48 minutes ago
1
ARTICLE AD BOX
ଚଣ୍ଡୀଗଡ଼: ପଞ୍ଜାବର କପୁରଥଲା ଜିଲ୍ଲା ଫଗୱାଡ଼ାସ୍ଥିତ ଲଭ୍ଲି ପ୍ରଫେସନାଲ୍ ୟୁନିଭର୍ସିଟି (ଏଲ୍ପିୟୁ)ରେ ଛାତ୍ରଛାତ୍ରୀଙ୍କ ହିଂସାତ୍ମକ ବିକ୍ଷୋଭ ପରେ ସୋମବାର ପଞ୍ଜାବ ପୁଲିସ ମହାନିର୍ଦ୍ଦେଶକ ଗୌରବ ଯାଦବ କ୍ୟାମ୍ପସ ପରିଦର୍ଶନ କରିଛନ୍ତି। ଛାତ୍ରମାନଙ୍କ ଦାବି ଶୁଣିବା ଓ ସମସ୍ୟାର ସମାଧାନ ପାଇଁ ପୁଲିସ ଅତ୍ୟନ୍ତ ସଂଯମର ସହ କାମ କରିଥିବା ସେ କହିଛନ୍ତି। ତେବେ ଆଇନକୁ ହାତକୁ ନେଇ ଭଙ୍ଗାରୁଜା, ହିଂସା କିମ୍ବା ସରକାରୀ ସମ୍ପତ୍ତି ନଷ୍ଟ କରିଥିବା ଲୋକଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ହେବ ବୋଲି ସେ ସ୍ପଷ୍ଟ କରିଛନ୍ତି।
ଆହୁରି ପଢନ୍ତୁ :IIT Bombay: ବମ୍ବେ ଆଇଆଇଟି ଛାତ୍ର ସାହିଲ ମୃତ୍ୟୁ ପୂର୍ବରୁ ପରୀକ୍ଷାରେ ନକଲ ପାଇଁ ଅନୁତାପ କରିଥିଲେ
ରବିବାର ଭୋର ପ୍ରାୟ ୨ଟାରୁ ଏଲ୍ପିୟୁ କ୍ୟାମ୍ପସରେ ଛାତ୍ରମାନେ ଏକ ଛାତ୍ରୀଙ୍କୁ ଜଣେ ବାହାର ଲୋକ ଦୁଷ୍କର୍ମ କରିଥିବା ଅଭିଯୋଗକୁ ନେଇ ବିକ୍ଷୋଭ ଆରମ୍ଭ କରିଥିଲେ। ପରେ ବିକ୍ଷୋଭ ତୀବ୍ର ହୋଇ କ୍ୟାମ୍ପସ ସମ୍ପତ୍ତି ଭଙ୍ଗାରୁଜା, କିଛି ଯାନବାହନରେ ନିଆଁ ଲଗାଇବା ଏବଂ ଦୋକାନଗୁଡ଼ିକରେ କ୍ଷତି ଘଟାଇବା ପର୍ଯ୍ୟନ୍ତ ପହଞ୍ଚିଥିଲା। ଭୋର ୪ଟାରେ ଛାତ୍ରମାନେ କ୍ୟାମ୍ପସ ବାହାରେ ଦିଲ୍ଲୀ-ଅମୃତସର ଜାତୀୟ ରାଜପଥ-୪୪ ଅବରୋଧ କରିଥିଲେ। ରବିବାର ସନ୍ଧ୍ୟାରେ ପୁଲିସ ଉପରକୁ ପଥରମାଡ଼ ହେବା ସହ ପୁଲିସ ଗାଡ଼ିଗୁଡ଼ିକୁ ମଧ୍ୟ ଟାର୍ଗେଟ୍ କରାଯାଇଥିଲା। ଏଥିରେ କେତେକ ପୁଲିସକର୍ମୀ ଆହତ ହୋଇଥିବା ଅଧିକାରୀମାନେ କହିଛନ୍ତି।
ଆହୁରି ପଢନ୍ତୁ :Flooding In Nepal: ନେପାଳରେ ପ୍ରବଳ ବର୍ଷା ଓ ବନ୍ୟା, ୨୧ ମୃତ ଓ ୫ ନିଖୋଜ
ଡିଜିପି ଯାଦବ କହିଛନ୍ତି, ଛାତ୍ରମାନଙ୍କ ସହ ଆଲୋଚନା କରି ସେମାନଙ୍କ ଅଭିଯୋଗର ସମାଧାନ କରିବାକୁ ପୁଲିସ ଚେଷ୍ଟା କରିଥିଲା। ଝିଅଙ୍କ ହଷ୍ଟେଲରେ କେବଳ ମହିଳା କର୍ମଚାରୀ ନିଯୁକ୍ତି ସମେତ ବିଶ୍ୱବିଦ୍ୟାଳୟ ପ୍ରଶାସନ ସମ୍ପର୍କିତ ଦାବିଗୁଡ଼ିକରେ ପୁଲିସ ମଧ୍ୟସ୍ଥ ଭୂମିକା ନେଇଥିଲା। ଛାତ୍ରୀଙ୍କ ଉପରେ ଦୁଷ୍କର୍ମ ଅଭିଯୋଗ ନେଇ ଏଫ୍ଆଇଆର୍ ରୁଜୁ ହୋଇଥିବାବେଳେ ଘଟଣାର ତଦନ୍ତ ପାଇଁ ଏସ୍ଆଇଟି ଗଠନ କରାଯାଇଛି।
ଆହୁରି ପଢନ୍ତୁ :El Nino: ୨୦୦୧ ପରଠାରୁ ସେପ୍ଟେମ୍ବରର ସବୁଠାରୁ ଥଣ୍ଡା ରାତି: ଏଲ୍ ନିନୋ ଯୋଗୁଁ ଶୀତ ଶୀଘ୍ର ଆସୁଛି କି?
ଏହି ଅଭିଯୋଗକୁ ଏଲ୍ପିୟୁ ପକ୍ଷରୁ ମିଥ୍ୟା ଓ ମନଗଢ଼ା ଗୁଜବ ବୋଲି କୁହାଯାଇଛି। ପୁଲିସ ମଧ୍ୟ ଘଟଣାର ସତ୍ୟତା ଯାଞ୍ଚ କରୁଛି। ଏସ୍ଆଇଟି ପକ୍ଷରୁ ଫରେନ୍ସିକ୍ ତଥ୍ୟ, ସିସିଟିଭି ଫୁଟେଜ୍ ଓ ଅନ୍ୟାନ୍ୟ ପ୍ରମାଣ ଯାଞ୍ଚ କରାଯିବ। ଏହି ମାମଲାରେ ଆଇନ ଅନୁସାରେ ପଦକ୍ଷେପ ନିଆଯିବ ବୋଲି ଡିଜିପି କହିଛନ୍ତି। ଏପଟେ ରବିବାର ସକାଳ ୮ଟାରୁ ଅବରୋଧ ହୋଇଥିବା ଏନ୍ଏଚ୍-୪୪ରେ ପ୍ରାୟ ୧୫ ଘଣ୍ଟା ପରେ ସୋମବାର ଭୋରରେ ଯାତାୟାତ ସ୍ୱାଭାବିକ ହୋଇଛି। କ୍ୟାମ୍ପସ ଓ ଏହାର ଆଖପାଖରେ ବହୁ ସଂଖ୍ୟାରେ ପୁଲିସ ମୁତୟନ ରହିଛନ୍ତି। ଏଲ୍ପିୟୁ ସେପ୍ଟେମ୍ବର ୨୮ରୁ ୧୦ ଦିନ ପାଇଁ ନିୟମିତ କ୍ଲାସ୍ ବନ୍ଦ ରଖିବା ସହ ମଧ୍ୟବର୍ତ୍ତୀ ପରୀକ୍ଷାକୁ ପରବର୍ତ୍ତୀ ସୂଚନା ପର୍ଯ୍ୟନ୍ତ ସ୍ଥଗିତ ରଖିଛି।
