୧୯୩୮) ଏବଂ ବ୍ରାଜିଲ୍ (୧୯୫୮ ଓ ୧୯୬୨) ବିଶ୍ବକପ୍କୁ କ୍ରମାଗତ ଜିତିବାର ଦୁଇ ଦେଶ ହୋଇ ରହିଛନ୍ତି।
Suna Besha 2026: ମହାପ୍ରଭୁଙ୍କ ସୁନାବେଶ ଦର୍ଶନ କରିବେ ମୁଖ୍ୟମନ୍ତ୍ରୀ
ଆମ ଦଳ କଠିନ ପରିଶ୍ରମ କରି ବିଶ୍ବର ଅନ୍ୟତମ ଶ୍ରେଷ୍ଠ ଦଳ ପ୍ରମାଣିତ କରିଛି। ଏହି ଖୁସିକୁ ମୁଁ ଧରି ରଖିଛି ଏବଂ ଗୌରବାନ୍ବିତ ହୋଇଛି। ଦଳର ଲଢ଼ୁଆ ପ୍ରବୃତ୍ତି ମଧ୍ୟ ପ୍ରଶଂସାର ପାତ୍ର ବୋଲି ମେସି କହିଛନ୍ତି। ବ୍ରାଜିଲର କାଫୁଙ୍କ ପରେ ମେସି ମଧ୍ୟ ବିଶ୍ବର ଦ୍ବିତୀୟ ଖେଳାଳି ଭାବେ ୩ଟି ଫାଇନାଲ୍ ଖେଳିଛନ୍ତି। ପୂର୍ବରୁ ସେ ୨୦୧୪ ଓ ୨୦୨୨ରେ ଫାଇନାଲ୍ ଖେଳିଥିଲେ। ଏହି ମହାନ ଫରୱାର୍ଡ ମଧ୍ୟ ଆର୍ଜେଣ୍ଟିନାର ସବୁଠାରୁ ପଦକ ଆଭୂଷିତ ଫୁଟ୍ବଲର୍ ହୋଇଛନ୍ତି। ୨୦୨୨ ବିଶ୍ବକପ୍ ସହିତ ୨୦୨୧ କୋପା ଓ ୨୦୨୪ରେ କୋପା ଆମେରିକା ଟ୍ରଫି ଏବଂ ୨୦୨୨ରେ ଫାଇନାଲିସିମା ଟ୍ରଫି ଜିତାଇଲେ। ୮ ଥର ବାଲନ ଡି’ଓର ବିଜେତା ହୋଇ ମହାନତମ ଖେଳାଳି ଭାବେ ଖ୍ୟାତି ଅର୍ଜନ କରିସାରିଛନ୍ତି। ‘ଫୁଟ୍ବଲ୍କୁ ନେଇ ଦେଶ ପୁଣି ଥରେ ଏକାଠି ହୋଇପାରିଥିବାରୁ ମୁଁ ଗର୍ବିତ’ ବୋଲି ମେସି ଶେଷରେ କହିଥିଲେ।
