1 hour ago
2
ARTICLE AD BOX
ବେରୁତ: ଦକ୍ଷିଣ ଲେବାନନରେ ଇସ୍ରାଏଲ ଦ୍ଵାରା କରାଯାଇଥିବା ବିମାନ ଆକ୍ରମଣରେ ୭ ଜଣ ପ୍ରାଣ ହରାଇଥିବା ବେଳେ ୩ ଜଣ ଗୁରୁତର ଆହତ ହୋଇଛନ୍ତି। ଗତ ଜୁନ୍ ମାସରେ ଇସ୍ରାଏଲ ଏବଂ ହିଜବୁଲ୍ଲା ମଧ୍ୟରେ ଉତ୍ତେଜନା ହ୍ରାସ ପାଇଁ ହୋଇଥିବା ଚୁକ୍ତି ପରଠାରୁ ଏହାକୁ ସବୁଠାରୁ ଭୟଙ୍କର ଆକ୍ରମଣ ବୋଲି କୁହାଯାଉଛି। ଲେବାନନର ସରକାରୀ ଗଣମାଧ୍ୟମର ସୂଚନା ଅନୁସାରେ, ଶନିବାର ସକାଳେ ଆନସାର୍ ଗ୍ରାମ ନିକଟସ୍ଥ ଏକ ଆବାସିକ ଘରକୁ ଲକ୍ଷ୍ୟ କରି ଇସ୍ରାଏଲୀ ଯୁଦ୍ଧବିମାନ ବୋମାବର୍ଷଣ କରିଥିଲା, ଯାହାଫଳରେ ଘରଟି ସମ୍ପୂର୍ଣ୍ଣ ଧ୍ବଂସ ହୋଇଯାଇଛି।
ଆନସାର୍ ଏବଂ ଜାରାରିୟା ଉପତ୍ୟକା ଅଞ୍ଚଳରେ ହୋଇଥିବା ଏହି ଆକ୍ରମଣ ରାଜିନାମା ପରଠାରୁ ସବୁଠାରୁ ଗଭୀର ଆଞ୍ଚଳିକ ସୀମା ଭିତରେ କରାଯାଇଥିବା ପ୍ରଥମ ଆକ୍ରମଣ। ଏହା ସହିତ ନବାତିୟା ଅଞ୍ଚଳକୁ ଲାଗି ରହିଥିବା ରଣନୈତିକ ପାହାଡ଼ି ଅଞ୍ଚଳ ଏବଂ ବିନଟ୍ ଜବିଲ୍ ନିକଟସ୍ଥ କିଛି ସ୍ଥାନରେ ମଧ୍ୟ ବିସ୍ଫୋରଣ ଏବଂ ଆକ୍ରମଣ ଜାରି ରହିଛି। ଗତ ମାର୍ଚ୍ଚ ମାସରୁ ଆରମ୍ଭ ହୋଇଥିବା ଏହି ଯୁଦ୍ଧରେ ଏପର୍ଯ୍ୟନ୍ତ ୪,୩୦୦ରୁ ଉର୍ଦ୍ଧ୍ୱ ଲୋକଙ୍କ ଜୀବନ ଗଲାଣି। ଜୁନ୍ ମାସରେ ଆମେରିକା ମଧ୍ୟସ୍ଥତାରେ ହୋଇଥିବା ରାଜିନାମା ଅନୁସାରେ ଦକ୍ଷିଣ ଲେବାନନରୁ ଇସ୍ରାଏଲ ସେନା ପ୍ରତ୍ୟାହାର ଏବଂ ହିଜବୁଲ୍ଲାକୁ ଅସ୍ତ୍ରମୁକ୍ତ କରିବାର ନିୟମ ରହିଛି। ତେବେ ଇସ୍ରାଏଲର ଏହି କ୍ରମାଗତ ସାମରିକ କାର୍ଯ୍ୟାନୁଷ୍ଠାନକୁ ନେଇ ହିଜବୁଲ୍ଲା ମୁଖ୍ୟ ନଇମ୍ କାସେମ୍ ସ୍ଥାନୀୟ ପ୍ରଶାସନକୁ ସମାଲୋଚନା କରିଛନ୍ତି। ସେପଟେ ବେସାମରିକ ନାଗରିକଙ୍କ ସୁରକ୍ଷା ପାଇଁ ମିଳିତ ଜାତିସଂଘର ଶାନ୍ତିରକ୍ଷାକାରୀ ବାହିନୀକୁ ସେହି ଅଞ୍ଚଳରେ ନିୟୋଜିତ ରଖିବାକୁ ମାନବାଧିକାର ସଂଗଠନ ''ହ୍ୟୁମାନ୍ ରାଇଟ୍ସ ୱାଚ୍'' ନିବେଦନ କରିଛି।
