3 hours ago
1
ARTICLE AD BOX
ନୂଆଦିଲ୍ଲୀ: ଆଧୁନିକ ଚିକିତ୍ସା ବିଜ୍ଞାନ ଓ ପ୍ରଯୁକ୍ତିର ଉନ୍ନତି ଫଳରେ ମଣିଷର ଜୀବନକାଳ ବଢ଼ିଥିଲେ ମଧ୍ୟ ସୁସ୍ଥ ଜୀବନର ଅବଧି ସେହି ଅନୁପାତରେ ବୃଦ୍ଧି ପାଇନାହିଁ। ବରଂ ଲୋକମାନେ ଅଧିକ ବର୍ଷ ଧରି ବିଭିନ୍ନ ରୋଗ ଓ ଶାରୀରିକ ଅକ୍ଷମତା ସହ ବଞ୍ଚୁଛନ୍ତି। 'ଦି ଲାନସେଟ୍ ପବ୍ଲିକ୍ ହେଲ୍ଥ' ମେଡିକାଲ୍ ଜର୍ଣ୍ଣାଲରେ ପ୍ରକାଶିତ 'ଗ୍ଲୋବାଲ୍ ବର୍ଡନ୍ ଅଫ୍ ଡିଜିଜ୍ (GBD) ୨୦୨୩' ଅଧ୍ୟୟନରେ ଏହି ଚିନ୍ତାଜନକ ତଥ୍ୟ ସାମ୍ନାକୁ ଆସିଛି।
ଜୀବନର ଏକ ବଡ଼ ଅଂଶ ଅସୁସ୍ଥତାରେ କାଟୁଛନ୍ତି
ରିପୋର୍ଟ ଅନୁଯାୟୀ, ୧୯୯୦ ମସିହାରେ ବିଶ୍ୱସ୍ତରରେ ମୋଟ ଜୀବନକାଳ ଓ ସୁସ୍ଥ ଜୀବନକାଳ ମଧ୍ୟରେ ବ୍ୟବଧାନ ୮.୮ ବର୍ଷ ଥିବାବେଳେ ୨୦୨୩ ସୁଦ୍ଧା ଏହା ବଢ଼ି ୧୦.୭ ବର୍ଷରେ ପହଞ୍ଚିଛି। ଅର୍ଥାତ୍ ଲୋକମାନେ ଅଧିକ ଦିନ ବଞ୍ଚୁଥିଲେ ମଧ୍ୟ ଶେଷ ଜୀବନର ଏକ ବଡ଼ ଅଂଶ ଅସୁସ୍ଥତାରେ କାଟୁଛନ୍ତି। ୨୦୨୩ରେ ବିଶ୍ୱର ଲୋକମାନେ ନିଜ ଜୀବନର ପ୍ରାୟ ୧୪.୫ ପ୍ରତିଶତ ସମୟ ରୋଗ ଓ ଶାରୀରିକ ସମସ୍ୟାରେ ବିତାଉଛନ୍ତି, ଯାହା ୧୯୯୦ରେ ୧୩.୬ ପ୍ରତିଶତ ଥିଲା। ଭାରତର ସ୍ଥିତି ମଧ୍ୟ ସମାନ ଚିନ୍ତାଜନକ। ୧୯୯୦ରେ ଦେଶର ହାରାହାରି ଜୀବନକାଳ ୫୮.୫ ବର୍ଷ ଥିବାବେଳେ ସୁସ୍ଥ ଜୀବନକାଳ ୫୦.୧ ବର୍ଷ ଥିଲା। ସେତେବେଳେ ଲୋକମାନେ ହାରାହାରି ୮.୪ ବର୍ଷ ଅସୁସ୍ଥତା ସହ ବଞ୍ଚୁଥିଲେ। ୨୦୨୩ ସୁଦ୍ଧା ଭାରତର ହାରାହାରି ଜୀବନକାଳ ୭୧.୬ ବର୍ଷକୁ ବଢ଼ିଥିବାବେଳେ ସୁସ୍ଥ ଜୀବନକାଳ କେବଳ ୬୧ ବର୍ଷରେ ପହଞ୍ଚିଛି। ଫଳରେ ଜଣେ ଭାରତୀୟ ହାରାହାରି ୧୦.୬ ବର୍ଷ ରୋଗ ଓ ଶାରୀରିକ ଅକ୍ଷମତା ସହ ବିତାଉଛନ୍ତି। ଅଧ୍ୟୟନରେ ମହିଳା ଓ ପୁରୁଷଙ୍କ ସ୍ୱାସ୍ଥ୍ୟ ମଧ୍ୟରେ ମଧ୍ୟ ସ୍ପଷ୍ଟ ପାର୍ଥକ୍ୟ ଦେଖିବାକୁ ମିଳିଛି। ମହିଳାମାନେ ପୁରୁଷଙ୍କ ତୁଳନାରେ ଅଧିକ ଦିନ ବଞ୍ଚୁଥିଲେ ମଧ୍ୟ ସେମାନଙ୍କ ଜୀବନର ଅଧିକ ସମୟ ଅସୁସ୍ଥତାରେ କଟୁଛି। ୨୦୨୩ରେ ବିଶ୍ୱସ୍ତରରେ ମହିଳାଙ୍କ ପାଇଁ ମୋଟ ଜୀବନକାଳ ଓ ସୁସ୍ଥ ଜୀବନକାଳ ମଧ୍ୟରେ ବ୍ୟବଧାନ ୧୨.୧ ବର୍ଷ ଥିବାବେଳେ ପୁରୁଷଙ୍କ କ୍ଷେତ୍ରରେ ଏହା ୯.୩ ବର୍ଷ ରହିଛି। ଭାରତରେ ମଧ୍ୟ ମହିଳାଙ୍କ କ୍ଷେତ୍ରରେ ଏହି ବ୍ୟବଧାନ ୧୨ ବର୍ଷ ଓ ପୁରୁଷଙ୍କ କ୍ଷେତ୍ରରେ ୯.୧ ବର୍ଷ ରେକର୍ଡ କରାଯାଇଛି।
ରିପୋର୍ଟ ଅନୁଯାୟୀ, ପିଠି ଓ କଟି ଯନ୍ତ୍ରଣା, ହାଡ଼ ଓ ମାଂସପେଶୀ ସମ୍ବନ୍ଧୀୟ ରୋଗ, ଅବସାଦ, ଚିନ୍ତାଜନିତ ମାନସିକ ସମସ୍ୟା, ଉଚ୍ଚ ରକ୍ତଶର୍କରା ଓ ସ୍ଥୂଳତା ଭଳି ଜୀବନଶୈଳୀଜନିତ ସମସ୍ୟା ସୁସ୍ଥ ଜୀବନକାଳ କମିବାର ପ୍ରମୁଖ କାରଣ। ବିଶେଷଜ୍ଞମାନଙ୍କ ମତରେ, କେବଳ ଜୀବନକାଳ ବଢ଼ାଇବା ନୁହେଁ, ବରଂ ଲୋକମାନଙ୍କୁ ଅଧିକ ସମୟ ସୁସ୍ଥ ରଖିବା ଉପରେ ସ୍ୱାସ୍ଥ୍ୟନୀତିର ଗୁରୁତ୍ୱ ଦିଆଯିବା ଆବଶ୍ୟକ।
ଅଧ୍ୟୟନର ବରିଷ୍ଠ ଲେଖକ କ୍ରିଷ୍ଟୋଫର ମୁରେ କହିଛନ୍ତି, ଭବିଷ୍ୟତରେ ସାର୍ବଜନୀନ ସ୍ୱାସ୍ଥ୍ୟର ସଫଳତା କେବଳ ଲୋକଙ୍କ ଆୟୁଷ ବଢ଼ିବାରେ ନୁହେଁ, ବରଂ ସେମାନେ କେତେ ବର୍ଷ ସୁସ୍ଥ ଜୀବନ ବିତାଉଛନ୍ତି, ତାହା ଦ୍ୱାରା ମାପ କରାଯିବା ଉଚିତ। ସେ କହିଛନ୍ତି, ଦୀର୍ଘଜୀବନ ସହିତ ସୁସ୍ଥ ବାର୍ଦ୍ଧକ୍ୟକୁ ପ୍ରାଥମିକତା ଦେବା ହିଁ ବିଶ୍ୱ ସ୍ୱାସ୍ଥ୍ୟ ବ୍ୟବସ୍ଥାର ପରବର୍ତ୍ତୀ ବଡ଼ ଆହ୍ୱାନ।
