ARTICLE AD BOX
ଭୁବନେଶ୍ବର: କଳିଙ୍ଗ ଷ୍ଟାଡିୟମ୍ରେ ଚାଲିଥିବା ଏସୀୟ ରଗ୍ବି ସେଭେନ୍ସ (୨୦ ବର୍ଷରୁ କମ୍) ପ୍ରତିଯୋଗିତା ରବିବାର ଉଦ୍ଯାପିତ ହୋଇଯାଇଛି। ଭାରତୀୟ ମହିଳା ନିଜ କାଂସ୍ୟ ପଦକ ସଫଳତାକୁ ଦୋହରାଇଥିବାବେଳେ ପୁରୁଷ ଦଳ ପୋଡିୟମ୍ ପର୍ଯ୍ୟନ୍ତ ପହଞ୍ଚି ନପାରି ସପ୍ତମ ସ୍ଥାନରେ ସନ୍ତୁଷ୍ଟ ହୋଇଛି। ତେବେ ହଟ୍ ଫେଭରିଟ୍ ହଂ କଂ ଚୀନ ଉଭୟ ପୁରୁଷ ଓ ମହିଳା ବିଭାଗରେ ଟ୍ରଫି ଜିିତିବା ସହ ଦ୍ବିମୁକୁଟ ଅର୍ଜନ କରିଛି। ହଂ କଂ ଚୀନ ଦଳ ଉଭୟ ଫାଇନାଲ୍ରେ ମାଲେସିଆକୁ ଭେଟିଥିଲା। ପୁରୁଷ ଦଳ ୩୪-୭ରେ ଏବଂ ମହିଳା ଦଳ ୪୩-୭ରେ ଏକତରଫା ଭାବେ ବିଜୟୀ ହୋଇଥିଲା।
ରବିବାର ସକାଳେ ଭାରତୀୟ ପୁରୁଷ ଦଳ ଶେଷ ଗ୍ରୁପ୍ ମ୍ୟାଚ୍ରେ ଚାଇନିଜ୍ ତାଇପେଠାରୁ ୫-୧୨ରେ ହାରିଯିବା ଫଳରେ ଆଗକୁ ବଢ଼ିପାରି ନଥିଲା। କ୍ଲାସିଫିକେସନ୍ ମ୍ୟାଚ୍ରେ ୫-୨୯ରେ ସିଙ୍ଗାପୁରଠାରୁ ହାରିଯିବା ପରେ ଥାଇଲାଣ୍ଡ୍କୁ ୨୪-୭ରେ ହରାଇ ସପ୍ତମ ସ୍ଥାନ ପାଇଥିଲା। ସକାଳେ ମହିଳା ଦଳ ମଧ୍ୟ ସେମିଫାଇନାଲ୍ରେ ମାଲେସିଆଠାରୁ ୧୨-୧୪ରେ ହାରିଯାଇଥିଲା। କିନ୍ତୁ ଶ୍ରୀଲଙ୍କା ବିପକ୍ଷ ମୁକାବିଲାକୁ ୨୭-୦ରେ ଜିତି କାଂସ୍ୟ ପଦକ ହାସଲ କରିଥିଲା। ଗତଥର ଅର୍ଥାତ୍ ୨୦୨୫ରେ ମଧ୍ୟ ଭାରତୀୟ ମହିଳା ଦଳ କାଂସ୍ୟ ପଦକ ହାସଲ କରିଥିଲା।
ସଂଧ୍ୟାରେ ଅନୁଷ୍ଠିତ ଉଦ୍ଯାପନୀ ଉତ୍ସବରେ କ୍ରୀଡ଼ା ଓ ଯୁବସେବା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ରଗ୍ବି ଇଣ୍ଡିଆ ସଭାପତି ରାହୁଲ ବୋଷ, ସମ୍ପାଦକ ଜି ପ୍ରଭୁ, କ୍ରୀଡ଼ା ଓ ଯୁବସେବା ବିଭାଗର କମିଶନର ତଥା ଶାସନ ସଚିବ ଭୂପେନ୍ଦ୍ର ସିଂ ପୁନିଆ, ନିର୍ଦ୍ଦେଶକ ଡ. ୟେଦୁଲା ବିଜୟ, ଓଡ଼ିଶା ରଗ୍ବି ଫୁଟବଲ୍ ସଂଘର ସଭାପତି ପ୍ରିୟଦର୍ଶୀ ମିଶ୍ର ପ୍ରମୁଖ ଅତିଥିଭାବେ ଉପସ୍ଥିତ ଥିଲେ।

1 hour ago
1


